पुण्यातील भाजप पदाधिकाऱ्यांमधील मतभेद होणार दूर? केंद्रीय राज्यमंत्री मुरलीधर मोहोळ करणार मध्यस्थी

महापालिकेच्या सर्वसाधारण सभेपूर्वीच नगरसेवकांची ही बैठक होणार आहे. त्यामुळे बैठकीत नगरसेवकांना कोणत्या सूचना दिल्या जातात, अंतर्गत मतभेदांवर काय चर्चा होते, निधी आणि सभागृहातील तक्रारींवर तोडगा काढला जातो का, याकडे लक्ष लागले आहे.

पुणे : महापालिकेतील सत्ताधारी भाजप पदाधिकाऱ्यांमधील मतभेद दूर करण्यासाठी केंद्रीय राज्यमंत्री मुरलीधर मोहोळ हे आता मध्यस्थी करणार आहे. मुख्यमंत्री देवेंद्र फडणवीस यांच्याकडे काही नगरसेवकांनी थेट तक्रार केल्यानंतर मोहोळ यांच्याकडे ‘डॅमेज कंट्रोल’ करण्याची जबाबदारी सोपविल्याची चर्चा आहे. आज किंवा गुरुवारी (उद्या) ते पदाधिकारी, नगरसेवकांशी संवाद साधणार असल्याचे समजते. आठ महिन्यांपूर्वी पुणे महापालिकेत एक हाती सत्ता मिळालेल्या भाजपमध्ये गटबाजी फोफावली आहे.

पक्षाच्या महापालिकेतील कारभारावरून अंतर्गत नाराजी दिसून येत आहे. महापालिकेतील प्रमुख पदाधिकाऱ्यांमधील विसंवाद, समन्वयाचा अभाव दिसून येत आहे. तसेच नगरसेवकही उघडपणे नाराजी व्यक्त करत असल्याचे चित्र आहे. महापालिकेच्या मागील सर्वसाधारण सभेतील धोरणात्मक निर्णय, निविदा प्रक्रिया आणि महापालिकेतील विविध कामकाजावरून काही नगरसेवकांनी आक्षेप घेतले आहेत. आपल्या प्रभागासाठी पुरेसा निधी मिळत नाही. सभागृहात आपली भूमिका मांडण्यासाठी पुरेशी संधी मिळत नाही, अशा प्रकारच्या तक्रारी नगरसेवक करत आहे.

Maratha Reservation : ‘एकही मागणी मान्य नाही’; जरांगे पाटलांचा सरकारवर घणाघात, भरत गोगावलेंनाही थेट इशारा

काही विषयांत पदाधिकाऱ्यांमध्ये एकवाक्यता नसल्याचे अनधिकृत ओव्हरहेड केबलच्या प्रस्तावावरून स्पष्ट झाले आहे. अशावेळी मोहोळ यांच्याकडे ‘डॅमेज कंट्रोल’ करण्याची जबाबदारी सोपवण्यात आल्याची चर्चा आहे. मोहोळ यांनी नगरसेवकांशी थेट संवाद साधण्याचा निर्णय घेतला आहे. या बैठकीत नगरसेवकांना महापालिकेचे कामकाज, सभागृहातील भूमिका, प्रशासनाशी समन्वय आणि नगरसेवक म्हणून प्रभावीपणे काम करण्याबाबत मार्गदर्शन केले जाणार असल्याचे सांगितले जात आहे. पक्षाची महापालिकेत एकहाती सत्ता असतानाही अपेक्षित पद्धतीने कारभार होत नसल्याची चर्चा सुरू असल्याने मोहोळ यांची ही बैठक महत्त्वाची मानली जात आहे.

महापालिकेच्या कारभाराबाबत भाजपच्या काही नगरसेवकांनी एकत्र येत मुख्यमंत्री देवेंद्र फडणवीस यांच्याकडे तक्रार केल्याचीही राजकीय वर्तुळात चर्चा आहे. या तक्रारीची मुख्यमंत्र्यांनी दखल घेतल्याचेही बोलले जात आहे. त्यामुळे मोहोळ यांच्या बैठकीला विशेष महत्त्व प्राप्त झाले आहे.

बैठकीत काय कानमंत्र मिळणार?

गुरुवारी होणाऱ्या महापालिकेच्या सर्वसाधारण सभेपूर्वीच नगरसेवकांची ही बैठक होणार आहे. त्यामुळे बैठकीत नगरसेवकांना कोणत्या सूचना दिल्या जातात, अंतर्गत मतभेदांवर काय चर्चा होते, निधी आणि सभागृहातील तक्रारींवर तोडगा काढला जातो का, याकडे लक्ष लागले आहे. भाजपची एकहाती सत्ता, नगरसेवकांची वाढती नाराजी आणि पक्षांतर्गत मतभेदांच्या पार्श्वभूमीवर मुरलीधर मोहोळ यांची ही ‘नगरसेवकांची शाळा’ भाजपसाठी किती प्रभावी ठरते, याकडे पुणे शहर संघटनेचे लक्ष लागले आहे.