(फोटो सौजन्य - इन्स्टाग्राम)
मराठी चित्रपटसृष्टीतील लोकप्रिय कॉमेडी अभिनेते भाऊ कदम यांची मुलगी मृण्मयी कदम सध्या सोशल मीडियावर जोरदार चर्चेत आली आहे. तिचा एक व्हिडिओ इंटरनेटवर मोठ्या प्रमाणात व्हायरल होत असून, त्यामध्ये तिने आपल्या लग्नाबाबत पसरत असलेल्या अफवांवर थेट भाष्य केले आहे.
गेल्या काही दिवसांपासून सोशल मीडियावर भाऊ कदम यांचा एक फोटो व्हायरल होत होता. त्या फोटोसोबत “मृण्मयीच्या लग्नात भाऊ कदम झाले भावुक, संघर्षाचे दिवस आठवून उपस्थितींच्या डोळ्यात आले पाणी” असे कॅप्शन देण्यात आले होते. या पोस्टमुळे मृण्मयीचे लग्न झाल्याची चर्चा जोर धरू लागली. मात्र, या सर्व अफवांना मृण्मयीने स्वतः पुढे येत पूर्णविराम दिला आहे.
मृण्मयीने सोशल मीडियावर शेअर केलेल्या व्हिडिओमध्ये या बातमीवर नाराजी व्यक्त करत स्पष्ट शब्दांत प्रतिक्रिया दिली. ती म्हणाली, “माझ्या लग्नात मला बोलावलंच नाही आहे, हे काही बरोबर नाही आहे. मी सध्या अमेरिकेत आहे आणि मलाच माहिती नाही की माझं लग्न झालं आहे.” तिच्या या वक्तव्यामुळे सोशल मीडियावर हशा पिकला असला, तरी तिने मीडियाच्या गैरजबाबदार वृत्तांकनावर बोट ठेवले आहे.
View this post on Instagram
पुढे ती म्हणाली, “एंगेजमेंटपर्यंत तरी लिहायचं, डायरेक्ट मॅरीड का करायचं?” असा सवाल करत तिने या बातम्यांमागील निष्काळजीपणावर टीका केली. मृण्मयीने मीडियाला फटकारत सांगितले की, “काम करताय तर व्यवस्थित करा, स्वतःचं काम तरी नीट करा.” असे तिने म्हटले आहे. या संपूर्ण प्रकारामुळे सोशल मीडियावर फेक न्यूज कशी पसरते आणि त्याचा संबंधित व्यक्तींवर काय परिणाम होतो, याबाबत पुन्हा एकदा चर्चा सुरू झाली आहे. सेलिब्रिटींच्या वैयक्तिक आयुष्याबद्दल कोणतीही माहिती शेअर करताना ती खात्रीशीर असणे किती महत्त्वाचे आहे, हेही या घटनेतून स्पष्ट झाले.
Bewaras: दिवंगत विक्रम गोखलेयांचा अखेरचा चित्रपट ‘बेवारस’ लवकरच प्रेक्षकांच्या भेटीस!
दरम्यान, मृण्मयी कदमचा हा व्हिडिओ सध्या सोशल मीडियावर मोठ्या प्रमाणात शेअर केला जात असून, अनेकजण तिच्या स्पष्टवक्तेपणाचे कौतुक करत आहेत. काहींनी मीडियाच्या या चुकीच्या वृत्तांकनावर टीका केली आहे, तर काहींनी या प्रकाराकडे विनोदी दृष्टीनेही पाहिले आहे. एकूणच, या घटनेतून एक गोष्ट स्पष्ट झाली आहे, सोशल मीडियाच्या युगात कोणतीही बातमी व्हायरल होण्यास वेळ लागत नाही, पण तिची सत्यता तपासणे तेवढेच आवश्यक आहे.
