ajay baraskar on jarange patil
मनोज जरांगे पाटील आणि राधाकृष्ण विखे पाटील यांच्यावर अजय बारस्कर यांनी गंभीर आरोप केले आहेत. मुंबईत बुधवारी झालेल्या पत्रकार परिषदेत बारस्कर यांनी जरांगे यांच्यावर कंत्राटांपासून ते आर्थिक व्यवहारांपर्यंत अनेक आरोप केले. या आरोपांच्या समर्थनार्थ आपल्याकडे कागदपत्रे असल्याचा दावा करत ती ईडीकडे देणार असल्याचंही त्यांनी सांगितलं.
बारस्कर यांनी मनोज जरांगे यांच्यावर टीका करताना ‘मनोज जरांगे आता संघर्ष योद्धा राहिलेला नाही, तर टेंडर योद्धा बनला आहे’, असा दावा केला. जरांगे यांच्या जवळच्या व्यक्तींच्या माध्यमातून कंत्राटांचं नेटवर्क उभं करण्यात आल्याचा आरोपही त्यांनी केला.
किशोर बलांडे, संजय कटारे, हेमंत उर्फ हणमंत धुमाळ यांच्यासह काही व्यक्तींची नावं घेत बारस्कर यांनी कंत्राटांबाबत गंभीर आरोप केले. हजारो कोटी रुपयांच्या निविदांमध्ये गैरप्रकार झाल्याचा दावा त्यांनी केला.
काही कामांची गरज नसतानाही त्यांची यादी तयार करून प्रशासकीय मान्यता घेण्यात आली, अंदाजपत्रक वाढवण्यात आलं आणि त्यानंतर मोठ्या निविदा काढून त्या मॅनेज करण्यात आल्याचा आरोप बारस्कर यांनी केला.
राधाकृष्ण विखे पाटील यांच्या माध्यमातून माणिक इन्फ्रास्ट्रक्चरला 635 कोटी रुपयांचं काम देण्यात आल्याचा दावा बारस्कर यांनी केला. कमी दरात काम करण्यास तयार असलेल्या कंपन्यांना बाजूला करण्यात आल्याचा आरोपही त्यांनी केला.
तसंच, संबंधित कंपनीला मोठ्या प्रमाणात कामं कशी मिळाली, असा सवाल त्यांनी उपस्थित केला. या कथित व्यवहारांबाबतची कागदपत्रे ईडीकडे सादर करणार असल्याचं बारस्कर यांनी स्पष्ट केलं.
पत्रकार परिषदेत बारस्कर यांनी मनोज जरांगे, किशोर बलांडे आणि इतर काही व्यक्तींमध्ये आर्थिक आणि कंत्राटी संबंध असल्याचे आरोप केले. जरांगे यांच्याकडे असलेल्या काही गाड्यांचा संबंध किशोर बलांडे यांच्याशी असल्याचाही त्यांनी दावा केला.
याशिवाय मनोज जरांगे यांच्यावर वैयक्तिक स्वरूपाचे आरोप करत बारस्कर यांनी त्यांच्या संपत्ती आणि व्यवहारांबाबतही प्रश्न उपस्थित केले. ‘माझ्याकडे कागदपत्रे आहेत आणि मी ती ईडीला देणार आहे,’ असं त्यांनी सांगितलं.
दरम्यान, या पत्रकार परिषदेत करण्यात आलेल्या आरोपांवर मनोज जरांगे पाटील, राधाकृष्ण विखे पाटील यांच्यासह इतर लोक काय प्रत्युत्तर देतात हे पाहणे महत्वाचे ठरणार आहे.
.png "Videos"){kind=small}
