अग्निशमन दलाच्या मदतीला ‘फायर फायटिंग ड्रोन’; उंच इमारतींतील आगीवर नियंत्रणाचा नवा प्रयोग
विजय काते, भाईंदर : शहरातील उंच इमारतींमध्ये लागणाऱ्या आगीवर अधिक प्रभावी आणि जलदगतीने नियंत्रण मिळविण्यासाठी मिरा-भाईंदर महानगरपालिका अग्निशमन विभागाने आधुनिक तंत्रज्ञानाचा वापर करण्याच्या दिशेने महत्त्वाचे पाऊल उचलले आहे. उंच इमारतींवरील आगी विझविण्यासाठी ड्रोनच्या माध्यमातून अग्निशमन करण्याचे प्रात्यक्षिक अग्निशमन विभागाच्या वतीने सादर करण्यात आले.
या प्रात्यक्षिकाच्या माध्यमातून उंच इमारतींच्या अशा ठिकाणी, जिथे पारंपरिक अग्निशमन यंत्रणेद्वारे पोहोचणे आव्हानात्मक ठरते, तेथे ड्रोनच्या सहाय्याने थेट आगीच्या ठिकाणी पाण्याचा मारा करून आग आटोक्यात आणण्याची कार्यपद्धती दाखविण्यात आली. आपत्कालीन परिस्थितीत अग्निशमन दलाच्या जवानांचा धोका कमी करण्यासोबतच आगीवर जलद नियंत्रण मिळविण्यासाठी या तंत्रज्ञानाचा उपयोग होऊ शकतो. या वेळी महापालिका आयुक्त राधाबिनोद शर्मा, अतिरिक्त आयुक्त प्रियंका राजपूत, उपायुक्त डॉ. सचिन बांगर आणि मुख्य अग्निशमन अधिकारी डॉ. प्रकाश बोराडे यांच्यासह सर्व सहाय्यक अग्निशमन अधिकारी, केंद्र अधिकारी तसेच अग्निशमन विभागातील अधिकारी व कर्मचारी उपस्थित होते.
आधुनिक तंत्रज्ञानाचा प्रभावी वापर करून शहरातील नागरिकांच्या सुरक्षिततेला सर्वोच्च प्राधान्य देण्याच्या दृष्टीने मिरा-भाईंदर अग्निशमन विभागाकडून हा उपक्रम राबविण्यात आला आहे. विशेषतः उंच इमारती, अरुंद जागा किंवा धोकादायक परिस्थितीत लागलेल्या आगीवर नियंत्रण मिळविताना ड्रोन तंत्रज्ञान भविष्यात अग्निशमन विभागासाठी उपयुक्त ठरण्याची शक्यता आहे. या प्रात्यक्षिकामुळे मिरा-भाईंदर शहरातील अग्निशमन व्यवस्थेत आधुनिक तंत्रज्ञानाची भर पडत असून, ‘आग विझविण्यासाठी तंत्रज्ञानाची साथ आणि नागरिकांच्या सुरक्षेला प्राधान्य’ असा संदेश या उपक्रमातून देण्यात आला आहे.
पारंपरिक अग्निशमन यंत्रणा सहज पोहोचू शकत नाही अशा उंच मजल्यांपर्यंत ड्रोन पोहोचवून थेट आगीच्या ठिकाणी पाण्याचा मारा करण्याची क्षमता या प्रात्यक्षिकातून दाखविण्यात आली. त्यामुळे आपत्कालीन परिस्थितीत आगीवर वेगाने नियंत्रण मिळविण्यास मदत होण्याबरोबरच अग्निशमन जवानांना पत्करावी लागणारी जोखीम कमी करण्यासाठीही हे तंत्रज्ञान उपयुक्त ठरू शकते.
विशेषतः उंच इमारती, अरुंद जागा आणि प्रत्यक्ष पोहोचणे धोकादायक असलेल्या ठिकाणी ड्रोनचा वापर फायदेशीर ठरण्याची शक्यता आहे. आधुनिक तंत्रज्ञानाची मदत घेऊन शहराची अग्निशमन यंत्रणा अधिक सक्षम करणे आणि नागरिकांच्या सुरक्षेला प्राधान्य देणे, हा या प्रयोगामागील प्रमुख उद्देश आहे.
.png "Videos"){kind=small}
