(फोटो सौजन्य-सोशल मीडिया)
गॅरी कर्स्टन यांच्या मार्गदर्शनाखाली आणि महेंद्रसिंग धोनीच्या कर्णधारपदाखाली भारतीय संघाने २०११ चा एकदिवसीय विश्वचषक जिंकला. गॅरी कर्स्टन सध्या श्रीलंकेच्या संघाचे मुख्य प्रशिक्षक म्हणून कार्यरत आहेत. कर्स्टन यांनी काही महिन्यांसाठी पाकिस्तानच्या ‘व्हाइट-बॉल’ संघाचे प्रशिक्षक म्हणूनही काम केले होते. त्यांनी पाकिस्तान क्रिकेटबाबत काही धक्कादायक खुलासे केले आहेत. पाकिस्तानी संघासोबतच्या त्याच्या अल्पकालावधीतील कार्यकाळाबाबतचं वर्णन करताना त्याने उघड केलं की, संघातील अंतर्गत वातावरण इतकं विस्कळीत होतं की, त्याला आपलं काम करणे जवळजवळ अशक्य झाले होते.
गॅरी कर्स्टनच्या या खुलाशांमुळे पाकिस्तानी संघातील अंतर्गत कलह आणि गोंधळाची स्थिती चव्हाट्यावर आली आहे. २०२४ मध्ये पाकिस्तानचा ‘व्हाइट-बॉल’ प्रशिक्षक म्हणजेच मर्यादित षटकांचे प्रशिक्षक म्हणून नियुक्त झालेल्या कर्स्टनला अवघ्या सहा महिन्यांतच आपल्या पदावरून पायउतार व्हावं लागलं. त्याने स्पष्ट केले की, संघाच्या कामकाजात बाह्य हस्तक्षेप इतका जास्त होता की, एखाद्या प्रशिक्षकाला आपली रणनीती अंमलात आणणं अक्षरशः अशक्य बनलं होतं.
एका माध्यमाशी बोलताना गॅरी कर्स्टन म्हणाला, “माझ्यासाठी सर्वात आश्चर्यकारक बाब म्हणजे सतत होत असलेला बाह्य हस्तक्षेप. यामुळे एखाद्या प्रशिक्षकाला संघासोबत प्रभावीपणे काम करणे अत्यंत कठीण जाते.” कर्स्टनने पुढे सांगितले की, जेव्हा संघाची कामगिरी खराब व्हायची, तेव्हा संघातील वातावरण आणखीच तणावपूर्ण व्हायचं. कर्स्टनच्या मते, पाकिस्तान क्रिकेटमध्ये खराब कामगिरीचं खापर नेहमीच सर्वप्रथम प्रशिक्षकाच्या माथी फोडलं जायचं.
गॅरी कर्स्टनने टिप्पणी केली, “बाहेरून सतत टीका आणि गोंधळ सुरू असायचा आणि खराब कामगिरीचे गंभीर परिणाम भोगावे लागायचे. अशा वातावरणात, जबाबदारी नेहमीच सर्वप्रथम प्रशिक्षकावरच लादली जायची.” त्याने पुढे मान्य केले की, जेव्हा जेव्हा संघ चांगली कामगिरी करण्यात अपयशी ठरतो, तेव्हा प्रशिक्षक हे सर्वात सोपे लक्ष्य ठरतात.
उपहासात्मक सुरात गॅरी कर्स्टन यांनी पुढे सांगितलं की, “जेव्हा संघ चांगली कामगिरी करत नसतो, तेव्हा सर्वात सोपा उपाय म्हणजे प्रशिक्षकाला काढून टाकणं किंवा त्याच्यावर निर्बंध घालणं हा असतो. मात्र, माझ्या मते, हा दृष्टिकोनच मुळात सदोष आहे. जर तुमचा प्रशिक्षकावर विश्वासच नसेल, तर मग त्याला सुरुवातीला नियुक्त तरी का केलं?”
गॅरी कर्स्टनच्या जाण्यानंतर, ऑस्ट्रेलियाचा माजी वेगवान गोलंदाज जेसन गिलेस्पी यानेही डिसेंबर २०२४ मध्ये पाकिस्तानी कसोटी संघाच्या प्रशिक्षकपदाचा राजीनामा दिला. पाकिस्तानचा माजी गोलंदाज आकिब जावेद याच्यावर आरोप करताना गिलेस्पीने म्हटले की, प्रशिक्षकपद स्वतःकडे मिळवण्यासाठी आकिब पडद्याआड राहून कटकारस्थाने रचत होता. सततचे वादविवाद, प्रशिक्षकांचे राजीनामे आणि अंतर्गत गटबाजी यामुळे पाकिस्तान क्रिकेट सध्या एका गंभीर संकटातून जात आहे. गॅरी कर्स्टन आणि जेसन गिलेस्पी यांसारख्या मोठ्या नावांनी केलेल्या खुलाशांमुळे, संघाच्या आतमध्ये सर्व काही आलबेल नाही, ही वस्तुस्थिती आणखीच स्पष्ट झाली आहे.
.png "Videos"){kind=small}
