सौजन्य - सोशल मिडीया
पुणे : पुण्यात झिका व्हायरसचा प्रादुर्भाव दिवसेंदिस वाढत आहे. पुणे शहरात झिकाचे आणखी २ रुग्ण पॉझिटिव्ह आढळून आले आहेत. कर्वेनगर परिसरात राहणाऱ्या एका खाजगी हॉस्पिटलमध्ये इन्शुरन्स डिपार्टमेंट मध्ये काम करणाऱ्या ४२ वर्षीय महिलेचा अहवाल पॉझिटिव्ह आला आहे. तर, खराडी येथील एका २२ वर्षीय तरुणाचाही अहवाल शनिवारी उशिरा पॉझिटिव्ह आला असून, शहरातील झिका रुग्णांची एकूण संख्या १२ वर पोचली आहे. यामुळे आरोग्य विभागाची चिंता वाढली आहे.
महिलेला एक ते दीड आठवड्यापासून व्हायरल फिवर सारखा त्रास वाटत होता, एक दिवस फिवर बरोबर रॅश आल्याने संबंधित रुग्णालयाच्या फिजिशियनने जी का व्हायरसचे सॅम्पल एन आय व्ही ला पाठवले असता ते पॉझिटिव्ह आले आहे. त्यामध्ये रक्ताची चाचणी निगेटिव्ह आणि युरीन रिपोर्ट पॉझिटिव आहे. ४२ वर्षाची सदर महिला (गरोदर नसून) आता बरी झाली असून घरी आहे. सदर महिलेची सर्व ट्रीटमेंट ओपीडी बेसिस वर करण्यात आली आहे .तिच्या राहत्या भागात व हॉस्पिटलमध्ये केवळ एक किलोमीटरचे अंतर असून सदर भागामध्ये कीटकशास्त्रीय व इतर उपाययोजना चालू करण्यात येणार आहेत, अशी माहिती महापालिकेच्या आरोग्य विभागाने दिली.
पुणे महानगरपालिकेच्या कोद्रे रुग्णालयात उपचारासाठी आलेल्या खराडी गावातील एका बावीस वर्षे मुलाला एक दिवस ताप व रॅश आल्याने त्याचे सॅम्पल पाठवण्यात आले होते. ते पॉझिटिव्ह आले आहे. सदर भाग येरवडा नगर रोड क्षेत्रिय कार्यालयाच्या कार्यकक्षेत येत असल्याने या ठिकाणी संबंधित परिमंडळ वैद्यकीय अधिकारी यांच्या पथकाद्वारे प्रतिबंधात्मक उपायोजना राबवण्यात येणार आहेत.
झिका विषाणूचा गर्भावर काय परिणाम होतो?
आरोग्य तज्ज्ञांच्या माहितीनुसार, झिका व्हायरस टाळण्यासाठी गरोदर स्त्रियांनी काळजी घेणे अत्यंत आवश्यक आहे. कारण याचा सर्वाधिक धोका गर्भावर होतो. त्यामुळे गरोदरपणात जर झिका विषाणूचा संसर्ग झाल्यास, बाळाचा मेंदू सामान्यपणे वाढू शकत नाही आणि विकसित होऊ शकत नाही. परिणामी, बाळाचा जन्म मेंदूच्या विकासाशी संबंधित अपंगत्व घेऊन होऊ शकतो, किंवा त्याचे डोके लहान असू शकते, तसेच बाळामध्ये ऐकणे, शिकणे आणि वागण्यात देखील समस्या असू शकतात. पहिल्या तिमाहीत झिका संसर्ग झाल्यानंतर या समस्यांचा धोका सर्वाधिक असतो. झिका विषाणूचा गर्भधारणेचे प्रमाण घटण्याशी देखील संबंध आहे, असे डॉ. कल्पना बळीवंत म्हणल्या.
