गुरुवार, 12 नोव्हेंबर 2026
दोन्ही शिवसेना पुन्हा एकत्र येणार? ओमराजेंचं मोठं विधान
महाराष्ट्राच्या राजकारणात सध्या वेगवेगळ्या राजकीय समीकरणांची चर्चा सुरू आहे. एकीकडे राष्ट्रवादी काँग्रेसच्या दोन्ही गटांच्या विलिनीकरणाची चर्चा रंगत असतानाच आता शिवसेनेचे ठाकरे आणि शिंदे गट पुन्हा एकत्र येणार का, असा प्रश्न उपस्थित होऊ लागला आहे. खासदार ओमराजे निंबाळकर यांच्या विधानानंतर या चर्चेला आणखी हवा मिळाली असून मंत्री भरत गोगावले यांनीही सूचक प्रतिक्रिया दिली आहे. (Shivsena Merger)
धाराशिवचे खासदार ओमराजे निंबाळकर यांनी दोन्ही शिवसेना एकत्र येण्याबाबत आपली भूमिका स्पष्ट केली आहे. दोन्ही शिवसेना एकत्र आल्या तर माझ्यापेक्षा जास्त आनंदी माणूस दुसरा कुणी नसेल, असं त्यांनी म्हटलं आहे.
दोन्ही पक्षांचे प्रमुख वेगवेगळे आहेत. त्यामुळे एकत्र येण्याचा अंतिम निर्णय उद्धव ठाकरे आणि एकनाथ शिंदे यांनाच घ्यावा लागेल. मात्र, दोन्ही शिवसेना एकत्र याव्यात, ही कार्यकर्त्यांसह सामान्य जनतेचीही भावना असल्याचं ओमराजे यांनी सांगितलं.
NCP Merger News: अजित पवार महायुतीची साथ सोडणार होते; बड्या नेत्याच्या दाव्याने खळबळ
विशेष म्हणजे, काही महिन्यांपूर्वीच ओमराजे यांनी ठाकरे गटाची साथ सोडून शिंदे यांच्या शिवसेनेत प्रवेश केला होता. त्यामुळे त्यांच्या या विधानाची राजकीय वर्तुळात विशेष चर्चा होत आहे.
दुसरीकडे, मंत्री भरत गोगावले यांनाही दोन्ही शिवसेना एकत्र येण्याबाबत प्रश्न विचारण्यात आला. यावर सध्याच्या परिस्थितीत आम्हाला असं काही घडेल, असं वाटत नाही. मात्र, राजकारणात कधी काय होईल सांगता येत नाही. सकाळचं संध्याकाळी आणि संध्याकाळचं सकाळी होऊ शकतं, असं ते म्हणाले.
गुलाबराव पाटील यांना याबाबत काही माहिती मिळाली असेल, तर येत्या मंगळवारी होणाऱ्या कॅबिनेट बैठकीत त्यांनाच विचारणार असल्याचंही गोगावले यांनी सांगितलं.
याआधी मंत्री गुलाबराव पाटील यांनी दोन्ही शिवसेना एकत्र येण्याच्या चर्चेवर रेल्वेचं उदाहरण दिलं होतं. ‘एकनाथ शिंदे आमचं इंजिन आहेत आणि आम्ही रेल्वेचे डबे आहोत. इंजिन जिकडे जाईल, तिकडे डबे जातील,’ असं म्हणत त्यांनी एकनाथ शिंदे यांच्या निर्णयालाच महत्त्व असल्याचं स्पष्ट केलं होतं.
एकीकडे राष्ट्रवादीच्या विलिनीकरणाची चर्चा आणि दुसरीकडे शिवसेनेच्या एकत्रीकरणाबाबत नेत्यांची विधानं, यामुळे राज्याच्या राजकारणात नव्या समीकरणांची चर्चा सुरू झाली आहे. मात्र, दोन्ही शिवसेना प्रत्यक्षात एकत्र येणार का, याबाबत अद्याप कोणताही अधिकृत निर्णय जाहीर झालेला नाही. त्यामुळे आता उद्धव ठाकरे आणि एकनाथ शिंदे यांच्या भूमिकेकडे सर्वांचं लक्ष लागलं आहे.
Ans: दोन्ही शिवसेना एकत्र आल्या तर माझ्यापेक्षा जास्त आनंदी माणूस दुसरा कुणी नसेल, असं ओमराजे निंबाळकर यांनी म्हटलं.
Ans: सध्याच्या परिस्थितीत दोन्ही शिवसेना एकत्र येतील असं वाटत नाही. मात्र, राजकारणात कधीही काहीही घडू शकतं, असं भरत गोगावले म्हणाले.
Ans: गुलाबराव पाटील यांनी एकनाथ शिंदे यांची तुलना रेल्वेच्या इंजिनाशी केली. एकनाथ शिंदे आमचं इंजिन आहेत आणि आम्ही रेल्वेचे डबे आहोत. इंजिन जिकडे जाईल, तिकडे डबे जातील, असं त्यांनी म्हटलं.
