सौजन्य : आयएएनएस
पंढरपूर : महाराष्ट्राच्या राजकारणात सध्या भेटीगाठी आणि राजकीय घडामोडींना वेग आल्याचं पाहायला मिळत आहे. त्यातच शरद पवार राष्ट्रवादी काँग्रेसचे माढ्याचे आमदार अभिजीत पाटील यांच्या राजकीय भूमिकेबाबत नव्या चर्चांना सुरुवात झाली आहे. शिवसेना शिंदे गटाचे मंत्री भरत गोगावले यांनी थेट मंत्रिपदाची ऑफर दिल्यानंतर उपमुख्यमंत्री एकनाथ शिंदे यांनीही अभिजीत पाटील यांच्या घरी जाऊन भेट घेतली. त्यामुळे सोलापूर जिल्ह्याच्या राजकारणात चर्चांना चांगलाच रंग चढला आहे. (Maharashtra Politics)
कार्तिकी एकादशीच्या निमित्ताने उपमुख्यमंत्री एकनाथ शिंदे पंढरपूर दौऱ्यावर आहेत. याच दौऱ्यात त्यांनी अचानक आमदार अभिजीत पाटील यांच्या निवासस्थानी जाऊन त्यांची भेट घेतली. विशेष म्हणजे, ही भेट भरत गोगावले यांनी मंत्रिपदाची ऑफर दिल्यानंतर लगेचच झाल्याने राजकीय चर्चांना अधिक उधाण आलं आहे.
मंत्री भरत गोगावले यांनी पंढरपुरातील एका कार्यक्रमात अभिजीत पाटील यांना शिंदे यांच्या शिवसेनेत येण्याची जाहीर ऑफर दिली होती. ‘तुमचं आमच्या पक्षात येणं झालं, तर तुम्हाला थेट मंत्रिपद देऊ शकतो,’ असं गोगावले म्हणाले होते. एवढंच नाही, तर आपलं अडीच वर्षांचं मंत्रिपदही त्यांच्यासाठी सोडण्याची तयारी असल्याचं त्यांनी बोलून दाखवलं होतं.
या वक्तव्यानंतर अभिजीत पाटील शिंदे गटात जाणार का, अशी चर्चा सुरू झाली.
दरम्यान, अभिजीत पाटील यांनी शिंदे यांच्यासोबतच्या भेटीबाबत आपली भूमिका स्पष्ट केली आहे. उपमुख्यमंत्री आपल्या मतदारसंघात आले असताना विकासकामांचे प्रश्न मांडणं आणि त्यांची भेट घेणं हे लोकप्रतिनिधी म्हणून आपलं कर्तव्य असल्याचं त्यांनी सांगितलं. गोगावले यांनी दिलेली मंत्रिपदाची ऑफर हा त्यांच्या मनाचा मोठेपणा असल्याची प्रतिक्रिया त्यांनी दिली. मात्र, पक्षांतराबाबत कोणतीही अधिकृत घोषणा त्यांनी केलेली नाही.
दुसरीकडे, पंढरपूर तालुक्यातील आंबे गावात विहिरीच्या दुर्घटनेत मृत्यू झालेल्या चार कामगारांच्या कुटुंबीयांना आणि विजेच्या धक्क्याने मृत्यू झालेल्या एका शेतकऱ्याच्या कुटुंबीयांना मदत देण्यात आली. शासनाकडून प्रत्येकी 5 लाख आणि शिवसेनेकडून 2 लाख रुपये, अशी एकूण 7 लाखांची मदत देण्यात आली. यावेळी एकनाथ शिंदे यांनी मृतांच्या कुटुंबीयांची भेट घेऊन त्यांची आस्थेने विचारपूस केली.
एकीकडे मंत्रिपदाची ऑफर, दुसरीकडे शिंदेंची घरभेट आणि त्यात अभिजीत पाटील यांची भूमिका. त्यामुळे त्यांच्या पुढील राजकीय वाटचालीकडे आता सोलापूर जिल्ह्याचं लक्ष लागलं आहे.
Ans: अभिजीत पाटील यांनी शिंदे यांच्या शिवसेनेत प्रवेश केल्यास त्यांना मंत्रिपद देऊ शकतो, अशी जाहीर ऑफर मंत्री भरत गोगावले यांनी दिली होती. त्यांनी स्वतःचे अडीच वर्षांचे मंत्रिपद सोडण्याची तयारीही दर्शवली होती.
Ans: उपमुख्यमंत्री एकनाथ शिंदे यांनी कार्तिकी एकादशीच्या पंढरपूर दौऱ्यादरम्यान आमदार अभिजीत पाटील यांच्या निवासस्थानी जाऊन त्यांची भेट घेतली.
Ans: सध्या अभिजीत पाटील यांच्या पक्षांतराबाबत कोणतीही अधिकृत घोषणा झालेली नाही. शिंदे यांची भेट ही मतदारसंघातील विकासकामांचे प्रश्न मांडण्यासाठी आणि लोकप्रतिनिधी म्हणून घेतल्याचे त्यांनी स्पष्ट केले आहे.






