Nitesh Rane : एप्रिल-मे महिन्यात उद्धव किंवा आदित्य ठाकरे जेलमध्ये असतील! नितेश राणेंच्या विधानाने राजकीय वर्तुळात खळबळ

Nitesh Rane : एकनाथ शिंदे आणि उद्धव ठाकरे एकत्र येऊ शकतात, या चर्चेवर नितेश राणेंनी प्रतिक्रिया दिली आहे. दरम्यान, एप्रिल-मे महिन्यात उद्धव ठाकरे किंवा आदित्य ठाकरे जेलमध्ये असतील, असा दावा करत त्यांनी राजकीय वर्तुळात नव्या चर्चेला तोंड फोडलं आहे.

• उद्धव आणि एकनाथ शिंदे एकत्र येणार? नितेश राणेंनी दिली प्रतिक्रिया
• एप्रिल-मे महिन्यात ठाकरे पिता-पुत्र जेलमध्ये असतील, राणेंचा दावा
• संजय राऊतांच्या भाकितांवर नितेश राणेंचा खोचक टोला

Nitesh Rane : महाराष्ट्राच्या राजकारणात ठाकरे बंधू आणि शिंदे गट पुन्हा एकत्र येणार का? यावरून सध्या राजकीय चर्चांना उधाण आलं आहे. अशातच शिवसेना (शिंदे गट) नेते रवींद्र धंगेकर यांनी राज्याच्या हितासाठी एकनाथ शिंदे आणि उद्धव ठाकरे एकत्र येऊ शकतात, असं वक्तव्य केलं. त्यांच्या या विधानावर आता भाजप नेते आणि मंत्री नितेश राणे यांनी प्रतिक्रिया दिली आहे. त्याचवेळी उद्धव ठाकरे आणि आदित्य ठाकरे यांच्याबाबत केलेल्या एका दाव्याने राजकीय वातावरण आणखी तापलं आहे.

उद्धव आणि एकनाथ शिंदे एकत्र येणार? नितेश राणेंनी दिली प्रतिक्रिया

रवींद्र धंगेकर यांच्या वक्तव्याबाबत विचारलं असता नितेश राणे म्हणाले, “आमच्या वरिष्ठांनी नोंद घेतली असून, ते निर्णय घेणार आहेत, आम्ही त्याची वाट पाहू.” त्यामुळे शिंदे आणि ठाकरे गट एकत्र येण्याच्या चर्चेला आता वेगळंच वळण मिळालं आहे.

BJP PM Candidate: 2029 मध्ये पंतप्रधानपदाचा उमेदवार कोण? मोदी, योगी की…; अमित शाहा यांनी स्पष्टच सांगितलं

मात्र, याचवेळी राणे यांनी एप्रिल-मे महिन्याबाबत मोठा दावा केला. “एप्रिल, मे मध्ये उद्धव ठाकरे किंवा आदित्य ठाकरे हे जेलमध्ये असतील,” असं ते म्हणाले. त्यांच्या या वक्तव्यामुळे राजकीय वर्तुळात चर्चांना सुरुवात झाली आहे.

संजय राऊतांच्या भाकितांवर नितेश राणेंचा टोला

संजय राऊत यांच्या विधानांवरही राणेंनी निशाणा साधला. “संजय राऊत यांची आतापर्यंत कुठली भाकित खरी ठरलेली नाहीत.” पुढे ते म्हणाले, “आमचं नरेंद्र मोदींचं सरकार अजून भक्कम होणार आहे. कारण, २०२९ ला मोठ्या मतांनी आणि मोठ्या ताकदीने निवडून येईल.”

तसेच, “कदाचित स्वतःच्या मालकाची तारीख एप्रिल महिन्यात ठरवली असेल,” असा टोलाही त्यांनी राऊतांना लगावला.

उद्धव ठाकरे फोटोग्राफी करत राहिले असते तर…, राणेंची टीका

उद्धव ठाकरे यांच्यावर टीका करताना राणे म्हणाले, “उद्धव ठाकरे फोटोग्राफी करत राहिले असते तर खूप गोष्टी टाळल्या असत्या, हिंदूहृदयसम्राट बाळासाहेब ठाकरे यांच्या पक्षाला गालबोट लागून नसतं.”

याशिवाय राज ठाकरेंना कधीही नाराज केलं नसल्याचं सांगत, “२०२९ पर्यंत देवेंद्र फडणवीसंच मुख्यमंत्री राहतील. देवेंद्र फडणवीस महाराष्ट्राचा अभिमान आणि स्वाभिमान आहेत,” असंही त्यांनी म्हटलं.

मुख्यमंत्र्यांच्या विधानानंतर ठाकरे बंधूंची चर्चा

दरम्यान, मुंबईत प्रशांत कुलकर्णी संपादित ‘महाराष्ट्राच्या हास्यरेषा’ या पुस्तकाच्या प्रकाशन सोहळ्यात मुख्यमंत्री देवेंद्र फडणवीस, उद्धव ठाकरे आणि राज ठाकरे एकाच मंचावर आले होते.

यावेळी फडणवीस यांनी राज ठाकरे यांना चांगले व्यंगचित्रकार, उद्धव ठाकरे यांना चांगले छायाचित्रकार आणि स्वतःला चांगला राजकारणी म्हणत मिश्किल टोला लगावला होता.

या कार्यक्रमानंतर ठाकरे बंधूंच्या राजकीय भूमिकेबाबत चर्चा सुरू झाली असून, आता नितेश राणेंच्या विधानामुळे या चर्चेला आणखी रंग चढला आहे.

Harshvardhan Sapkal : वाढवण बंदरावरून महाराष्ट्रात संघर्ष पेटणार? हर्षवर्धन सपकाळ यांचा सरकारला स्पष्ट इशारा