आज ६ राज्यात विधानसभेच्या पोटनिवडणूकीसाठी मतदान

आज ३ नोव्हेंबर रोजी देशातील सहा राज्यांतील विधानसभेच्या ७ जागांसाठी मतदान होणार आहे. यात महाराष्ट्रातील मुंबई अंधेरी पूर्व मतदारसंघाची पोटनिवडणूकीचा देखील समावेश आहे.

महाराष्ट्राच्या अंधेरी पूर्व विधानसभा मतदारसंघाच्या निवडणुकीत मागील काळात अनेक घडामोडी घडल्या होत्या. ठाकरे गटाकडून दिवंगत आमदार रमेश लटके यांच्या पत्नी ऋतुजा लटके या निवडणूक रिंगणात उतरल्या आहेत. तर त्यांच्या विरोधात ६ उमेदवार रिंगणात असून त्यापैकी चार उमेदवार अपक्ष आहेत. या जागेवर भाजपने देखील उमेदवार जाहीर केला होता. त्यानंतर राज्याच्या राजकारणासह अंधेरी पोटनिवडणुकी संदर्भात अनेक नाट्यमयी घडामोडी पाहायला मिळाल्या. या पोटनिवडणुकीत मुख्य लढत ही ठाकरे गटाच्या उमेदवार ऋतुजा लटके आणि भाजप-शिंदे गट महायुतीचा उमेदवार मुरजी पटेल यांच्यात होती. मात्र राजकीय समजुती दाखवत भाजपने या निवडणुकीतून माघार घेतली.

बिहारमध्ये भाजपची थेट लढत नितीश-तेजस्वी यांच्या महाआघाडीशी आहे. त्यानंतर तेलंगणात केसीआरच्या टीआरएसपासून आपली जागा वाचवण्याचं सर्वात मोठं आव्हान भाजपसमोर आहे. इतर राज्यांमध्येही प्रादेशिक पक्ष भाजपला अडचणीत आणणार आहेत. हरियाणातील आदमपूर विधानसभा मतदारसंघ हा पाच दशकांपासून भजनलाल घराण्याचा बालेकिल्ला आहे, त्यामुळे भाजप हा गड आपल्या ताब्यात घेण्यात यशस्वी होणार का? हे पाहणंही महत्त्वाचं ठरणार आहे. आज होणाऱ्या पोटनिवडणूकीत उत्तर प्रदेशमधील गोळा गोकर्णनाथ, हरियाणातील आदमपूर , बिहारमधील मोकाम आणि गोपाळगंज, महाराष्ट्रातील अंधेरी पूर्व , तेलंगाणातील मुनुगोडे आणि ओदिशातील धामनगर इत्यादी मतदार संघांचा देखील समावेश आहे.

उत्तर प्रदेशातील गोळा गोकर्णनाथ विधानसभा मतदारसंघ भाजपचे आमदार अरविंद गिरी यांच्या निधनानं रिक्त झालेल्या जागेसाठी पोटनिवडणूक होत आहे. अरविंद गिरी हे तीन वेळा समाजवादी पक्षाचे आमदारही होते. भाजपमध्ये येताना ते दोनदा विधानसभेवर निवडून गेले होते. कुलदीप बिश्नोई यांनी हरियाणाच्या आदमपूर मतदारसंघातून राजीनामा दिला होता. काँग्रेस सोडून ते भाजपमध्ये गेले, त्यानंतर ही जागा रिक्त झाली. आरजेडीचे अनंत सिंह हे बिहारमधील मोकामा मतदारसंघातून आमदार होते पण एके- ४७ बाळगल्याच्या आरोपावरून त्यांचं सदस्यत्व रद्द करण्यात आलं आहे. त्यामुळे या ठिकाणी पोटनिवडणूक होत आहे.