Navi Mumbai Crane Accident: ऐरोली माईंडस्पेसमध्ये क्रेनचा हुक तुटला; एकाचा जागीच मृत्यू, दुसऱ्याने उपचारादरम्यान जीव गमावला

Navi Mumbai Crane Accident: नवी मुंबईतील ऐरोली माईंडस्पेस परिसरात क्रेनचा हुक तुटून झालेल्या भीषण अपघातात दोघांचा मृत्यू झाला. यातील एका व्यक्तीचा घटनास्थळीच मृत्यू झाला, तर दुसऱ्याचा उपचारादरम्यान प्राण गेला. या घटनेनंतर परिसरात हळहळ व्यक्त होत आहे.

• क्रेनचा हुक तुटून झालेल्या अपघातात दोघांचाही मृत्यू
• एकाचा जाग्यावर, तर दुसऱ्याचा उपचारादरम्यान प्राण गेला
• निष्काळजीपणावर नागरिकांचा उद्रेक

नवी मुंबई : नवी मुंबईतील ऐरोली-पटणी रोडवरील माईंडस्पेस परिसरात गुरुवारी एका बांधकाम साईटवर क्रेनचा अतिशय वजनदार हुक कोसळून घडलेल्या अपघातात दोन्ही कामगारांचा दुर्दैवी मृत्यू झाला आहे. क्रेनचा अतिशय अवजड हुक थेट अंगावर पडल्याने एका कामगाराचा घटनास्थळीच तडफडून मृत्यू झाला, तर गंभीर जखमी झालेले भोबि सुरेंद्र राय (वय ४५) यांचा कळवा येथील रुग्णालयात उपचारादरम्यान मृत्यू झाला. या भीषण घटनेमुळे परिसरात शोककळा पसरली असून बांधकाम क्षेत्रातील सुरक्षेचा प्रश्न अत्यंत गंभीर बनला आहे.

या घटनेची माहिती मिळताच अग्निशमन दल आणि स्थानिक पोलिसांनी घटनास्थळी धाव घेतली. मृत कामगाराचे मृतदेह शवविच्छेदनासाठी पाठवण्यात आले असून दुसऱ्या मृत कामगाराची ओळख पटवण्याचे काम पोलीस करत आहेत.

Navi Mumbai News: मतदार यादी पुनरीक्षण मोहिमेत BLOच्या कामकाजावर प्रश्नचिन्ह; उपमहापौर दशरथ भगत नाराज

सुरक्षा अधिकारी फरार? ठेकेदाराचा गुन्हा लपवण्याचा प्रयत्न

या दुर्घटनेनंतर बांधकाम साईटवरील सुरक्षेचा भीषण बोजवारा समोर आला आहे. काम सुरू असताना सुरक्षेची जबाबदारी असलेले सुरक्षा अधिकारी (सेफ्टी ऑफिसर) प्रणय हे घटनास्थळी उपस्थित नव्हते, असा गंभीर आरोप केला जात आहे. तसेच, ठेकेदार वैभव रॅपिडो यांनी या प्राणघातक घटनेची कोणतीही माहिती कामगार विभागाला (Labor Department) दिली नसल्याचे समोर आले आहे. नियमानुसार अपघाताची तात्काळ नोंद करणे बंधनकारक असताना, प्रकरण दाबण्यासाठीच हे वृत्त दडपण्याचा प्रयत्न केला गेल्याची जोरदार चर्चा रंगली आहे.

काही दिवसांपूर्वीच एपीएमसी परिसरात घडली होती अशीच दुर्घटना

काही दिवसांपूर्वीच एपीएमसी सीएनजी पंपाच्या मागे असलेल्या एका मोठ्या बांधकाम साईटवरून असाच एक प्रचंड मोठा पाईप अचानक खाली कोसळला होता. त्यावेळी सुदैवाने कोणतीही जीवितहानी झाली नव्हती. मात्र, त्या घटनेनंतरही प्रशासनाने आणि कंत्राटदारांनी कोणतीही गंभीर दखल न घेतल्यानेच आज दोन निष्पाप कामगारांना आपला जीव गमवावा लागल्याचा संताप व्यक्त केला जात आहे.

मनुष्यवधाचा गुन्हा दाखल करण्याची मागणी

कामगारांच्या जिवाची पर्वा न करता सुरक्षेशिवाय काम करून घेणारे ठेकेदार वैभव रॅपिडो, सेफ्टी ऑफिसर प्रणय आणि संबंधित बांधकाम कंपनीवर तात्काळ सदोष मनुष्यवधाचा गुन्हा दाखल करून त्यांना अटक करावी, अशी आक्रमक मागणी विविध कामगार संघटना व स्थानिक नागरिकांनी केली आहे.

Navi Mumbai News: नवी मुंबईतील वाहतूक कोंडीला मिळणार ब्रेक? पाम बीच रोडवर उड्डाणपुलांचा पर्याय