जतमध्ये पाचव्या दिवशीही धनगर आरक्षणासाठी आंदोलन सुरूचं; युवकांनी केला रस्ता रोको

धनगर आरक्षण अंबलबजावणीसाठी आंदोलन चालू आहे पण लोकप्रिनिधींनी याकडे पाठ फिरवली असल्याने युवकांनी नाराजी व्यक्त करत जत- सांगली रोडवर रस्तारोको करत घोषणा देऊन परिसर दणाणून सोडला.

जत : जत तहसील कार्यालयासमोर अशोक गोरड यांचे पाच दिवसांपासून आमरण उपोषण सुरू आहे. या उपोषणाला राज्य सरकारचे प्रतिनिधी म्हणून पालकमंत्री सुरेश खाडे भेट देऊन उपोषणकर्त्याला राज्य सरकारच्या वतीने आश्वस्त करतील अशी अपेक्षा होती. पण भेटण्यास पालकमंत्र्यांनी नकार देत उदासीनता दाखवली. त्यानंतर युवकांनी नाराजी व्यक्त करत जत- सांगली रोडवर रस्तारोको करत घोषणा देऊन परिसर दणाणून सोडला.

धनगर आरक्षण अंबलबजावणीसाठी आंदोलन चालू आहे पण लोकप्रिनिधींनी याकडे पाठ फिरवली असल्याने युवकांनी नाराजी व्यक्त केल्यानंतर आमदार विक्रम सावंत यांनी उपोषण कर्त्याची भेट घेत अधिवेशनात प्रश्न उपस्थित करणार असल्याचे आश्वासन दिले. खासदारांनी मात्र उपोषणाकडे पाठ फिरवली असल्याचे आंदोलनस्थळी समाज बांधवांच्यात चर्चा सुरू होती. आंदोलनस्थळी उपोषणकर्ते अशोक गोरड यांची प्रकृती खालावल्याने त्यांना सलाईन लावण्यात आली.

रस्तारोको आंदोलनावेळी विक्रम ढोणे म्हणाले की, धनगर समाजाची अंमलबजावणीची मागणी असताना राज्य सरकारने धनगर समाजाच्या एस टी आरक्षण समावेशाची अभ्यास समिती गठित करून धनगर समाजाची दिशाभूल केली आहे. राज्य सरकारने केंद्र सरकारकडे तातडीने शिफारस पाठवण्याची मागणी समाज्याच्या वतीने करण्यात आली.