शुक्रवार, 7 ऑगस्ट 2026
उपमुख्यमंत्री सुनेत्रा पवारांच्या प्रेसमध्ये धनंजय मुंडेही बोलले; सुनील तटकरेंनी म्हटले, 'आमदारांची लुडबूड...'
मुंबई : बीडमध्ये उपमुख्यमंत्री तथा पालकमंत्री सुनेत्रा पवार यांच्या पत्रकार परिषदेत आमदार धनंजय मुंडे यांनी हस्तक्षेप केल्याची चर्चा सुरु होती. या चर्चेनंतर राष्ट्रवादी काँग्रेसचे प्रदेशाध्यक्ष सुनील तटकरे यांनी मर्यादा पाळण्याचा संदेश दिला. पालकमंत्र्यांच्या पत्रकार परिषदेत संबंधित जिल्ह्यातील आमदार उपस्थित राहू शकतात. मात्र, स्वतःहून पुढाकार घेऊन त्यांनी बोलणे योग्य नसल्याचे मत त्यांनी व्यक्त केले.
सुनील तटकरे म्हणाले की, पत्रकार परिषद ही संबंधित मंत्री किंवा प्रमुख व्यक्तीची असते. अशावेळी इतरांनी बाजूला बसून उपस्थित राहणे योग्य असले, तरी संवादाची जबाबदारी मुख्य व्यक्तीकडेच असावी. हा संकेत सर्वांनी पाळला पाहिजे. पक्षाचे सहकारी यापुढे अशा प्रसंगी आवश्यक त्या मर्यादा पाळतील, अशी अपेक्षाही त्यांनी व्यक्त केली. यावेळी त्यांनी स्वतःचा अनुभव सांगत, चंद्रशेखर बावनकुळे माझ्या जिल्ह्यात आले होते. त्यावेळी मी पत्रकार परिषदेत उपस्थित होतो, मात्र बोललो नाही. कारण ती पत्रकार परिषद त्यांची होती, असे नमूद केले.
सुनेत्रा पवारांवरील काँग्रेसच्या पोस्टचा निषेध
सुनेत्रा पवारांवरील काँग्रेसच्या पोस्टचा मी तीव्र निषेध करतो. अजित पवारांच्या अकाली निधनानंतर पक्षभेद बाजूला ठेवून राज्यभर त्यांची प्रथम जयंती झाली. त्यानंतर वहिनी ज्या पद्धतीने काम करत आहेत, ते पाहून काँग्रेसच्या भवितव्याची चिंता असणारी मंडळी अशा प्रकारच्या टीका-टिप्पण्या करत आहे. परंतु काँग्रेसने यात वैचारिक दिवाळखोरी दाखवली. केवळ दिलगिरी व्यक्त करून विषय संपत नाही. सार्वजनिक जीवनात काय बोलायचे याचे भान असावे लागते. दुर्दैवाने काँग्रेसच्या राज्य नेतृत्वाला ते राहिलेले दिसत नसल्याची टीकाही तटकरे यांनी केली.
बीडबाबत माहिती घेईन, सुनेत्रांवर पक्षात विश्वास
बीडमधील घटनेची पार्श्वभूमी समजून घेणे आवश्यक असले, तरी माझी धनंजय मुंडे यांच्याशी अद्याप चर्चा झालेली नाही. त्यामुळे नेमके काय घडले, याची माहिती घेईन. तसेच सुनेत्रा पवार या पक्षाच्या राष्ट्रीय अध्यक्षा असून, कोणत्याही विषयावर त्या माध्यमांसमोर प्रभावीपणे भूमिका मांडू शकतात, असा विश्वास पक्षातील सर्व सहकाऱ्यांना असल्याचे तटकरे म्हणाले.
