(फोटो सौजन्य- इन्स्टाग्राम)
अभिनेत्री सई मांजरेकर तिच्या ‘द इंडिया हाऊस’ या पॅन-इंडिया चित्रपटाबद्दल खूप उत्साहित आहे. १९०५ सालच्या प्रेम आणि क्रांतीच्या पार्श्वभूमीवर आधारित असलेल्या या चित्रपटात सई सतीची भूमिका साकारणार आहे. चित्रपटाबद्दल बोलताना सई म्हणते की, ऐतिहासिक चित्रपटात काम करण्याचे तिचे स्वप्न होते, जे या चित्रपटाद्वारे पूर्ण होत आहे.
चित्रपटाबद्दल ‘द टाइम्स ऑफ इंडिया’शी बोलताना अभिनेत्री म्हणाली, “ऐतिहासिक चित्रपटात काम करणे हे माझे नेहमीच स्वप्न होते. मला अभिनेत्री व्हायचे आहे हे कळल्यापासून, मला ऐतिहासिक चित्रपटात काम करण्याची इच्छा होती. त्यामुळे, हे माझ्यासाठी स्वप्नपूर्तीसारखे आहे. ‘द इंडिया हाऊस’चा भाग असणे हा एक खूप खास आणि अद्भुत अनुभव आहे. जेव्हा मी पहिल्यांदा कथा ऐकली, तेव्हाच मला कळले की हा केवळ एक चित्रपट नाही, तर भावना, इतिहास आणि उद्देश यांना सामावून घेणारी एक कथा आहे.”
आपल्या भूमिकेबद्दल बोलताना अभिनेत्री म्हणाली, “माझं पात्र सती आहे आणि ही एक सुंदर भूमिका आहे. ती दृढनिश्चयी असूनही प्रेमळ आणि दयाळू आहे. स्वतःमध्ये हा समतोल साधणे हा एक खरोखरच अविस्मरणीय अनुभव होता.”
“मला आठवतंय, मी अनेकदा सीनच्या मध्येच ‘कृपया’ किंवा ‘धन्यवाद’ असे शब्द उच्चारायचे, जे आपण इतर प्रकारच्या चित्रपटांमध्ये सहज वापरतो. मग मी माफी मागून तो सीन पुन्हा शूट करायचे. त्या काळाबद्दल जाणून घेणे आणि लोकांची जीवनशैली, पोशाख आणि बोलण्याच्या पद्धती समजून घेणे हा एक रंजक अनुभव होता. इतका समृद्ध इतिहास असलेल्या हंपीसारख्या ठिकाणी शूटिंग केल्याने मला खूप काही शिकायला मिळालं.”
चित्रपटाच्या टीमसोबत काम करण्याच्या अनुभवाबद्दल बोलताना साई म्हणाली, “राम चरणच्या पहिल्या निर्मितीमध्ये काम करणे खरोखरच अनमोल आहे. तो दाक्षिणात्य चित्रपटसृष्टीतील सर्वात मोठ्या स्टार्सपैकी एक आहे. सिनेमा आणि त्यात सहभागी असलेल्या प्रत्येकाप्रती असलेला त्याचा आदर या चित्रपटाच्या प्रत्येक पैलूमध्ये दिसून येतो.
निखिल सिद्धार्थ आणि अनुपम खेर यांच्यासोबत स्क्रीन शेअर करणे हा एक मोठा शिकण्याचा अनुभव होता. अशा प्रतिभावान कलाकारांसोबत सेटवर असणे तुम्हाला दररोज सर्वोत्तम कामगिरी करण्यासाठी प्रेरणा देते. प्रेम, क्रांती आणि भारताच्या आत्म्याचा उत्सव साजरा करणाऱ्या चित्रपटाचा भाग होण्याची संधी मिळाल्याबद्दल मी स्वतःला भाग्यवान समजते.”
