‘अशोक मा.मा.’ मालिकेतून प्रसिद्ध अभिनेत्रीची एक्झिट, सोशल मीडियावर पोस्ट करत म्हणाली…
हिंदी-मराठी कलाविश्वातील हरहुन्नरी अभिनेते म्हणून अशोक सराफ यांना ओळखलं जातं. अशोक मामांनी आजवर अनेक सुपरहिट चित्रपट, मालिका आणि नाटकांमध्ये काम केलंय. सध्या त्यांची ‘कलर्स मराठी’ वरील ‘अशोक मा.मा.’ मालिका टेलिव्हिजनवर चांगलीच चर्चेचा विषय होत आहे. ही मालिका टिव्हीवर २५ नोव्हेंबरपासून रात्री ८.३० वाजल्यापासून टेलिकास्ट होत आहे. मालिकेत मुख्य भूमिकेत अशोक सराफ यांच्यासह अभिनेत्री नेहा शितोळे, रसिका वाखारकर, शुभावी गुप्ते, आशिष कुलकर्णी असे बरेच कलाकार मंडळी आहेत.
‘कलर्स मराठी’वरील ‘अशोक मा.मा.’ ही मालिका अल्पावधीत प्रेक्षकांच्या पसंतीस उतरली आहे. मालिकेतील अशोक मा.मा., ईरा, ईशान, भैरवी, फुलराणी ही पात्र आता घराघरात पोहोचली आहेत. पण, अशातच या मालिकेतून एका अभिनेत्रीने प्रेक्षकांचा निरोप घेतला आहे. याबाबत तिने स्वतः सोशल मीडियावर पोस्ट लिहित माहिती दिली आहे.
अभिनेत्री चैत्राली लोकेश गुप्ते हिने ‘अशोक मा.मा.’ मालिकेतून एक्झिट घेतली आहे. मालिकेत चैत्रालीने पल्लवीची भूमिका साकारली होती. पण या भूमिकेचा प्रवास संपला आहे. त्यामुळे चैत्रीली गुप्तेची ‘अशोक मा.मा.’ मालिकेतून एक्झिट झाली आहे. शेअर केलेल्या पोस्टमध्ये चैत्राली गुप्ते म्हणते, “अशोक मा.मा…सुखद अनुभव…खूप वर्षांनी मराठी मालिकेमध्ये काम केलं आणि त्याचा अनुभव हां खूप सुखद आणि आनंददायी होता…एकतर महाराष्ट्राचे महानायक अशोक सराफ अर्थात आपल्या सगळ्यांचे लाडके अशोक मामा त्यांच्याबरोबर काम करण्याची संधी , स्क्रीन शेअर करण्याची संधी मिळाली; ज्याचे खूप दडपण होते आणि उत्सुकता पण होती…अशोक मामा एक महान नट तर आहेतच पण एक उत्तम माणूस आहेत हे खूप जवळून अनुभवता आले. थँक्यू मामा.”
View this post on Instagram
पुढे चैत्रालीने लिहिलं की, “शुभावी, निआ, स्वराज, आशिष, नेहा या सगळ्यांबरोबरच काम करताना खूपच मजा आली…केदार वैद्य तुझ्याबरोबर खूप वर्षांनी काम केलं त्यामुळे जुने दिवस आठवले. थँक्यू केदार शिंदे, कलर्स मराठी. तसंच निवेदिता सराफ यांची मी आभारी आहे. त्यांनी मला पल्लवी भूमिका साकारण्यासाठी प्रोत्साहन दिलं. आणि सगळ्यात जास्त आभार माझ्या प्रेक्षकांचे, ज्यांनी माझ्यावर आणि पल्लवीवर खूप प्रेम केलं. सगळ्यांचे खूप खूप आभार…लवकरच भेटूया एका नवीन भूमिकेत एका नवीन मालिकेत आणि हो पल्लवी तुम्हाला अधून मधून भेटायला येईलच.”
