Asian Para Games 2026 चा शानदार प्रारंभ! ४५ देशांचे खेळाडू सहभागी; प्रमोद भगत, सिमरन शर्मा भारताचे ध्वजवाहक

Asian Para Games 2026 : आशियाई पॅरालम्पिक स्पर्धेला सुरुवात झाली असून रविवारी एका शानदार उद्घाटन सोहळ्याचे आयोजन करण्यात आले होते. यावेळी पॅरा-बॅडमिंटनपटू प्रमोद भगत आणि पॅरा-अॅथलीट सिमरन शर्मा यांनी भारताचे ध्वजवाहक म्हणून तिरंगा हातात घेत भारतीय पथकाचे नेतृत्व केले.

• भारताच्या 168 खेळाडूंचा सहभाग
• 11 क्रीडा प्रकारांत दाखवणार कौशल्य
• जपानचे सम्राट नारुहितो यांची प्रमुख उपस्थिती

 

जपानमध्ये एशियन पॅरा गेम्स 2026 (Asian Para Games 2026) च्या पाचव्या आवृत्तीला रविवारी शानदार प्रारंभ झाला. जपानचे सम्राट नारुहितो यांनी स्पर्धेच्या अधिकृत प्रारंभाची घोषणा केली.
आयची-नागोया येथील मिजुहो पार्क अॅथलेटिक स्टेडियममध्ये झालेल्या उद्घाटन सोहळ्याने या खंडीय क्रीडा स्पर्धेची सुरुवात झाली. 24 ऑक्टोबरपर्यंत चालणाऱ्या या स्पर्धेत 45 देशांतील सुमारे 3 हजार खेळाडू सहभागी झाले आहेत. ‘इमॅजिन वन हार्ट’ अर्थात ‘एका हृदयाची कल्पना करा’, हे या स्पर्धेचे ब्रीदवाक्य आहे.

उद्घाटन सोहळा रविवारी पार पडला असला, तरी काही क्रीडा प्रकारांच्या स्पर्धांना यापूर्वीच सुरुवात झाली होती. शुक्रवारी जपानने पुरुष आणि महिला व्हीलचेअर बास्केटबॉलच्या प्राथमिक फेरीतील सामने जिंकले. शनिवारी भारताच्या पुरुष आणि महिला गोलबॉल संघांनी अनुक्रमे कतार आणि थायलंडविरुद्ध विजय मिळवला.

 

प्रमोद भगत आणि सिमरन शर्माकडे ध्वजवाहकाची जबाबदारी

उद्घाटन सोहळ्यातील ‘परेड ऑफ नेशन्स’मध्ये भारतीय पथकाने लक्ष वेधून घेतले. पॅरा-बॅडमिंटनपटू प्रमोद भगत आणि पॅरा-अॅथलीट सिमरन शर्मा यांनी भारताचे ध्वजवाहक म्हणून तिरंगा हातात घेत भारतीय पथकाचे नेतृत्व केले. नागोया येथील पालोमा मिजुहो स्टेडियममध्ये हा सोहळा पार पडला.

भारतीय पथकाच्या पोशाखानेही सर्वांचे लक्ष वेधले. खेळाडू आणि पथकातील सदस्यांनी गडद निळ्या रंगाचे ब्लेझर परिधान केले होते. त्यावर सिंधू संस्कृतीपासून प्रेरणा घेतलेली सोनेरी कलाकुसर होती. यात ‘प्रिस्ट-किंग’ या प्रसिद्ध मूर्तीचे, ‘डान्सिंग गर्ल’ शिल्पाचे आणि प्राचीन मुद्रांचे संदर्भ होते. ब्लेझरच्या खिशाजवळ तिरंगा, तर कॉलरवर ‘सप्तसिंधू’चा उल्लेख करण्यात आला होता.

Mohammed Shami: न्यूझीलंड दौऱ्यात संधी नाही, आता बंगालच्या रणजी संघातूनही मोहम्मद शामी OUT; नेमकं कारण काय?

भारताचे 168 खेळाडू 11 क्रीडा प्रकारांत सहभागी

या स्पर्धेसाठी भारतीय पथकात एकूण 281 सदस्यांचा समावेश आहे. त्यापैकी 168 खेळाडू असून त्यात 112 पुरुष आणि 56 महिलांचा समावेश आहे. हे खेळाडू 11 विविध क्रीडा प्रकारांत भारताचे प्रतिनिधित्व करणार आहेत. मागील स्पर्धेतील कामगिरीपेक्षा अधिक चांगली कामगिरी करण्यासह विविध पॅरा-क्रीडा प्रकारांत पदके मिळवण्याचे भारतीय खेळाडूंचे लक्ष्य असेल.

दरम्यान, उद्घाटन सोहळ्याच्या अगदी आधी भारताच्या ध्वजवाहकांमध्ये बदल करण्यात आला. सुरुवातीला प्रमोद भगत आणि पॅरा-टेबल टेनिसपटू भाविना पटेल यांची ध्वजवाहक म्हणून निवड करण्यात आली होती. मात्र, भाविना पटेलचा 19 ऑक्टोबरला होणारा उपांत्यपूर्व सामना लक्षात घेऊन तिला विश्रांती मिळावी, यासाठी तिच्या जागी सिमरन शर्माची निवड करण्यात आली.

एशियन पॅरा गेम्सच्या माध्यमातून आशियातील पॅरा-खेळाडूंना आपले कौशल्य दाखवण्याची संधी मिळणार असून, भारतीय खेळाडूंच्या कामगिरीकडे क्रीडाप्रेमींचे लक्ष लागले आहे.

IND vs NZ: वेस्ट इंडिज सीरिजनंतर टीम इंडिया न्यूझीलंडशी भिडणार; T20, वनडे अन् कसोटीचा थरार रंगणार, पाहा संपूर्ण वेळापत्रक