वेतनवाढीसाठी परिवहन कर्मचारी आक्रमक; आज काम बंद आंदोलनावर ठाम, प्रवाशांचे हाल होणार?
विजय काते, मिरा-भाईंदर : मिरा-भाईंदर महानगरपालिका परिवहन सेवेतील कर्मचाऱ्यांनी वेतनवाढीसह विविध मागण्यांसाठी आज, सोमवार २८ सप्टेंबर रोजी काम बंद आंदोलनाची हाक दिली आहे. आंदोलनाच्या पार्श्वभूमीवर पालिका प्रशासन आणि कर्मचारी संघटनांच्या प्रतिनिधींची मागील आठवड्यात बैठक झाली. मात्र, या बैठकीत मागण्यांवर ठोस तोडगा न निघाल्याने कर्मचारी संघटना आंदोलनावर ठाम असल्याचे स्पष्ट झाले आहे. त्यामुळे आज शहरातील बससेवा सुरू राहणार की विस्कळीत होणार, याकडे प्रवाशांचे लक्ष लागले आहे. (Transport Employees Salary Hike)
मिरा-भाईंदर महापालिकेच्या परिवहन सेवेमार्फत शहरांतर्गत तसेच ठाणे आणि मुंबईकडे जाणाऱ्या विविध मार्गांवर बससेवा चालवली जाते. या सेवेत सुमारे ३०० कंत्राटी कर्मचारी कार्यरत असून, त्यामध्ये प्रामुख्याने चालक आणि वाहकांचा समावेश आहे. सध्या कर्मचाऱ्यांना सुमारे २३ हजार रुपये वेतन मिळत असल्याचे सांगण्यात येते. मात्र, मागील ११ वर्षांपासून वेतनात वाढ झालेली नसल्याचा दावा कर्मचारी संघटनांनी केला आहे.
वाढती महागाई, कामाचे स्वरूप आणि कर्मचाऱ्यांवर वाढणारा आर्थिक ताण लक्षात घेता दरवर्षी १० टक्के वेतनवाढ करण्यात यावी, अशी मागणी कर्मचारी संघटनांकडून करण्यात आली आहे. याशिवाय प्रवासी भत्त्यात वाढ करावी तसेच अन्य प्रलंबित मागण्यांवरही निर्णय घ्यावा, अशी मागणी आहे. कर्मचारी संघटनांनी अनेक वर्षांपासून विविध मागण्यांसाठी प्रशासनाकडे पाठपुरावा केल्याचे सांगितले जाते. मात्र, मागण्यांवर अपेक्षित कार्यवाही होत नसल्याने अखेर काम बंद आंदोलनाचा निर्णय घेण्यात आला.
दरम्यान, आंदोलनाची घोषणा झाल्यानंतर पालिका प्रशासनाने परिवहन कर्मचारी संघटनांच्या प्रतिनिधींसोबत बैठक घेतली. या बैठकीत कर्मचाऱ्यांना मूळ वेतनासह विविध भत्ते दिले जात असल्याचे प्रशासनाने स्पष्ट केले. तसेच शासनाने लागू केलेल्या वाढीव दरानुसार दर सहा महिन्यांनी विशेष भत्ताही दिला जात असल्याचे प्रशासनाचे म्हणणे आहे. साप्ताहिक सुट्टीचे वेतनही मूळ वेतनामध्ये समाविष्ट केले जाते, असे प्रशासनाकडून स्पष्ट करण्यात आले. शासनाकडून मूळ वेतनात वाढ करण्यात आलेली नसल्याने पालिकेनेही मूळ वेतनात स्वतंत्र वाढ केलेली नसल्याचे प्रशासनाने सांगितले. त्यामुळे कर्मचारी संघटनांनी प्रस्तावित आंदोलन मागे घ्यावे, असे आवाहन प्रशासनाने केले आहे.
आंदोलनामुळे बससेवा विस्कळीत होऊन प्रवाशांची गैरसोय होण्याची शक्यता लक्षात घेऊन पालिका प्रशासनाने पोलिसांना पत्र देऊन परिस्थिती हाताळण्यासाठी आवश्यक सहकार्य करण्याची विनंती केल्याचे समजते. त्याचबरोबर कर्मचाऱ्यांना आंदोलनाबाबत कंत्राटदारामार्फत नोटिसाही बजावण्यात आल्याची माहिती आहे. आंदोलन केल्यास नियमानुसार कठोर कारवाईचा इशाराही देण्यात आला आहे.
मात्र, प्रशासनासोबत बैठक होऊनही मागण्यांवर समाधानकारक तोडगा निघाला नसल्याने कर्मचारी संघटना आंदोलनावर ठाम असल्याचे सांगत आहेत. त्यामुळे आज प्रत्यक्षात किती कर्मचारी कामावर हजर राहतात आणि परिवहन सेवा कितपत सुरू राहते, यावर शहरातील वाहतुकीचे चित्र अवलंबून आहे. आंदोलन झाल्यास दररोज बससेवेवर अवलंबून असलेल्या हजारो प्रवाशांना पर्यायी वाहतुकीचा आधार घ्यावा लागू शकतो. यापूर्वीही परिवहन कर्मचाऱ्यांच्या आंदोलनामुळे प्रवाशांची गैरसोय झाल्याने यावेळी प्रशासन आणि कर्मचारी संघटना यांच्यातील संघर्षाचा थेट परिणाम प्रवाशांवर होण्याची शक्यता निर्माण झाली आहे.
Pune Crime: पुण्यात बिग बॉस फेम रीलस्टारला अटक; डॉक्टरांच्या घरात घुसून मारहाण, ५ लाखांची मागणी
.png "Videos"){kind=small}
