Kolhapur Rain: अवकाळीने कोल्हापूरला झोडपले; बाजारपेठेत व्यापारी आणि ग्राहकांची उडाली तारांबळ

कोल्हापूर :  हातकणंगलेसह परिसराला सायंकाळी साडेपाचच्या सुमारास वळवाच्या पावसाने अक्षर झोडपून काढले. आकाशात ढगांचा गडगडात आणि कडाडणाऱ्या विजेसह पावसाने दमदार हजेरी लावली. या पावसामुळे बळीराजाला चांगला दिलासा मिळाला आहे.

दरम्यान अचानक पणे सुरू झालेल्या पावसामुळे बाजारपेठेत व्यापारी आणि ग्राहकांची एकच तारांबळ उडाली.

सामानांची बांधाबाध करताना व्यापारी वर्गाची त्रेधा उडाली होती. हातकणंगलेचा बाजाराचा दिवस शहरवासीयांसह परिसरातील औद्योगिक वसाहतीमधील कामगार खरेदीसाठी बाजारात आले होते. अचानकपणे धुवाधार पाऊस सुरू झाल्यामुळे एकच धावपळ उडाली, मिळेल त्या ठिकाणी व्यापाऱ्यांसह ग्राहकानी आश्रय घेतला. अशीच परिस्थिती, इचलकरंजी, कुंभोज, कोरोची, आळते, पेठ वडगाव  येथे पहावयास मिळाली. सुमारे तासभर धुवाधार सुरू असलेल्या पावसामुळे बघेल तिकडे पाणीच पाणी दिसत होते. सकल भागात मोठ्या प्रमाणात पाणी साचल्यामुळे वाहनधारकांना कसरत करावी लागत होती.

सकाळी नऊ वाजल्यापासूनच उन्हाचा तडाका जाणवत होता. गेले दोन दिवसांपासून ढग दाटून येत होते. परंतु सायंकाळच्या वेळी वाऱ्याच्या वेगाने ढग निघून जात होते. त्यामुळे हवेत प्रचंड उष्मा निर्माण झाला होता. या उस्मामुळे नागरिक हैराण झाले होते. सायंकाळी पाच वाजण्याच्या सुमारास ढग दाटून आले. विजेचा कडकडाट सुरू झाला. वारेही प्रचंड वेगाने वाहत होते. साडेपाच वाजता पावसाने सुरुवात केली. वाऱ्याचा प्रचंड वेग होता. त्यामुळे काही ठिकाणी झाडे उनमळून पडली आहेत. खबरदारीचा उपाय म्हणून महावितरणकडून पाऊस सुरू असलेल्या भागातील विद्युत पुरवठा बंद ठेवण्यात आला होता. काही ठिकाणी रस्त्यांवर पाणी आल्यामुळे वाहतूक ठप्प झाली होती. आणखीन दोन दिवस अशाच स्वरूपाचा पाऊस पडेल असा अंदाज हवामान तज्ञांनी व्यक्त केला आहे.

राज्यात अवकाळी पावसाचे थैमान

 मराठवाड्यासह राज्यात सर्वत्र अवकाळी पावसाने थैमान घातले असून, त्यामुळे शेतकऱ्यांचे प्रचंड नुकसान झाले आहे. एकीकडे शेतकऱ्यांचे नुकसान होत असताना, अवकाळीमुळे बळी गेल्याचीही घटना सोमवारी घडली. सोमवारी लातूर आणि बुलढाणा जिल्ह्यात वीज कोसळण्याच्या घटना घडली. या दोन्ही घटनांमध्ये नऊ जण जखमी झाले आहेत, तर एकाचा मृत्यू झाला आहे.

राज्यात अवकाळी पावसाचे थैमान; ऐन उन्हाळ्यात ओढ्यांना पूर तर नाशिकमध्ये 14 हजार शेतकऱ्यांचे नुकसान
येडशी, येरमाळा भागामध्ये जोरदार अवकाळी पाऊस

लातूर जिल्ह्यातील उमरगा तालुक्यातील येणेगूर परिसरात सोमवारी आठवडी बाजारादिवशी विद्युत खांबावर वीज पडल्याने वीज वाहक तार तुटून आठवडी बाजारात आलेल्यावर पडले. त्या तिघे जखमी झाल्याची घटना घडली आहे. दरम्यान, धाराशिव जिल्ह्यामध्ये दुपारी अवकाळी पावसाने जोरदार हजेरी लावली. जिल्ह्यातील येडशी, येरमाळा, भूम आणि धाराशिव परिसरामध्ये वादळी वाऱ्यासह विजेच्या कडकडाटासह अवकाळी झाला.

उष्णता कमी पण शेतकऱ्यांचे नुकसान

अवकाळी पावसामुळे उष्णता कमी झाली असली तरी शेतकऱ्यांच्या आंबा, डाळिंब आणि इतर फळबागांचे मोठ्या प्रमाणात नुकसान झाले आहे. दरम्यान, नाशिक जिल्ह्यात देखील सलग सहाव्या दिवशी अवकाळी पावसाची हजेरी लावली आहे. गेल्या काही दिवसांपासून नाशिक शहर आणि जिल्ह्यात अवकाळी पाऊस सुरु आहे. यातच सोमवारी दुपारच्या सुमारास वादळी वाऱ्यासह पावसाला पुन्हा एकदा सुरुवात झाली आहे.