Wardha News : एसएनसीयूमध्ये एकच व्हेंटिलेटर, जिल्हा रुग्णालयातील प्रकार; रेफर आऊटवर दिला जातोय भर

अमरावतीतील नवजात बालकांच्या मृत्यूच्या घटनेनंतर वर्धा जिल्हा रुग्णालयातील एसएनसीयूच्या सुविधांचा प्रश्न ऐरणीवर आला आहे. विभागात केवळ एक व्हेंटिलेटर असून मनुष्यबळाअभावी गंभीर बालकांना सेवाग्राम आणि सावंगी येथील वैद्यकीय महाविद्यालयात रेफर केले जात असल्याची माहिती आहे.

• वर्धा जिल्हा रुग्णालयातील एसएनसीयूमध्ये केवळ एक व्हेंटिलेटर
• मनुष्यबळाच्या कमतरतेमुळे गंभीर नवजात बालकांना रेफर करण्याची वेळ
• अमरावतीतील घटनेनंतर शासकीय आरोग्य सुविधांची तपासणी महत्त्वाची

 

वर्धा : गरजू व गरिबांसाठी उपयुक्त ठरणाऱ्या जिल्हा सामान्य रुग्णालयातील एसएनसीयूत नवजात बालकांवर तज्ज्ञ डॉक्टरांच्या मार्गदर्शनात उपचार केले जातात. अमरावती येथील घटनेनंतर जिल्हा रुग्णालयातील या एसएनसीयूतील आरोग्य सेवेची माहिती जाणून घेतली असता तेथे केवळ एकच व्हेंटिलेटर असल्याचे सांगण्यात आले. तर मनुष्यबळाची कमतरता असल्याने बहुदा गंभीर नवजात बालकांना सेवाग्राम व सावंगी (मेघे) वैद्यकीय महाविद्यालयात रेफर आऊट केले जात आहे.

जिल्ह्यात जिल्हा सामान्य रुग्णालय, दोन उपजिल्हा रुग्णालय, आठ ग्रामीण रुग्णालय व ३३ प्राथमिक आरोग्य केंद्र आहेत. या शासकीय आरोग्य संस्थांच्या नागरिकांना माध्यमातून शासकीय आरोग्यसेवेचा लाभ दिला जात आहे. पण या शासकीय आरोग्य संस्थांमध्ये अनेक तज्ज्ञ डॉक्टरांची पदे रिक्त आहेत. त्यामुळे बहुदा आर्थिक दृष्ट्या कमकुवत असलेल्यांनाही खाजगी रुग्णालयात उपचारासाठी जावे लागते.

०३ नवजात बालकांचा अमरावतीत मृत्यू

अमरावती येथील स्त्री सोमवारी ‘शिल्लर’ रुग्णालयात कंपनीच्या व्हॉटलेटरचा स्फोट होत ३ नवजात बालकांचा मृत्यू झाला. त्यामुळे आरोग्य यंत्रणा सध्या अलर्ट मोडवर आली आहे. याच पार्श्वभूमीवर जिल्हा सामान्य रुग्णालयातील एसएनसीयू विभागातील आरोग्य सेवा व सुविधांची माहिती जाणून घेतली असता या विभागात केवळ ‘विस्टा’ कंपनीचे एकच व्हेंटिलेटर कार्यरत असल्याचे सांगण्यात आले, पण संबंधित ‘व्हेंटिलेटर’ हाताळण्यासाठी पुरेसे मनुष्यबळ याठिकाणी नसल्याने या व्हीटलेटरचा पाहिजे तसा वापर होत नसल्याचे सांगण्यात आले.

Wardha News : ९,१२१ गॅस ग्राहक वांध्यात, वेळीच केली नाही ई-केवायसी तर सबसिडी होणार बंद

शिवाय तेथील गंभीर नवजात बालकांना सेवाग्राम आणि सावंगी (मेघे) येथील वैद्यकीय महाविद्यालयात रेफर आऊट केले जात आहे. नव्याने रुजू झालेले जिल्हा शल्य चिकित्सक डॉ. राजसिंग पवार हे स्वतः बालरोग तज्ज्ञ आहेत. त्यामुळे या विभागाला आणखी सक्षम करण्यासाठी त्यांनी विशेष प्रयत्न करावे, अशी अपेक्षा वर्धेकरांना आहे.

शासकीय रुग्णालयात ‘शिल्लर’चे व्हेंटिलेटर नाही

जिल्ह्यातील शासकीय आरोग्य संस्थांमध्ये ५० व्हेंटिलेटर असून त्यापैकी निम्मे अडगळीत तर काही सुस्थितीत व वापरात असल्याचे आरोग्य यंत्रणेतील खात्रिदायक सूत्रांकडून नाव न प्रकाशित करण्याच्या अटीवर सांगण्यात आले. तर या व्हेंटिलेटरमध्ये शिल्लर कंपनीच्या व्हेंटिलेटरचा समावेश नसल्याचेही सूत्रांनी स्पष्ट केले आहे.

वर्ध्यात 31.77 लाखांचा स्वस्त धान्य घोटाळा; निलंबनानंतर SIO आणि रेशन दुकानदारावर गुन्हा दाखल