Interpol : पत्नीच्या नावे 32 बँक खाती अन् दुबईत मालमत्ता! बांगलादेशचे माजी हवाई दल प्रमुख शेख अब्दुल हन्नान यांना कतरमध्ये अटक

हन्नान यांच्याकडे त्यांच्या अधिकृत उत्पन्नापेक्षा सुमारे ३२.८ दशलक्ष बांगलादेशी टाका (BDT) किमतीची अवाजवी आणि बेनामी मालमत्ता आढळली आहे. याशिवाय, त्यांच्या मालकीच्या ६ वेगवेगळ्या बँक खात्यांमधून तब्बल २७६.३ दशलक्ष टाकाचे (सुमारे २७ कोटी ६३ लाख टाका) संशयास्पद आणि बेकायदेशीर व्यवहार पार पडल्याचे निष्पन्न झाले आहे. या प्रचंड रकमेचा वापर मनी लाँडरिंगसाठी झाल्याचा प्राथमिक संशय तपास यंत्रणांनी व्यक्त केला आहे.

पत्नी आणि मुलांच्या नावावर परदेशात करोडोंची मालमत्ता

या भ्रष्टाचाराचे जाळे केवळ हन्नान यांच्यापुरतेच मर्यादित नसून त्यांच्या संपूर्ण कुटुंबात पसरल्याचे तपासात उघड झाले आहे. हन्नान यांच्या पत्नीलाही या प्रकरणात सह-आरोपी करण्यात आले आहे. त्यांनी पतीच्या पदाचा गैरवापर करून स्वतःच्या नावावर १९.१ दशलक्ष टाकाची अवाजवी संपत्ती जमा केली. इतकेच नाही तर, त्यांच्या पत्नीच्या नावावर असलेल्या ३२ वेगवेगळ्या बँक खात्यांमधून सुमारे ११.८ दशलक्ष टाकाचे संशयित व्यवहार झाले आहेत.

तपास यंत्रणांच्या रडारवर हन्नान यांची परदेशातील संपत्तीही आली आहे. कॅनडा आणि दुबईसारख्या देशांमध्ये त्यांनी कोट्यवधींची बेनामी मालमत्ता खरेदी केल्याचे उघड झाले आहे. तसेच, तीन वेगवेगळ्या देशांमध्ये त्यांच्या मुलांच्या नावावर नोंदणीकृत असलेल्या अलिशान मालमत्तेची माहिती आता आंतरराष्ट्रीय तपास यंत्रणांच्या हाती लागली आहे.

जागतिक घडामोडी संबंधित बातम्या वाचण्यासाठी येथे क्लिक करा : US Elections 2026 : अमेरिकन राजकारणात हायटेक क्रांती! AI जाहिरातींवर तब्बल 1,300 कोटींचा खर्च; 80% वाटा एकट्या रिपब्लिकन्सचा

न्यायालयाचा दणका: अपार्टमेंट जप्त आणि बँक खाती गोठवली

या प्रकरणाचे गांभीर्य लक्षात घेऊन ढाका उच्च न्यायालयाने यापूर्वीच हन्नान यांच्यावर कडक कारवाईचे आदेश दिले होते. मार्च महिन्यात न्यायालयाने एसीसीच्या याचिकेवर सुनावणी करताना हन्नान आणि त्यांच्या पत्नीचे आयकर दस्तऐवज (Income Tax Records) जप्त करण्याचे निर्देश दिले होते.

याशिवाय, भ्रष्टाचाराच्या पैशातून खरेदी केलेले त्यांचे दोन आलिशान अपार्टमेंट जप्त करण्यात आले असून, त्यांच्या सर्व बँक खात्यांमधील व्यवहारांवर बंदी घालत ती पूर्णपणे गोठवण्यात (Freeze) आली आहेत. न्यायालयाच्या या धडक निर्णयांमुळे हन्नान यांच्या अडचणीत प्रचंड वाढ झाली होती आणि ते कायदेशीर कारवाईपासून वाचण्यासाठी परदेशात पळून गेले होते.

१९८४ च्या वैमानिकापासून ते हवाई दल प्रमुखापर्यंतचा प्रवास

शेख अब्दुल हन्नान यांनी १९८४ मध्ये बांगलादेश हवाई दलात जनरल ड्युटी पायलट म्हणून आपल्या सेवाकार्याला सुरुवात केली होती. आपल्या चार दशकांच्या कार्यकाळात त्यांनी अनेक महत्त्वाची पदे भूषवली आणि १२ जून २०२१ रोजी बांगलादेशचे १६ वे हवाई दल प्रमुख म्हणून जबाबदारी स्वीकारली. तीन वर्षांच्या सेवाकाळानंतर ११ जून २०२४ रोजी ते या पदावरून सेवानिवृत्त झाले.

परंतु सेवानिवृत्तीनंतर अवघ्या काही महिन्यांतच त्यांच्या भ्रष्टाचाराची काळी बाजू समोर आली. उल्लेखनीय म्हणजे, केवळ हवाई दल प्रमुखच नाही तर बांगलादेश नौदलाचे माजी प्रमुख ॲडमिरल मोहम्मद नझमुल हसन यांच्यावरही भ्रष्टाचाराचे गंभीर आरोप असून तेदेखील सध्या परदेशात फरार आहेत.