प्रताप सरनाईकांवर टीका करताना भाजप आमदारांची जीभ घसरली; ‘सठिया गये, बूढे हो गये’ म्हणत मेहतांचा टोला
विजय काते, मिरा-भाईंदर: मंत्री प्रताप सरनाईक यांच्यावर टीका करताना भाजप आमदार नरेंद्र मेहता यांनी वादग्रस्त वक्तव्य केल्याने मिरा-भाईंदरच्या राजकीय वर्तुळात नव्या वादाला तोंड फुटले आहे. ‘सठिया गये, बूढे हो गये, त्यांना उपचाराची गरज आहे’, अशी टीका मेहता यांनी केली. त्यांच्या या वक्तव्याचा व्हिडीओ समाजमाध्यमांवर मोठ्या प्रमाणात प्रसारित होत आहे.
मिरा-भाईंदरमधील शिवसेनेचे मंत्री प्रताप सरनाईक आणि भाजप आमदार नरेंद्र मेहता यांच्यात गेल्या काही वर्षांपासून राजकीय संघर्ष सुरू आहे. दोन्ही नेत्यांकडून सातत्याने एकमेकांवर आरोप-प्रत्यारोप केले जात आहेत. मात्र, आता हा राजकीय वाद व्यक्तिगत टीकेपर्यंत पोहोचल्याने स्थानिक राजकारणात वातावरण अधिक तापले आहे.
अनिवासी कामगारांची नावे कराड दक्षिणच्या मतदार यादीत आढळल्यास तीव्र आक्षेप; चौकशीची मागणी
मिरा-भाईंदर महापालिकेच्या सिमेंट काँक्रीट रस्त्यांची थकीत देयके अदा करण्यासाठी महापालिकेची मालमत्ता गहाण ठेवून कर्ज घेण्याचा निर्णय सत्ताधारी भाजपकडून घेतला जात असल्याचा आरोप मंत्री प्रताप सरनाईक यांनी दोन दिवसांपूर्वी केला होता. हा निर्णय खासगी फायद्यासाठी घेतला जात असल्याचा आरोपही त्यांनी आमदार नरेंद्र मेहता यांच्यावर केला होता. या आरोपांमुळे शहरातील राजकीय वातावरण चांगलेच तापले आहे.
सरनाईक यांच्या आरोपांना प्रत्युत्तर देताना आमदार नरेंद्र मेहता यांनी वेगळाच दावा केला. सिमेंट काँक्रीटचे रस्ते उभारण्यासाठी कर्ज घेण्याचा निर्णय प्रशासकीय राजवटीत तत्कालीन आयुक्त दिलीप ढोले आणि मंत्री प्रताप सरनाईक यांनीच घेतला होता, असा दावा मेहता यांनी केला. या निर्णयामुळेच महापालिका आर्थिक संकटात सापडल्याचेही त्यांनी म्हटले.
यावेळी सरनाईक यांच्यावर वैयक्तिक स्वरूपाची टीका करताना मेहता यांनी, ‘सरनाईक यांना आता या निर्णयाचा विसर पडला आहे. सठिया गये, बूढे हो गये,’ अशी टिप्पणी केली. तसेच सरनाईक यांच्याकडे सध्या विषयाची अर्धवट माहिती असल्याचा दावा करत, त्यांना विसर पडत असल्याने चांगल्या डॉक्टरांकडून उपचार करून घेण्याचा सल्लाही मेहता यांनी दिला.
मेहता यांच्या या वक्तव्यामुळे दोन्ही नेत्यांमधील राजकीय संघर्षाला आता वैयक्तिक टीकेची किनार मिळाली असून, या वक्तव्यावर शिवसेनेकडून काय प्रतिक्रिया दिली जाते, याकडे राजकीय वर्तुळाचे लक्ष लागले आहे.
.png "Videos"){kind=small}
