महायुतीत पुन्हा खदखद? ‘आम्ही बंडखोरीचे बादशाह’ म्हणत उमेदवारीसाठी ‘बंडखोरी’चा इशारा

पुणे शिक्षक मतदारसंघाच्या निवडणुकीच्या पार्श्वभूमीवर मंगेश चिवटेंच्या उमेदवारीचा मुद्दा चर्चेत आला आहे. बच्चू कडूंनी चिवटेंना पाठिंबा देताना गरज पडल्यास बंडखोरीचा सूचक इशारा दिला आहे.

• मंगेश चिवटे पुणे शिक्षक मतदारसंघातून इच्छुक असल्याचे सांगितले जात आहे.
• बच्चू कडूंनी चिवटेंच्या उमेदवारीला पाठिंबा देत बंडखोरीचा सूचक इशारा दिला.
• पुणे विभागातील शिक्षक आणि पदवीधर मतदारसंघांसाठी २३ ऑक्टोबरला मतदान होणार आहे. 

 

मुंबई : महाराष्ट्र विधान परिषदेच्या शिक्षक आणि पदवीधर मतदारसंघांच्या निवडणुकीचा कार्यक्रम जाहीर झाला असून पुणे विभागातील दोन्ही मतदारसंघांवर राजकीय हालचालींना वेग आला आहे. पुणे विभाग शिक्षक आणि पदवीधर मतदारसंघासाठी २३ ऑक्टोबर २०२६ रोजी मतदान होणार आहे.

पुणे शिक्षक मतदारसंघातून मंगेश चिवटे हे उमेदवारीसाठी इच्छुक असल्याचे सांगितले जात आहे. या पार्श्वभूमीवर त्यांनी केंद्रीय गृहमंत्री अमित शाह यांची भेट घेतल्याचेही या वृत्तात नमूद करण्यात आले आहे. दुसरीकडे भाजपकडूनही पुणे विभागातील मतदारसंघांवर दावा केला जात असल्याने महायुतीमध्ये उमेदवारीचा प्रश्न चर्चेत आला आहे.

महायुती म्हणून एकत्र निवडणूक लढवण्याचा प्रयत्न असल्याचे सांगितले जात असतानाच, भाजपचे मंत्री जयकुमार गोरे यांनी वेळ पडल्यास भाजपच्या चिन्हावर दोन्ही मतदारसंघांत निवडणूक लढवण्याचे संकेत दिले होते. त्यामुळे जागावाटपावरून महायुतीतील घटक पक्षांमध्ये मतभेद होण्याची शक्यता व्यक्त केली जात आहे.

Ramdas Aathvale : निवडणूक आयोग स्वतंत्र संस्था, एसआयआर वादावर रामदास आठवले थेटच बोलले

मंगेश चिवटेंच्या उमेदवारीसाठी बच्चू कडू आक्रमक

दरम्यान, या पार्श्वभूमीवर बच्चू कडू यांनी मंगेश चिवटे यांच्या संभाव्य उमेदवारीबाबत सूचक विधान केले आहे. अमरावतीतील आरोग्य शिबिरात बोलताना त्यांनी चिवटेंनी रुग्णसेवेत दाखवलेल्या कामाचा उल्लेख केला.

“मंगेश चिवटे यांनी रुग्णसेवेमध्ये जो चिवटपणा दाखवला, त्यामुळे येत्या निवडणुकीमध्ये ते आमदार झाल्याशिवाय राहणार नाहीत,” असे बच्चू कडू म्हणाल्याचे सांगितले जात आहे.

तसेच मंगेश चिवटेंना पाठिंबा दिला गेला नाही आणि बंडखोरी करण्याची वेळ आली, तर “आम्ही बंडखोरीचे बादशाह आहोत,” असा सूचक इशाराही त्यांनी दिला. चांगल्या व्यक्तीच्या मागे आपण उभे राहतो आणि नेत्यांचा विरोध असला तरी त्याची पर्वा करत नाही, असेही कडू यांनी म्हटले.

महायुतीत उमेदवारीचा तिढा?

पुणे विभागातील शिक्षक आणि पदवीधर मतदारसंघांच्या निवडणुकीसाठी महायुतीतील घटक पक्षांकडून उमेदवारांबाबत चर्चा सुरू आहे. निवडणूक आयोगाने पुणे पदवीधर, पुणे शिक्षक यांच्यासह महाराष्ट्रातील पाच विधान परिषद मतदारसंघांच्या निवडणुकीचा कार्यक्रम जाहीर केला आहे. २३ ऑक्टोबरला मतदान, तर २७ ऑक्टोबरला मतमोजणी होणार आहे.

त्यामुळे पुणे शिक्षक मतदारसंघासाठी उमेदवारी कोणाला मिळणार आणि महायुतीतील घटक पक्ष एकत्रितपणे निवडणूक लढवणार की स्वतंत्र भूमिका घेणार, याकडे आता राजकीय वर्तुळाचे लक्ष लागले आहे.

राज ठाकरे-उद्धव ठाकरे पुन्हा एकत्र! 4 ऑक्टोबरला मुंबईत मोठा जनमोर्चा; SIR विरोधात रणशिंग