38th National Games, Uttarakhand 2024-25 : टेबल टेनिसमधील महिला गटात महाराष्ट्राला रौप्य, अंतिम सामन्यात पश्चिम बंगालकडून पराभूत

38th National Games Uttarakhand 2025 : उत्तराखंडमध्ये सुरू असलेल्या 38 व्या राष्ट्रीय क्रीडा स्पर्धेत टेबल टेनिसमध्ये महिला गटाने रौप्यपदक मिळवत मोठी कामगिरी केली.

देहरादून : उत्कंठापूर्ण लढतीत महाराष्ट्राला टेबल टेनिस मधील महिलांच्या सांघिक अंतिम सामन्यात पश्चिम बंगाल संघाकडून १-३ असा पराभव पत्करावा लागला. त्यामुळे त्यांना ३८व्या राष्ट्रीय क्रीडा स्पर्धेत रौप्य पदकावर समाधान मानावे लागले. अटीतटीने झालेल्या या लढतीमधील पहिल्या सामन्यात महाराष्ट्राच्या स्वस्तिका घोष हिला सुतीर्था मुखर्जी हिच्याकडून ८-११, ११-६,१२-१४,११-२, ५-११ असा पराभव पत्करावा लागला. त्यानंतर महाराष्ट्राची कर्णधार दिया चितळे हिन अहीका मुखर्जी हिच्यावर १२-१०, ११-६, ११-६ असा विजय मिळवित १-१ बरोबरीसह सामन्यातील उत्कंठा वाढविली.

तिसऱ्या सामन्यात महाराष्ट्राच्या तनिषा कोटेचा पराभूत

एकेरीच्या तिसऱ्या सामन्यात महाराष्ट्राच्या तनिषा कोटेचा हिला पोयमाती बैस्या हिच्याकडून ८-११, ७-११, ११-६, ६-११ अशी हार पत्करावी लागली. एकेरीच्या चौथ्या लढतीत महाराष्ट्राच्या स्वस्तिका घोष हिला अहिका मुखर्जी हिने ११-८, ११-६, १३-११ असे पराभूत करीत बंगालच्या विजेतेपदावर शिक्कामोर्तब केले. महिलांच्या उपांत्य फेरीत महाराष्ट्राने हरियाणाचा ३-० असा पराभव केला. त्यावेळी एकेरीच्या पहिल्या सामन्यात महाराष्ट्राची कर्णधार दिया चितळे हिने स्नेहा भौमिक हिच्यावर११-३,१२-१४,११-८,१२-१० अशी मात केली शेवटच्या गेम मध्ये दोन गुणांनी पिछाडीवर असलेल्या दिया हिने टॉप स्पीन फटक्यांचा बहारदार खेळ करीत विजयश्री खेचून आणली.

महाराष्ट्राचा विजय

पाठोपाठ महाराष्ट्राच्या स्वस्तिका घोष हिने पृथ्वीकी चक्रवर्ती हिचा ११-६,११-२,११-९ असा सरळ तीन गेम्समध्ये पराभव करीत महाराष्ट्राला २-० अशी आघाडी मिळवून दिली. एकेरीच्या तिसऱ्या लढतीत महाराष्ट्राच्या तनिषा कोटेचा हिने श्रीदतरी रॉय हिला ११-६, ७-११, ११-७, ११-३, ११-६ असे पराभूत केले आणि महाराष्ट्राच्या विजयावर शिक्कामोर्तब केले.

तेलंगणा संघाचा 3-0 असा पराभव

पुरुष उपांत्य सामन्यात महाराष्ट्राने बलाढ्य तेलंगणा संघाला ३-० असे पराभूत करीत सनसनाटी विजय नोंदविला. त्यावेळी महाराष्ट्राकडून जश मोदी याने फ्रेडेल रिफीक याचा ११-६,११-७,११-९ असा सहज पराभव केला. त्याने काउंटर अटॅक पद्धतीचा सुरेख खेळ केला. पाठोपाठ रेगन अल्बुकर्क याने मोहंमद अली याच्यावर ११-९, ११-९, ११-६ असा सरळ गेममध्ये विजय मिळविला. तिसऱ्या लढतीत महाराष्ट्राच्या चिन्मय सोमय्या याने स्वरमेंदु सोम याला १०-१२, ११-१, ११-९, ११-३ असे पराभूत केले आणि महाराष्ट्राचा अंतिम फेरीतील प्रवेश निश्चित केला. पहिली गेम गमावल्यानंतर सोमय्या याने टॉप स्पिन फटके व प्लेसिंग याचा सुरेख खेळ करीत विजयश्री मिळविली. महाराष्ट्र संघाचे प्रमुख संजय शेटे, स्मिता शिरोळे , सुनील पूर्णपात्रे यांनी महाराष्ट्र संघास भेट देऊन प्रोत्साहन दिले.

हेही वाचा : 38वी राष्ट्रीय क्रीडा स्पर्धा, उत्तराखंड 2024-25; जिम्नॉस्टिक्समध्ये महाराष्ट्राची रूपेरी कामगिरी

हेही वाचा : मुख्य प्रशिक्षक गौतम गंभीरला झहीर खानने दिला इशारा, म्हणाला – ‘या गोष्टी तुम्हाला त्रास देतील’