मुख्य निवडणूक आयुक्तांच्या विरोधात काँग्रेस पुन्हा आक्रमक; आज करणार देशव्यापी आंदोलन

८ ऑक्टोबर रोजी राज्य, जिल्हा आणि तालुका/मंडळ स्तरावर व्यापक आंदोलनाचे आवाहन करण्यात आले आहे. पक्षाने याला अत्यंत महत्त्वाचे म्हटले असून, सर्व संबंधित घटकांना तातडीने कारवाई सुनिश्चित करण्याचे आवाहन केले आहे.

• ज्ञानेश कुमार यांच्याविरोधात काँग्रेस आक्रमक
• विरोधी पक्षाकडून भारतीय लोकशाहीसाठी ‘काळा दिवस’ म्हणून घोषित
• CJP चे बंगळुरूमध्ये आंदोलन
• प्रसिद्ध यूट्यूबर ध्रुव राठीही आंदोलनात होणार सहभागी

नवी दिल्ली : केंद्रीय मुख्य निवडणूक आयुक्त ज्ञानेश कुमार यांच्याविरोधात काँग्रेस आक्रमक झाली आहे. काँग्रेसकडून आज देशव्यापी आंदोलन केले जाणार आहे. विरोधी पक्षाने हा दिवस भारतीय लोकशाहीसाठी ‘काळा दिवस’ म्हणून घोषित केला आहे. राज्य, जिल्हा आणि तालुका स्तरावर व्यापक आंदोलने केली जातील, असे पक्षाने म्हटले आहे.

मुख्य निवडणूक आयुक्त (सीईसी) ज्ञानेश कुमार यांच्या विरोधात विरोधी खासदारांनी केलेल्या आंदोलनादरम्यान झालेल्या पोलीस कारवाई आणि खासदारांच्या अटकेच्या निषेधार्थ हा निर्णय घेण्यात आला आहे. पक्षाने बुधवारी ‘एक्स’ या सोशल मीडिया प्लॅटफॉर्मवर एक संदेश पोस्ट करून, राज्य काँग्रेस समित्या, जिल्हा काँग्रेस समित्या आणि तालुका काँग्रेस समित्यांना ८ ऑक्टोबर रोजी आंदोलने आयोजित करण्याचे निर्देश दिले आहेत.

काँग्रेसचे सरचिटणीस के. सी. वेणुगोपाल यांनी जारी केलेल्या संदेशात, ८ ऑक्टोबर रोजी राज्य, जिल्हा आणि तालुका/मंडळ स्तरावर व्यापक आंदोलनाचे आवाहन करण्यात आले आहे. पक्षाने याला अत्यंत महत्त्वाचे म्हटले असून, सर्व संबंधित घटकांना तातडीने कारवाई सुनिश्चित करण्याचे आवाहन केले आहे.

CJP चे बंगळुरूमध्ये आंदोलन

बंगळूरमध्ये कॉकरोच जनता पार्टी विशेष सखोल पुनरावलोकन (SIR) आणि मुख्य निवडणूक आयुक्त (CEC) ज्ञानेश कुमार यांच्या विरोधात आंदोलन करणार आहे. कॉकरोच जनता पार्टीचे संस्थापक अभिजीत दीपके आणि यूट्यूबर ध्रुव राठी हे देखील यात सहभागी होणार आहेत. ध्रुव राठीने ‘एक्स’ या सोशल मीडिया प्लॅटफॉर्मवर याची माहिती दिली आहे.

ज्ञानेश कुमार महाराष्ट्रात आले तर…

मुख्य निवडणूक आयुक्त ज्ञानेश कुमार यांच्या विरोधात काँग्रेस आता चांगलीच आक्रमक झाली आहे. महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी ज्ञानेश कुमार यांच्यावर गंभीर आरोप करत महाराष्ट्रात आल्यास आंदोलनाचा इशारा दिला आहे. ‘ज्ञानेश कुमार महाराष्ट्रात आले तर काँग्रेस कार्यकर्ते त्यांना पाय ठेवू देणार नाहीत. आला तर त्याच्या तोंडाला काळं फासू,’ असा इशारा सपकाळ यांनी दिला. त्यांच्या या वक्तव्यामुळे राज्यातील राजकीय वातावरण तापण्याची शक्यता आहे.

राहुल गांधींना ताब्यात घेतल्याच्या निषेधार्थ मुंबई युवक काँग्रेसचा रास्ता रोको, वांद्रे रिक्लेमेशन येथे मध्यरात्री आंदोलन