शनिवार, 15 ऑगस्ट 2026
'ट्रॉमा 'तील कामगारांचा संघर्ष सुरूच! कंत्राटदार बदलत राहिल्याने कामगारांच्या हक्कांवर गदा येत असल्याने नाराजी
मुंबई: रुग्णांचे प्राण वाचविण्यासाठी अहोरात्र पालिकेच्या जोगेश्वरीतील हिंदुहृदयसम्राट बाळासाहेब ठाकरे ट्रॉमा केअर रुग्णालयातील कामगारांनाच आपल्या हक्काच्या पगारासाठी संघर्ष करावा लागत असल्याचे धक्कादायक चित्र समोर आले आहे. मल्टिपर्पज लेबर आणि हाऊसकीपिंग विभागातील तब्बल १२४ कामगारांच्या वेतन, पीएफ आणि ईएसआयसीच्या प्रश्नांवर गेल्या पाच ते सहा महिन्यांपासून ठोस तोडगा निघालेला नाही. प्रशासनाकडून बैठकांवर बैठका होत असल्या, तरी कामगारांच्या हाताला मात्र अद्याप समाधानकारक काही लागले नाही. मल्टिपर्पज लेबरचे सुमारे ८० कामगार एका संस्थेच्या कंत्राटाखाली कार्यरत आहेत. मात्र, कामगारांना वेतन कशा पद्धतीने दिले जाते, याची माहिती कंत्राटदाराने अद्याप स्पष्ट केली नसून पीएफच्या पावत्याही मिळालेल्या नसल्याचे कामगारांचे म्हणणे आहे.(फोटो सौजन्य – सोशल मीडिया)
हाऊसकीपिंग विभागातील ४९ जणांची गरज असलेल्या जागी ४४ कामगार काम करत आहेत. या कामगारांचे एप्रिलचे वेतन रखडल्याची माहिती आहे. कंत्राट निश्चित नसल्याने मे, जून, जुलै आणि ऑगस्टमध्ये कामगारांकडून डेली वेजेसवर काम करून घेतले जात असल्याचे सांगण्यात येते.66 महापालिका कामगार विभागाच्या परिपत्रकाप्रमाणे शासनाच्या कायद्यानुसार किमान वेतन आणि १२ टक्के कर्मचाऱ्याचे आणि १३ टक्के महापालिकेने भरायचे आहेत. इएसआय, बोनस, सुरक्षेची साधने, मॅच्युरिटी अशा सगळ्या तरतुदी आहेत. समान वेतनाचा कायदा असून तसं कामगारांना मिळत नसल्यास कामगारावर अन्याय आहे, अशी माहिती – प्रदीप नारकर, सहा. सरचिटणीस, म्युनिसिपल मजदूर युनियन यांनी दिली आहे.
सुरुवातीला रोख स्वरूपात पैसे देण्यात आले, तर आता बँक खात्याची माहिती घेण्यात आली आहे. मात्र, महिन्याचा पगार देण्याऐवजी १५ ते २० दिवसांनी वेतन दिले जात असल्याची कामगारांची तक्रार आहे. वारंवार कंत्राटदार बदलल्यास पीएफ, ईएसआयसीसारख्या मूलभूत कामगार हक्कांपासून वंचित राहण्याची भीती कामगारांनी व्यक्त केली आहे. गेल्या पाच-सहा महिन्यांपासून प्रश्न मांड्नही संघटित आवाज नसल्याने आपली दखल घेतली जात नसल्याची त्यांची भावना आहे. त्यामुळे प्रशासनाच्या बैठका आणि कंत्राटदारांच्या मनमानीत कामगारांचा प्रश्न मात्र अक्षरशः लटकलेला आहे.
