केदार शिंदे यांचा नवा प्रयोग; लेकीसोबत घेऊन येणार ‘आई भाड्याने हवी?’ हा आगामी चित्रपट

प्रसिद्ध मराठी दिग्दर्शक केदार शिंदे यांचा नवा प्रोजेक्ट लवकरच प्रेक्षकांच्या भेटीस येत आहे. ‘आई’च्या भावनांवर आधारित वेगळी कथा लवकरच प्रेक्षकांना अनुभवायला मिळणार आहे. ‘आई भाड्याने हवी?’ असे या चित्रपटाचे नाव आहे.

• केदार शिंदे यांचा नवा चित्रपट
• ‘आई भाड्याने हवी?’ आगामी चित्रपटाची घोषणा
• लेकीसोबत घेऊन येणार नवा चित्रपट

 

मराठी चित्रपटसृष्टीत स्त्रीप्रधान आणि कुटुंबप्रधान विषयांना वेगळी ओळख देणारे दिग्दर्शक केदार शिंदे आता पुन्हा एकदा प्रेक्षकांसमोर एका नव्या आणि विचार करायला लावणाऱ्या संकल्पनेसह येत आहेत. ‘अगंबाई…अरेच्चा!’, ‘बाईपण भारी देवा’ आणि ‘अगं अगं सुनबाई! काय म्हणताय सासूबाई?’ या यशस्वी चित्रपटांनंतर त्यांनी आपल्या आगामी ‘आई भाड्याने हवी?’ या चित्रपटाची घोषणा केली आहे. या वेगळ्या आणि लक्षवेधी शीर्षकामुळेच चित्रपटाबद्दलची उत्सुकता सध्या शिगेला पोहोचली आहे.

सनफ्लॉवर स्टुडिओ निर्मित या चित्रपटाची कथा आणि लेखन वैशाली शशी नाईक आणि ओंकार वसुंधरा दत्त यांनी केले आहे, तर छायांकन आणि संकलनाची जबाबदारी मयुर संजिवनी हरदास यांनी सांभाळली आहे. विशेष म्हणजे, ‘अगं अगं सुनबाई! काय म्हणताय सासूबाई?’नंतर निर्माती सना शिंदे, दिग्दर्शक केदार शिंदे, लेखिका वैशाली शशी नाईक आणि लेखक ओंकार वसुंधरा दत्त ही यशस्वी टीम पुन्हा एकदा एकत्र येत असल्याने चित्रपटाकडून अपेक्षा आणखी वाढल्या आहेत.

गुढीपाडव्याच्या मुहूर्तावर मराठी अभिनेत्याने सुरू केला ‘हा’ पारंपारिक व्यवसाय, कोकणातल्या ‘या’ अभिनेत्याचे होतय कौतुक

या चित्रपटाबद्दल बोलताना केदार शिंदे म्हणाले की, “स्त्रीप्रधान विषय हाताळणे ही नेहमीच जबाबदारीची आणि आव्हानात्मक गोष्ट असते. जोपर्यंत कथा मनाला भिडत नाही, तोपर्यंत अशा चित्रपटाची सुरुवात करायची नाही, असा माझा ठाम निर्धार आहे. ‘आई भाड्याने हवी?’ हा चित्रपट केवळ मनोरंजन करणारा नाही, तर ‘आई’ या नात्याचा गाभा मांडणारा आणि मनाला स्पर्श करून जाणारा अनुभव आहे.” त्यांनी पुढे सांगितले की, या चित्रपटात राजकुमार हिरानी यांच्या शैलीची हलकीशी झलक पाहायला मिळेल, जिथे मनोरंजनासोबतच एक प्रभावी संदेशही दिला जातो.

तसेच निर्माती सना शिंदेने चित्रपटाबद्दल बोलताना सांगितले की, “पहिल्या चित्रपटाला प्रेक्षकांनी दिलेल्या प्रेमामुळे या नव्या चित्रपटाबद्दलही प्रचंड उत्सुकता आहे. ‘आई भाड्याने हवी?’ हा पूर्णपणे मनोरंजनप्रधान, रंगतदार आणि मल्टीस्टारर चित्रपट असेल. यात नातेसंबंध, भावना आणि विनोद यांचा सुंदर संगम अनुभवायला मिळेल.”

‘आई भाड्याने हवी?’ या शीर्षकातूनच आजच्या बदलत्या कुटुंबव्यवस्थेतील भावनिक वास्तव अधोरेखित होतं. ‘आई’ या नात्याची गरज, तिची उणीव आणि त्यामागील भावनिक पोकळी यावर हा चित्रपट हलक्याफुलक्या पण प्रभावी पद्धतीने भाष्य करणार आहे. आधुनिक जीवनशैलीत बदलत चाललेल्या नातेसंबंधांच्या पार्श्वभूमीवर हा विषय प्रेक्षकांच्या मनाला भिडणारा ठरण्याची शक्यता आहे.

‘राजा शिवाजी’ टीझरला प्रेक्षकांची पसंती; Riteish Deshmukh चा शिवराय अवतार पाहून प्रेक्षक भावूक

एकीकडे धमाल, हसवणूक आणि मनोरंजन, तर दुसरीकडे अंतर्मुख करणारा आशय या दुहेरी ताकदीमुळे ‘आई भाड्याने हवी?’ हा चित्रपट प्रेक्षकांसाठी एक वेगळाच सिनेमॅटिक अनुभव ठरणार आहे. सध्या चित्रपटासाठी कलाकारांची निवड सुरू असून, विविध वयोगटातील ‘आई’ प्रेक्षकांना पाहायला मिळणार आहेत. जून-जुलैमध्ये चित्रपटाच्या चित्रीकरणाला सुरुवात होणार आहे. आता या वेगळ्या संकल्पनेतून ‘आई’च्या शोधाची कथा नेमकी कशी उलगडते, हे पाहण्यासाठी प्रेक्षक निश्चितच उत्सुक आहेत.