शेवटच्या निर्णायक क्षणी सुनेत्रा पवारांचा राजकीय डाव; बारामतीसाठी सुनेत्रा पवारांचा थेट काँग्रेस प्रदेशाध्यांना फोन

अजित पवारांच्या निधनामुळे पोटनिवडणूक जाहीर झाली असून ही बिनविरोध व्हावी असे प्रयत्न महायुतीकडून सुरु आहे. यासाठी सुनेत्रा पवार यांनी हर्षवर्धन सपकाळ यांच्याशी फोनवर चर्चा केली.

• बारामती पोटनिवडणुकीवरुन राजकारण सुरु
• DCM सुनेत्रा पवार यांचा काँग्रेस प्रदेशाध्यक्ष हर्षवर्धन सपकाळांना फोन
• बारामतीमध्ये काँग्रेस माघार घेणार का?

Sunetra Pawar call Harshavardhan Sapkal : बारामती : दिवंगत नेते अजित पवार यांच्या निधनामुळे बारामती विधानसभा मतदारसंघाची पोटनिवडणूक जाहीर झाली आहे. अजित पवारांनंतर (Ajit Pawar) बारामतीचा दादा कोण होणार याची चर्चा राजकीय वर्तुळामध्ये रंगली आहे. या जागेवर उमेदवार देण्याबाबत महाविकास आघाडीमध्ये मतभेद झाले आहेत. शरद पवार गटाने उमेदवार देणार नसल्याचे जाहीर केले आहे. मात्र काँग्रेस पक्ष ही जागा लढवण्यास उत्सुक आहे. याच पार्श्वभूमीवर बारामतीची पोटनिवडणूक बिनविरोध व्हावी म्हणून उपमुख्यमंत्री सुनेत्रा पवार (Sunetra Pawar) यांनी काँग्रेस प्रदेशाध्यक्ष हर्षवर्धन सपकाळ यांना स्वतः फोन केला.

अजित पवारांच्या निधनामुळे पोटनिवडणूक जाहीर झाली असून ही बिनविरोध व्हावी असे प्रयत्न महायुतीकडून सुरु आहे. घरातील व्यक्त वारल्यामुळे शरद पवार गटाने या जागी उमेदवार न देण्याचा निर्णय घेतला आहे. मात्र त्यांच्या या भूमिकेला महाविकास आघाडीमधून विरोध झाला. काँग्रेस प्रदेशाध्यक्ष हर्षवर्धन सपकाळ यांनी बारामती पोटनिवडणूकीमध्ये उमेदवार देण्याचे निश्चित असल्याचे सांगितले. ठाकरे गटाने देखील अप्रत्यक्षपणे या भूमिका होकार दिला. यामुळे बारामतीच्या पोटनिवडणुकीकडे सर्वांचे लक्ष लागले. याच पार्श्वभूमीवर दिवंगत नेते अजित पवारांच्या पत्नी आणि उपमुख्यमंत्री सुनेत्रा पवार यांनी थेट हर्षवर्धन सपकाळ यांच्याशी फोनवर चर्चा केली.

हे देखील वाचा : हिमंत बिस्वा सरमा देशातील सर्वात भ्रष्टाचारी मुख्यमंत्री; आसाममधून राहुल गांधींचा आक्रमक पवित्रा

मीडिया रिपोर्टनुसार, सुनेत्रा पवार आणि हर्षवर्धन सपकाळ यांच्यात फोनवर चर्चा झाली आहे. मात्र दोन्ही नेत्यांमध्ये नेमके काय बोलणे झाले, याची माहिती समोर आलेली नाही. या फोनचा उद्देश बारामती पोटनिवडणूक असल्याची दाट शक्यता आहे. बारामतीच्या पोटनिवडणुकीत काँग्रेसने उमेदवार उतरवू नये आणि आपल्याला पाठिंबा द्यावा, अशी विनंती सुनेत्रा पवार यांनी केली असू शकते. आजपर्यंत तरी काँग्रेस पक्ष बारामतीची पोटनिवडणूक लढण्यावर ठाम होता. मात्र, आता सुनेत्रा पवार यांनी स्वत: हर्षवर्धन सपकाळ यांना फोन केल्याने काँग्रेसच्या या भूमिकेत बदल होणार का, याकडे सगळ्यांच्या नजरा लागल्या आहेत.

हे देखील वाचा : दोन दिवसाच्या अवकाळीने पुणं तुंबलं! खरं कारण काय? आदित्य ठाकरेंनी केला पर्दाफाश