राष्ट्रवादीमध्ये चाललंय तरी काय? अजित पवारांच्या उमेदवाराला शरद पवारांचा पाठिंबा?

विधानसभा निवडणुक जाहीर करण्यात आल्यामुळे नेत्यांनी जोरदार तयारी सुरु केली आहे. पश्चिम महाराष्ट्रामध्ये शरद पवार व अजित पवार या दोन्ही गटाची मतांची जुळवा जुळवी आणि उमेदवारांची चाचपणी सुरु केली आहे.

जुन्नर : राज्यामध्ये लवकरच विधानसभा निवडणूका होणार आहेत. येत्या नोव्हेंबर महिन्यामध्ये मतदान आणि मतमोजणी होणार आहे. त्यामुळे सर्व राजकीय पक्षांची जोरदार तयारी सुरु आहे. बंडखोरीचे राजकारण झाल्यानंतर ही पहिलीच विधानसभा असल्यामुळे राष्ट्रवादी आणि शिवसेनेच्या दोन्ही गटामध्ये चुरशीची लढत होणार आहे. दरम्यान, पुण्यातील राष्ट्रवादीच्या उमेदवारांने शरद पवारांबाबत सूचक वक्तव्य केले आहे. जुन्नर तालुक्यात विद्यमान आमदार आणि राष्ट्रवादी काँग्रेस अजित पवार गटाचे नेते अतुल बेनके यांच्या वक्तव्यामुळे सर्वांना आश्चर्याचा धक्का बसला आहे.

निवडणुकीमध्ये अजित पवार व शरद पवार गटाचे नेते व पदाधिकाऱ्यांमध्ये अनेकदा कलगीतुरा रंगत आहे. टीका टिप्पणी आणि आरोप प्रत्यारोप केले जात आहेत. दोन्ही गट पूर्ण ताकदीने विधानसभेला सामोरे जात आहेत. यामध्ये पश्चिम महाराष्ट्रामध्ये जोरदार लढत आहे. जुन्नरमध्ये देखील राष्ट्रवादीच्या दोन्ही गटामध्ये लढत वाढली आहे. पण अजित पवार गटाच्या जुन्नरच्या उमेदवाराच्या वक्तव्याने सर्वांच्या भुवया उंचावल्या आहेत. महाराष्ट्रात कुठं असं घडलं नाही. मात्र, जुन्नर तालुक्यात राष्ट्रवादी काँग्रेस पक्ष एक संघपणाने पुढे जाणार कारण पवार साहेबांचा हात माझ्या पाठीमागे आहे, असं वक्तव्य अतुल बेनके यांनी केलं आहे.

नेमकं काय म्हणाले अतुल बेनके?

आपले मत मांडताना अतुल बेनके यांनी उद्यापासून सुरुवात करणार असल्याचे सांगितले आहे. अतुल बेनके म्हणाले की, उद्या पहाटे ओझरला पहाटे अभिषेक करून आपण प्रचाराला सुरूवात करत आहोत. आता मागे हटायचं नाही. आपण एका दिलाने आणि एका विचाराने राष्ट्रवादी काँग्रेस पुढे घेऊन जायचं आहे. राज्यात कुठेही असं घडलं नाही, मात्र जुन्नर तालुक्यात एकसंघपणाने पुढे जाण्यात यश प्राप्त केलं आहे. मला काल प्रश्न केला, तुम्ही फार खुललेले दिसत आहात दोन तीन दिवस झाले, त्यावर मी म्हटलं. त्याचं कारण देखील तसं आहे. जुन्नर तालुक्यात सब एक है. आम्ही एक विचाराने पुढे जाणार आहोत. अजित पवार यांच्या नेतृत्वामध्ये राष्ट्रवादी काँग्रेस घड्याळ म्हणून हा पक्ष पुढे जाणारच आहे. मात्र, शरद पवार यांचा हात आणि आशिर्वीद माझ्या पाठीमागे उभा आहे. तो कसा आहे, तो मी आत्ता सांगणार नाही, ते वेळ आल्यावर कळेल, असे सूचक वक्तव्य अतुल बेनके यांनी केले आहे.