७५ जलतरणपटूंनी केले सलग सहा तास जलतरण

स्वातंत्र्याच्या अमृत महोत्सवी वर्षानिमित्त महाराष्ट्राची उपराजधानी नागपूर येथे स्विमॅथॉन हा उपक्रम राबविण्यात आला. या स्विमर्सनी रिले उपक्रमाअंतर्गत ७५ जलतरणपटूंनी रिले पद्धतीने सलग सहा तास जलतरण केले. प्रथमच अश्या प्रकारचा उपक्रम नागपूरमध्ये करण्यात आला असून याची नोंद ”इंडिया बुक ऑफ रेकॉर्ड”मध्ये केली जाणार आहे.

नागपूर सुधार प्रन्यास, हनुमान स्पोर्ट्स अकादमी आणि जेडी स्पोर्ट्स फाउंडेशनच्या वतीने अंबाझरी मार्गावरील एनआयटीच्या स्विमिंग पुलवर याचे आयोजन करण्यात आले होते. केंद्रीय मंत्री नितीन गडकरी यांनी जलतरणपटूंच्या एका संघाला हिरवा झेंडा दाखविला असून याप्रसंगी नागपूर सुधार प्रान्यासचे विश्वस्त संदीप इटकेलवार, नासूप्रचे सभापती मनोजकुमार सूर्यवंशी, पर्यटन संचालनालयाचे उपसंचालक प्रशांत सवाई, क्रीडा उपसंचालक शेखर पाटील, इंडिया बुक ऑफ रेकॉर्डसचे एडज्युकेटर निखिलेश सावरकर, कामांडिंग ऑफिसर ले. कमांडर दीपकरण सिंग, अकादमीचे डॉ. संजय उगेमुगे, फाउंडेशनचे अध्यक्ष डॉ. जयप्रकाश दुबळे, आंतरराष्ट्रीय सागरी जलतरणपटू जयंत दुबळे आदी उपस्थित होते.

”स्विमॅथॉन”मध्ये ७५ स्विमर्सनी सकाळी ११.४५ पोहायला सुरुवात केली. सायंकाळी ६.५४ वाजता सांगता केली. इंडिया बुक ऑफ रेकॉर्डसाठी हा प्रयत्न करण्यात आला असून, एकूण ६ तास ९ मिनिटे इतक्या वेळेची नोंद करण्यात आली. यात ८ वर्षांपासून ७५ वर्षांपर्यंतचे जलतरणपटू सहभागी झालेले होते. जयंत दुबळेने नेतृत्व केले.