Wardha News : वर्ध्यात जलसंकटाची टांगती तलवार; गतवर्षीच्या तुलनेत कमी पाणीसाठा, दमदार पावसाची प्रतीक्षा

वर्धा जिल्ह्यात यंदा पावसाने पाठ फिरवल्याने जलसंकटाची चिंता वाढली आहे. जिल्ह्यातील मोठ्या व मध्यम ११ जलाशयांमध्ये सध्या ६९ टक्केच पाणीसाठा असून खरीप पिकांवरही पावसाअभावी संकट निर्माण झाले आहे.

वर्धा, ब्युरो : यंदा वरुणराजा वर्धा जिल्ह्यावर काहीसा नाराज असल्याचे चित्र बघावयास मिळत आहे. आतापर्यंत दमदार पाऊस न झाल्याने सर्वत्र चिंता व्यक्त केली जात आहे. गतवर्षी जुलैच्या सुरुवातीच्या दिवसातच जिल्ह्यातील छोटे-मोठे सर्व जलाशय तुडुंब भरले होते. पण, यंदा अर्धा ऑगस्ट महिना संपला तरी जलाशयात केवळ ६९ टक्के पाणीसाठा आहे. पावसाअभावी वाढीच्या आणि फुलधारणेच्या अवस्थेत असलेली पिके माना टाकत आहे. येत्या काही दिवसात जिल्ह्यात मुरळधार पाऊस न झाल्यास आगामी काळात जिल्ह्यातील नागरिकांना भीषण पाणी टंचाईच्या समस्येला तोंड द्यावे लागणार आहे.

दीर्घकाळापासून पावसाने दडी मारल्याने खरीप पिकेही संकटात सापडली आहे. त्यामुळे शेतकऱ्यांची चिंता वाढली आहे. अशीच परिस्थिती कायम राहिल्यास भविष्यात जिल्ह्याला भीषण जलसंकटाचा सामना करावा लागू शकतो. जिल्ह्यात मोठे व मध्यम ११ जलाशय आहे. वर्ष २०२५ मध्ये १७आणि १८ जुलै रोजी झालेल्या अतिवृष्टीदरम्यान सर्व जलाशय १०० टक्के भरली होती. याउलट यंदाची परिस्थिती पूर्णपणे वेगळी आहे. यंदा जिल्ह्यात मान्सूनने आगमन झाले.

गतवर्षीच्या तुलनेत यंदा जलाशयांमध्ये अत्यल्प पाणीसाठा

पण काही मोजके दिवस सोडले तर पावसाने दमदार बॅटिंग जिल्ह्यात केली नाही. जुलैच्या सुरुवातीला आणि मध्यावर काही प्रमाणात पाऊस जिल्ह्यात झाला. त्यामुळे जलाशयातील काही प्रमाणात पाणी पातळी वाढली. मात्र, गतवर्षीच्या तुलनेत यंदा जलाशयांमध्ये अत्यल्प पाणीसाठा आहे. पावसाला झालेल्या विलंबामुळे खरीप पिकांच्या पेरण्यांवरही यंदा परिणाम झाला. कशीतरी शेतकऱ्यांनी पेरणी पूर्ण केली; मात्र आता पावसाअभावी पिकांवर संकट ओढवले आहे.

Wardha News : वर्ध्यात ३२ हजार शेतकऱ्यांना कर्जमाफीचा लाभ; पालकमंत्री पंकज भोयर यांची माहिती

जिल्ह्यात ढगाळ वातावरण कायम असून पिकांवर रोग व अळीचा प्रादुर्भाव वाढण्याची शक्यता शेतकऱ्यांकडून वर्तविली जात आहे. लवकर पाऊस न झाल्यास शेकडो हेक्टर क्षेत्रातील पिकांचे मोठे नुकसान होण्याची शक्यता आहे. त्यामुळे नागरिकांसह शेतकऱ्यांच्या नजरा आता आकाशाकडे लागल्या आहे.

जून, जुलै, ऑगस्टमध्ये पावसाची कमतरता

• जिल्ह्यात यंदा आतापर्यंत दमदार पाऊस झालेला नाही. तिन्ही महिन्यात गतवर्षीच्या तुलनेत पावसाची आकडेवारी कमी राहिली आहे.
• जूनमध्ये सरासरी १३२.२ मिमी पाऊस झाला असून तो सरासरीच्या ७५.९ टक्के आहे.
• जुलैमध्ये सरासरी २९९.८ मिमी पावसाची नोंद झाली असून, हे प्रमाण सरासरीच्या १०९.६ टक्के आहे.
• तर ऑगस्टमध्ये आतापर्यंत केवळ १६.२ मिमी पाऊस झाला असून, हे प्रमाण सरासरीच्या अवघ्या ६ टक्के असल्याचे सांगण्यात आले.

Wardha News: दीड लाख शेतकऱ्यांच्या पिकांना विमाकवच; कापूस, सोयाबीन, तुरीसह भुईमूग, ज्वारीचा समावेश