बारामती : पतीने व्यवसायासाठी खाजगी सावकारांकडून घेतलेल्या कर्जाची बहुतांश रक्कम परत करूनही पुन्हा व्याजाच्या पैशांसाठी वारंवार तगादा लावल्याने महिलेचा पती घरातून निघून गेला. तरीदेखील या महिलेला तिच्या घरी जाऊन पैशासाठी जीवे मारण्याची धमकी दिल्याप्रकरणी पाच खाजगी सावकारांवर बारामती शहर पोलीस ठाण्यात गुन्हा दाखल करण्यात आला आहे.
संजय प्रल्हाद बोरकर, पोपट सिताराम थोरात, प्रवीण बेदमुथा, दिलीप कोठारी, (रा. बारामती) व अळणुरे साहेब (रा.परभणी) अशी गुन्हा दाखल करण्यात आलेल्यांची नावे असून, यातील पोपट थोरात व संजय बोरकर या दोघांना पोलिसांनी अटक केली असून, त्यांना चार दिवसांची पोलिस कोठडी देण्यात आली आहे.
याबाबत पोलिस सूत्रांनी दिलेल्या माहितीनुसार, तक्रारदार महिलेने पोलीस ठाण्यात तक्रार दिली की, तिचे पती बबन सातपुते (रा. रिया अपार्टमेंट, भिगवन रोड बारामती) यांनी २०२१ मध्ये वाशिम जिल्ह्यामध्ये बायोमास ब्रिक्वेट्स बनवण्याची कंपनी सुरू केली. कंपनी सुरू करताना तिच्या पतीने संजय प्रल्हाद बोरकर, पोपट सिताराम थोरात, प्रवीण बेदमुथा, दिलीप कोठारी (रा. बारामती) व अळणुरे साहेब (रा.परभणी) या सावकारांकडून दर महिना पाच टक्के व्याजाने १ कोटी ९ लाख रुपये घेतले होते. या सर्वांची बरीचशी रक्कम व्याजासह कारखाना चालू असताना परत केली आहे. परंतु, दुर्दैवाने त्यांच्या कारखान्याला तीन मे २०२१ ला आग लागली.
यामध्ये त्यांचे मोठे नुकसान झाले. त्यामुळे बाकीची रक्कम ते परत देऊ शकले नाहीत. त्यानंतर वरील सर्व सावकारांनी त्यांना व्याजासाठी त्रास देण्यास सुरुवात केली. इन्शुरन्स मिळाल्यानंतर राहिलेली रक्कम देतो, अशी विनंती करून सुद्धा ते सातपुते यांना त्रास देत आहेत. त्यांच्या त्रासापोटी १७ एप्रिल रोजी बबन सातपुते घरातून निघून गेलेले आहेत. ते घरातून निघून गेलेले असताना सुद्धा यातील आरोपी पोपट थोरात हा तक्रारदार महिला घरात असताना बूट घालून तक्रारदार महिलेच्या घरात जाऊन तिला व्याजाच्या पैशासाठी शिवीगाळ करून तिला लज्जा उत्पन्न होईल, असे वर्तन करून व्याजासाठी जीवे मारण्याची धमकी दिली. त्यामुळे सदर महिलेने शेवटी पोलिसात तक्रार दाखल केली.
तक्रारदार महिलेचे पती अद्याप घरी आलेले नाही. सदर बाबत पोलिसांनी खातरजमा करून वरील सर्व आरोपींच्या विरोधात सावकारी अधिनियम कलमप्रमाणे गुन्हे दाखल करून यातील आरोपी पोपट थोरात व संजय बोरकर यांना तात्काळ अटक केली. बुधवारपासून (दि.२०) चार दिवसाची पोलीस कोठडी यातील दोघांना न्या. वागडोळे यांनी देण्याचे आदेश दिले आहेत.
याबाबत सरकारी अभियोक्ता किरण सोनवणे यांनी पोलिसांच्या बाजूने जोरदार युक्तिवाद केला. सदर गुन्ह्याचा तपास पोलीस निरीक्षक सुनील महाडिक हे पोलीस उपनिरीक्षक घोडके तसेच पोलीस नाईक संजय जाधव, पोलीस नाईक दशरथ कोळेकर, कल्याण खांडेकर, शिंदे इंगोले यांच्या मदतीने करत आहेत.
यापुढे कोणालाही सावकारीचा त्रास होत असेल, त्यांनी पोलीस ठाण्यात येऊन तक्रार करावी, तक्रारीची खातरजमा करून कारवाई केली जाईल कुणीही बेकायदेशीर सावकारांची भीती बाळगू नये. फक्त तक्रारची खातरजमा केली जाईल. नंतरच गुन्हा दाखल होईल, असे पोलिस निरिक्षक सुनिल महाडिक यांनी सांगितले.
.png "Videos"){kind=small}
