Harshvardhan sapkal on Gyanesh Kumar
Harshvardhan Sapkal : मुख्य निवडणूक आयुक्त ज्ञानेश कुमार यांच्या विरोधात काँग्रेस आता चांगलीच आक्रमक झाली आहे. महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी ज्ञानेश कुमार यांच्यावर गंभीर आरोप करत महाराष्ट्रात आल्यास आंदोलनाचा इशारा दिला आहे.
‘ज्ञानेश कुमार महाराष्ट्रात आले तर काँग्रेस कार्यकर्ते त्यांना पाय ठेवू देणार नाहीत. आला तर त्याच्या तोंडाला काळं फासू,’ असा इशारा सपकाळ यांनी दिला. त्यांच्या या वक्तव्यामुळे राज्यातील राजकीय वातावरण तापण्याची शक्यता आहे.
हर्षवर्धन सपकाळ यांनी ज्ञानेश कुमार यांच्यावर निवडणूक प्रक्रियेत पक्षपातीपणे वागत असल्याचा आरोप केला. त्यांच्या म्हणण्यानुसार, मुख्य निवडणूक आयुक्त संविधानिक पदावर असूनही भाजपच्या एजंटप्रमाणे काम करत आहेत.
काँग्रेसकडून मतदार यादीतील बदल, SIR (Special Intensive Revision) आणि मतदारांच्या हक्कांबाबत सातत्याने प्रश्न उपस्थित केले जात आहेत. काँग्रेसने याच मुद्द्यांवर देशभर आंदोलनाची भूमिका घेतली आहे.
ज्ञानेश कुमार यांच्या राजीनाम्याची मागणी देशभरातून होत असल्याचा दावा सपकाळ यांनी केला. राहुल गांधी यांच्या नेतृत्वाखाली विरोधी पक्षातील खासदारांनी निवडणूक आयोगाच्या कार्यालयाकडे मोर्चा काढण्याचा प्रयत्न केला होता. या आंदोलनादरम्यान राहुल गांधी आणि इतर नेत्यांना पोलिसांनी ताब्यात घेतल्याचं वृत्त आहे.
दरम्यान, मुख्य निवडणूक आयुक्त ज्ञानेश कुमार यांचा ७ आणि ८ ऑक्टोबरचा छत्तीसगड दौरा स्थगित करण्यात आला आहे. छत्तीसगडच्या मुख्य निवडणूक अधिकाऱ्यांच्या कार्यालयाने दौरा ‘अपरिहार्य कारणांमुळे’ पुढे ढकलल्याचं सांगितलं असून नवीन तारीख अद्याप जाहीर झालेली नाही.
हर्षवर्धन सपकाळ यांनी फॉर्म ६ मध्ये बेकायदा बदल करण्यात आल्याचा आरोप केला. त्यामुळे १८ वर्ष पूर्ण झालेल्या तरुणांना मतदानाच्या अधिकारापासून वंचित ठेवण्याचा प्रकार झाल्याचा दावा त्यांनी केला.
काँग्रेसने मतदारांच्या हक्कांसाठी आणि निष्पक्ष निवडणूक प्रक्रियेसाठी संघर्ष सुरूच ठेवणार असल्याचं सपकाळ यांनी सांगितलं. दरम्यान, निवडणूक आयोगाच्या SIR प्रक्रियेवर विरोधकांकडून आक्षेप घेतले जात असताना आयोगाकडून मतदार यादीतील पुनरावलोकनाची प्रक्रिया आवश्यक असल्याची भूमिका मांडण्यात आली आहे.
मुंबईसह महाराष्ट्रातही ज्ञानेश कुमार यांच्या विरोधातील राजकीय आंदोलनाला वेग आला आहे. याआधी उद्धव ठाकरे आणि राज ठाकरे यांच्या नेतृत्वाखाली मुंबईतही मुख्य निवडणूक आयुक्तांच्या विरोधात मोर्चा काढण्यात आला होता.
आता हर्षवर्धन सपका यांनी केलेल्या वक्तव्यामुळे राज्यातील राजकीय संघर्ष आणखी तीव्र होण्याची चिन्हं आहेत. ज्ञानेश कुमार आणि निवडणूक अयोग्य यांच्या मुद्द्यावरून काँग्रेस विरुद्ध सत्ताधारी भाजप यांच्यातील संघर्ष आणखीन पेटण्याच्या संभावना आहेत.
.png "Videos"){kind=small}
