कोरेगावात शंभूराज देसाईंची ‘चाल’ सुरु; महेश शिंदेंसमोर पर्याय उभा करण्याची रणनिती तापली

कोरेगाव नगरपंचायतीत अध्यक्षपदाच्या निवडणुकीत भाजपने ऐनवेळी प्रियाताई शिंदे यांना उमेदवारी देत खेळी केली. त्यानंतर दोन सदस्यांनी भाजपला साथ दिल्याने ३-३ चा अंक गाठताना शिवसेना-राष्ट्रवादी आघाडीला अडचणीत यावे लागले.

सातारा : सातारा जिल्ह्यातील कोरेगाव मतदारसंघात सध्या राजकीय हालचालींना वेग आला असून, पालकमंत्री शंभूराज देसाई यांनी थेट मैदानात उतरून मोर्चेबांधणी सुरू केल्याची जोरदार चर्चा आहे. शिवसेनेचे आमदार महेश शिंदे यांना पर्याय उभा करण्याच्या हालचालींमुळे येथील राजकीय समीकरणे ढवळून निघण्याची चिन्हे स्पष्ट दिसू लागली आहेत.

जिल्हा परिषद निवडणुकीत भाजपने साधलेल्या बहुमतासाठी केलेल्या राजकीय ‘तोडफोडी’मुळे शिवसेना व राष्ट्रवादी काँग्रेसला सत्तेबाहेर राहावे लागले. विशेष म्हणजे, शिवसेनेचेच आमदार असलेल्या महेश शिंदे यांनी भाजपच्या बाजूने सत्ता समीकरणे फिरवण्याचा प्रयत्न केल्याची भावना शिवसेना गोटात तीव्र आहे. ही बाब पालकमंत्री शंभूराज देसाई यांच्या जिव्हारी लागल्याचे मानले जात आहे.

कोरेगाव नगरपंचायतीत अध्यक्षपदाच्या निवडणुकीत भाजपने ऐनवेळी प्रियाताई शिंदे यांना उमेदवारी देत खेळी केली. त्यानंतर दोन सदस्यांनी भाजपला साथ दिल्याने ३-३ चा अंक गाठताना शिवसेना-राष्ट्रवादी आघाडीला अडचणीत यावे लागले. सध्या सदस्य अपात्रता आणि अध्यक्ष-उपाध्यक्ष निवड प्रक्रियेवर न्यायालयीन स्थगिती असल्याने संपूर्ण सत्तासंघर्ष कचाट्यात अडकला आहे.

दरम्यान, या सर्व घडामोडींना ‘राजकीय प्रत्युत्तर’ देण्याच्या भूमिकेतून पालकमंत्री देसाई यांनी कोरेगाववर विशेष लक्ष केंद्रीत केल्याचे दिसून येत आहे. अलीकडेच त्यांनी कोरेगाव शहर, तालुका आणि विधानसभा मतदारसंघाचा सखोल आढावा घेतल्याची माहिती पुढे आली आहे.

कोरेगावचे माजी नगराध्यक्ष राजाभाऊ बर्गे यांच्या नेतृत्वाखालील शिवसेनेच्या शिष्टमंडळाने साताऱ्यात देसाई यांची भेट घेतली. या बैठकीत नगरपंचायत निवडणुकीच्या पार्श्वभूमीवर ‘कराड पॅटर्न’नुसार रणनीती आखण्याचा सल्ला देण्यात आल्याचे समजते. स्थानिक निष्ठावंत शिवसैनिकांना बळ देऊन स्वतंत्र ताकद उभी करण्यावरही भर देण्यात आला.

या भेटीमुळे कोरेगावच्या राजकारणात नवा ‘टर्निंग पॉइंट’ येण्याची शक्यता वर्तवली जात आहे. विशेषतः, बर्गे गटाला दिलेले महत्त्व आणि देसाईंची थेट हस्तक्षेपाची भूमिका पाहता आमदार महेश शिंदे यांच्यासाठी ही घडामोड धोक्याची घंटा मानली जात आहे. एकूणच, कोरेगावात आता ‘मित्र की प्रतिस्पर्धी’ हा प्रश्न अधिक गडद झाला असून आगामी काळात शिवसेनेतील अंतर्गत संघर्ष अधिक उफाळण्याची चिन्हे आहेत. पालकमंत्री देसाई यांच्या हालचाली आणि शिंदे यांची पुढील रणनीती यावरच कोरेगावच्या राजकारणाचा पुढचा अंक ठरणार आहे.