पुणेकरांचा नाद खुळा! आंतरराष्ट्रीय Taekwondo स्पर्धेत 15 ‘सुवर्ण’ तर…; तब्बल 28 पदकांची कमाई

Taekwondo: हैदराबाद येथे झालेल्या या आंतरराष्ट्रीय स्पर्धेत भारत, श्रीलंका, मॉरिशस, नेपाळ, झिम्बाब्वे आणि ब्राझील या सहा देशांतील तसेच भारताच्या विविध भागांतील खेळाडूंनी सहभाग घेतला होता.

• जागतिक तायक्वांदो स्पर्धेत पुण्याने जिंकली 15 सुवर्ण पदके
• आर. बी. होरांगी, सेंट फेलिक्सच्या खेळाडूंची तायक्वांदोमध्ये शानदार कामगिरी 
• हैदराबाद येथे पार पडली खुल्या जागतिक तायक्वांदो स्पर्धा 

पुणे/Taekwondo: हैदराबाद येथे नुकत्याच पार पडलेल्या पहिल्या आंतरराष्ट्रीय खुल्या जागतिक तायक्वांदो अजिंक्यपद स्पर्धेत पुण्यातील आर. बी. होरांगी तायक्वांदो दो-जांग असोसिएशन आणि सेंट फेलिक्स हायस्कूलच्या खेळाडूंनी दमदार कामगिरी करत तब्बल १५ सुवर्ण, ११ रौप्य आणि २ कांस्यपदकांची कमाई केली. या उल्लेखनीय कामगिरीबद्दल आयोजकांच्या वतीने आर. बी. होरांगी तायक्वांदो दो-जांग असोसिएशनला ‘सर्वोत्कृष्ट तायक्वांदो संघ’ या पुरस्काराने गौरविण्यात आले.

या आंतरराष्ट्रीय स्पर्धेत क्रिश केडगोनी याने पूमसे प्रकारात सुवर्णपदक, तर क्योरुगी प्रकारात रौप्यपदक मिळवले. रायन नोरोन्हा याने क्योरुगीमध्ये सुवर्ण, तर पूमसेमध्ये रौप्यपदक पटकावले. स्वराज धनमेहेर याने पूमसेमध्ये सुवर्ण आणि क्योरुगीमध्ये रौप्यपदकाची कमाई केली.नव्या विश्वकर्मा हिने वेगवान पंच आणि वेगवान किकमध्ये सुवर्णपदक, तसेच पूमसेमध्ये कांस्यपदक मिळवले. आयुषी गाडे हिने क्योरुगीमध्ये रौप्य आणि पूमसेमध्ये कांस्यपदक पटकावले. सिमांतिका पवार हिने वेगवान किकमध्ये सुवर्ण, तर पूमसे आणि वेगवान पंचमध्ये रौप्यपदक मिळवले.

युगांतिका पवार हिने पूमसे, वेगवान किक आणि वेगवान पंच या तिन्ही प्रकारांत सुवर्णपदके मिळवत विशेष कामगिरी केली. अमेर शेख हिने वेगवान पंचमध्ये सुवर्ण, वेगवान किकमध्ये रौप्य आणि पूमसेमध्ये कांस्यपदक मिळवले. दियारा नायर हिने वेगवान किकमध्ये सुवर्ण, तर पूमसेमध्ये रौप्यपदक पटकावले. मैत्रेयी बिर्जे हिने वेगवान किकमध्ये सुवर्ण, तर क्योरुगी आणि वेगवान पंचमध्ये रौप्यपदक मिळवले. क्षिराज गुट्टे याने वेगवान किक आणि वेगवान पंचमध्ये सुवर्ण, तर पूमसेमध्ये रौप्यपदक पटकावले. झारा खान हिने पूमसेमध्ये सुवर्ण, तर वेगवान पंचमध्ये रौप्यपदक मिळवले.

Pune Sports: ९३५ खेळाडू अन् विजयाचा थरार! ‘विनायकी क्रीडा महोत्सवा’त तायक्वांदो स्पर्धेचा महासंग्राम

सहा देशांतील खेळाडूंचा सहभाग

हैदराबाद येथे झालेल्या या आंतरराष्ट्रीय स्पर्धेत भारत, श्रीलंका, मॉरिशस, नेपाळ, झिम्बाब्वे आणि ब्राझील या सहा देशांतील तसेच भारताच्या विविध भागांतील खेळाडूंनी सहभाग घेतला. स्पर्धेत १,१५० हून अधिक खेळाडू सहभागी झाले होते. विविध देशांतील ग्रँडमास्टर्सचीही स्पर्धेला प्रमुख उपस्थिती होती. स्पर्धेच्या यशस्वी आयोजनासाठी दिपाली मिश्रा, सीमा पवार आणि रिझवाना शेख या पालकांनी मोलाचे सहकार्य केले.

मास्टर रवींद्र भंडारी यांचे संघ व्यवस्थापन

संपूर्ण स्पर्धेदरम्यान आर. बी. होरांगी तायक्वांदो दो-जांग असोसिएशनचे अध्यक्ष आणि तांत्रिक संचालक मास्टर रवींद्र भंडारी यांनी संघ व्यवस्थापनासह खेळाडूंच्या प्रशिक्षणाची जबाबदारी सांभाळली. समारोप समारंभात मास्टर रवींद्र भंडारी आणि संपूर्ण आर. बी. होरांगी संघाला व्यासपीठावर आमंत्रित करून त्यांच्या उत्कृष्ट योगदानाबद्दल विशेष सन्मान करण्यात आला. संघाच्या उल्लेखनीय कामगिरीची दखल घेत त्यांना सर्वोत्कृष्ट तायक्वांदो संघांपैकी एक म्हणून गौरविण्यात आले.

आशियाई आंतरराष्ट्रीय तायक्वांदो स्पर्धेत महाराष्ट्राच्या लेकीने भारताच्या नावावर केली चार पदके

सेंट फेलिक्समध्ये यशस्वी खेळाडूंचा सत्कार
दरम्यान, सेंट फेलिक्स हायस्कूलच्या वतीने या आंतरराष्ट्रीय स्पर्धेत यश संपादन करणाऱ्या सर्व खेळाडूंचा विशेष सत्कार करण्यात आला. यावेळी प्रांतीय वरिष्ठ सिस्टर उर्सुला पिंटो, सिस्टर जेनिफर परेरा, शाळा व्यवस्थापक सिस्टर रोझमेरी अल्मेडा, मुख्याध्यापिका लीना पॉल, सिस्टर एल्सा, पर्यवेक्षक बेला डिसिल्वा तसेच क्रीडा शिक्षिका सोनाली राजेभोसले आणि रूपाली बनसोडे उपस्थित होत्या.