Kolhapur Gokul Politics : ‘गोकुळ’ वरून राजकारण तापलं! गोकुळमध्ये चार संचालक का नेमले? फडणवीसांनी अखेर सांगितलं कारण

Kolhapur Gokul Politics : गोकुळ दूध संघात चार संचालक नियुक्त करण्याच्या सरकारच्या निर्णयामुळे कोल्हापूरसह राज्यातील राजकीय वातावरण तापलं आहे. सतेज पाटील यांनी सरकारला घेरलं असतानाच मुख्यमंत्री देवेंद्र फडणवीस यांनी यावर पहिली प्रतिक्रिया दिली आहे.

• गोकुळ दूध संघाच्या राजकारणात नवा ट्विस्ट
• चार संचालकांच्या नियुक्तीवरून वाद
• संचालक नियुक्तीवर फडणवीसांची पहिली प्रतिक्रिया

Kolhapur Gokul Politics : राज्याच्या राजकारणात सध्या ‘गोकुळ‘ चा मुद्दा चांगलाच पेटला आहे. राज्य सरकारने गोकुळवर चार संचालक नेमण्याचा निर्णय घेतल्यानंतर विरोधक मोठ्या प्रमाणात आक्रमक झाले आहेत. आधीच राज्याच्या राजकीय वर्तुळात विविध मुद्द्यांवरून सत्ताधारी आणि विरोधक आपापसांत भिडत आहेत. अश्यातच आता गोकुळच्या मुद्द्यावरून विरोधकांनी रान पेटवलं आहे. आमदार सतेज पाटील या मुद्द्यावरून वारंवार सरकारला घेरत असतानाच आता मुख्यमंत्री देवेंद्र फडणवीस यांनी यावर पहिली प्रतिक्रिया दिली आहे.

गोकुळ दूध संघाच्या निवडणुकीत कोणत्याही गटाला स्पष्ट बहुमत मिळालेलं नाही. त्यामुळे चेअरमन निवडीचा मोठा पेच निर्माण झाला आहे. याच पार्श्वभूमीवर सरकारने चार संचालक नियुक्त करण्याचा निर्णय घेतला. मात्र, या निर्णयामुळे राजकीय वादाला तोंड फुटलं आहे. सूत्रांनी दिलेल्या माहितीनुसार, फडणवीस यांनी पत्रकारांशी अनौपचारिक चर्चा करताना, गोकुळमध्ये संचालक नियुक्त केले नसते तर पुन्हा निवडणूक घ्यावी लागली असती, असं म्हटलं आहे.

‘गोकुळ संचालक नेमले नसते तर पुन्हा निवडणूक घ्यावी लागली असती,’ अशी प्रतिक्रिया देवेंद्र फडणवीसांनी दिली असल्याचे सूत्रांची सांगितले आहे. तसेच त्यांनी यावेळी विरोधी पक्षनेते राहुल गांधी यांच्यावरही निशाणा साधला आहे.

Kolhapur Gokul Politics : वोट चोरीनंतर आता सत्ता चोरी; गोकुळवरून सतेज पाटलांचा सरकारवर घणाघात

१३ जागा जिंकूनही चेअरमन निवडता येईना!

गोकुळ दूध संघाची एकूण सदस्यसंख्या २५ आहे. चेअरमन निवडीसाठी १४ सदस्यांचा कोरम आवश्यक असल्याचं सांगितलं जात आहे. सतेज पाटील यांच्या गटाकडे १३ सदस्य असून महायुतीकडे १२ सदस्य आहेत. मात्र, आवश्यक संख्याबळ नसल्याने चेअरमन निवडीच्या बैठकीत अडचणी निर्माण झाल्या. बैठकीला पुरेसे सदस्य उपस्थित नसल्याने निवडीची प्रक्रिया रखडली.

सरकारच्या म्हणण्यानुसार, हा पेच कायम राहिला असता तर पुढे निवडणूक किंवा प्रशासक नियुक्तीची वेळ येऊ शकली असती. त्यामुळे चार संचालक नियुक्त करण्याचा निर्णय घेण्यात आला. हा निर्णय ॲडव्होकेट जनरल यांचं मत विचारात घेऊनच घेतल्याचंही फडणवीस यांनी स्पष्ट केल्याचं सूत्रांचं म्हणणं आहे.

राहुल गांधींच्या ट्विटवरूनही फडणवीसांचा निशाणा

दरम्यान, राहुल गांधी यांनी गोकुळच्या निवडणुकीवरून सोशल मीडियावर व्होट चोरीचा आरोप केला होता. यावरही फडणवीस यांनी नाराजी व्यक्त केल्याची माहिती आहे. गोकुळमध्ये साडेचार हजार मतदार असताना राहुल गांधींनी या मुद्द्यावर ट्विट करणं म्हणजे हा विषय किती छोटा आहे, असं सांगत त्यांनी राहुल गांधींवर टीका केल्याचं समजतं.

सरकारचा निर्णय कायदेशीर आहे की नाही, यावरून आता राजकीय संघर्ष आणखी वाढण्याची शक्यता आहे. निवडणुकीतून बहुमत मिळवता आलं नाही म्हणून सरकार नियुक्त्यांच्या माध्यमातून गोकुळवर ताबा मिळवण्याचा प्रयत्न करत असल्याचा आरोप विरोधकांनी केला आहे.

त्यामुळे गोकुळचा चेअरमन कोण होणार, सरकारचा निर्णय टिकणार का आणि सतेज पाटील या प्रकरणात पुढे कोणती भूमिका घेणार, याकडे आता संपूर्ण राज्याचं लक्ष लागलं आहे.

Gokul President Election 2026: गोकुळ अध्यक्षपदाचे राजकीय गणित बदलणार! हसन मुश्रीफांचे सुचक विधान