अखेर रुपाली चाकणकर यांचा राजीनामा; पायउतार होताच केलं मोठं विधान, म्हणाल्या…

रुपाली चाकणकर यांनी शुक्रवारी मुख्यमंत्री फडणवीस यांची वर्षा या निवासस्थानी भेट घेतली. चाकणकरांनी तत्काळ राजीनामा द्यावा, असा आदेश मुख्यमंत्र्यांनी दिल्याचे वृत्त समोर आले होते.

मुंबई : नाशिक येथील भोंदूबाबा अशोक खरात प्रकरणाशी संबंध आल्याने राज्य महिला आयोगाच्या अध्यक्षा रुपाली चाकणकर यांच्यावर विरोधकांकडून टीका केली जात होती. याप्रकरणावर मुख्यमंत्री देवेंद्र फडणवीस यांनीदेखील नाराजी व्यक्त केली होती. मुख्यमंत्र्यांच्या नाराजीनंतर चाकणकर यांनी आपल्या पदाचा राजीनामा दिला आहे.

रुपाली चाकणकर यांनी शुक्रवारी मुख्यमंत्री फडणवीस यांची वर्षा या निवासस्थानी भेट घेतली. चाकणकरांनी तत्काळ राजीनामा द्यावा, असा आदेश मुख्यमंत्र्यांनी दिल्याचे वृत्त समोर आले होते. यानंतर काही तासांतच त्यांनी राजीनामा दिला. खरात प्रकरणात रूपाली चाकणकर पूर्णपणे अडकल्या होत्या. खरातच्या मंडळीत चाकणकर प्रमुख होत्या, असा आरोप विरोधी पक्षांनी केला. त्यांचे तांत्रिकासोबतचे फोटो व्हायरल झाल्याने त्यांच्या राजीनाम्याची मागणी जोर धरत होती.

दरम्यान, राष्ट्रवादीचे ज्येष्ठ नेते प्रफुल्ल पटेल यांनीही या प्रकरणाला गंभीर संबोधले असून, दोषींवर कारवाई करण्याचे संकेत दिले होते. तर प्रदेशाध्यक्ष सुनील तटकरे यांनी या विषयावर बोलणे टाळले. वाढता दबाव पाहता रूपाली चाकणकर यांनी उपमुख्यमंत्री सुनेत्रा पवार यांची भेट घेऊन आपली बाजू मांडली व त्यांना आपला राजीनामा सोपविला.

निष्पक्ष चौकशीसाठीच राजीनामा

खरात प्रकरणाची निष्पक्ष चौकशी झालीच पाहिजे ही माझी आधीपासूनचीच भूमिका आहे. या प्रकरणाचा निष्पक्ष तपास व्हावा, यासाठी मी राज्य महिला आयोगाच्या अध्यक्षपदाचा राजीनामा आमच्या नेत्या उपमुख्यमंत्री सुनेत्रा पवार यांच्याकडे सोपविला असल्याची घोषणा रूपाली चाकणकर यांनी केली आहे.

विरोधकांकडून राजीनाम्याच्या मागणीला जोर

अशोक खरात याला एका महिलेच्या लैंगिक शोषणप्रकरणी अटक झाल्यानंतर रुपाली चाकणकर (Rupali Chakankar) यांचे काही फोटो आणि विशेषतः त्याची ‘पाद्यपूजा’ करतानाचा एक व्हिडिओ सोशल मीडियावर तुफान व्हायरल झाला. महिलांच्या हक्कासाठी लढणाऱ्या आयोगाच्या अध्यक्षांचेच एका शोषण करणाऱ्या भोंदू बाबासोबत असे व्हिडिओ समोर आल्याने सर्वच स्तरांतून संताप व्यक्त केला जात होता. विरोधकांसह सर्वसामान्यांकडूनही त्यांच्या राजीनाम्याची मागणी जोर धरू लागली होती. त्यानंतर अखेर त्यांना राजीनामा द्यावा लागला.

हेदेखील वाचा : Rupali Chakankar News : भोंदूबाबाचे कारनामे भोवले! महिला आयोग अध्यक्षा रुपाली चाकणकर यांना मुख्यमंत्र्यांचे राजीनाम्याचे आदेश?