जपानी लोकांच्या दीर्घ आयुष्याचे गुपित! काय आहे 'Hara Hachi Bu' नियम? ८०% पोट भरल्यावर जेवण थांबवण्याची परंपरा
काय आहे Hara Hachi Bu?
Hara Hachi Bu ही एक जपानी म्हण आहे, याचा अर्थ आहे पोट ८० टक्के भरेपर्यंत जेवणे आणि नंतर बंद करणे. याचा उद्देश पोट अतिभरुन अस्वस्थ होण्याऐवजी, पोट थोड कमी भरुन शरीराला पुरेसे अन्न पुरवणे असा आहे. अनेकदा शरीराच्या आवश्यकतेहून जास्त पटीने अन्न खाल्ले जाते, जे पचायला जड जाते आणि मग पोटावर चरबी जमा होऊ लागते. याउलट जर तुम्ही पुरेश्या प्रमाणात किंवा थोड कमी अन्न खाल्ले तर वजन वाढत नाही, शिवाय ते पचायलाही सोपे जाते. सोप्या भाषेत याचा अर्थ असा होतो की, ताटातील संपूर्ण जेवण संपवण्यापेक्षा शरीराला जितकी गरज आहे फक्त तितकेच अन्न खावे. यामुळे आपली भूक वाढत नाही आणि शरीराला सवय लागते.
ओकिनावाशी जोडलेली परंपरा काय आहे?
जपानमधील ओकिनावा हा द्वीपप्रदेश, तेथील वृद्ध आणि दीर्घायुषी लोकसंख्येमुळे बऱ्याच काळापासून चर्चेत आहे. तेथील लोकांच्या पारंपारिक आहारावर आणि जीवनशैलीवर संशोधन करणाऱ्या संशोधकांनी Hara Hachi Bu सारख्या सवयींचा उल्लेख आपल्या शोधात केला आहे. तथापि, फक्त या नियमाचे पालन केल्याने दिर्घायुषी लाभेल असे म्हणणे योग्य ठरणार नाही. आहार, शारीरिक हालचाल, झोप, सामाजिक संबंध, आनुवंशिकता यांचा आपल्या जीवनावर परिणाम होत असतो.
खाण्याच्या पद्धतीमागे काय विचार आहे?
Hara Hachi Bu चा मुख्य विचार खाताना घाई न करता आपल्या शरीराच्या गरजेनुसार आणि संकेतानुसार जेवण करणे असा आहे. अनेकदा टीव्ही बघत, मोबाईचा वापर करत आपण जेवायला बसतो. यामुळे जेवणाकडे आपले लक्ष नसते. आपण भराभरा अनावश्यक आहार करतो ज्यामुळे पोट गच्च होते. यामुळेच या पद्धतीचा अवलंब करताना मर्यादित जेवण आणि त्या जेवणाचे हळूहळू सेवन करणे महत्त्वाचे ठरते. आरामात जेवताना जेव्हा तुम्हाला वाटेल की तुमचे पोट भरले आहे तेव्हा जेवण करणे थांबवा आणि अनावश्यक प्रमाणात आहाराचे सेवन करणे थांबवा.
.png "Videos"){kind=small}
