IND vs SL 2nd Test: ‘देवदत्त’ने वाचवला भारताचा डाव! पडिक्कलने पहिल्याच दिवशी पेटवली लंका; गिलनेही गाजवलं मैदान, भारत ३०० पार

IND vs SL 2nd Test Day 1 Score: भारत आणि श्रीलंका यांच्यातील दुसऱ्या कसोटी सामन्यातील पहिल्या दिवसाचा खेळ संपला आहे. दिवसाअखेर भारताने ५ विकेट्स गमावून ३०० धावा केल्या आहेत.

• पडिक्कलचा शतकी धमाका
• गिलनेही ठोकली फिफ्टी
• पहिल्या दिवसअखेर भारत ३००/५

भारत आणि श्रीलंका यांच्यातील कोलंबो येथे सुरू असलेल्या दुसऱ्या कसोटी सामन्याचा पहिला दिवसाचा खेळ संपला आहे. हा सामना कोलंबो येथील सिंहलीज स्पोर्ट्स क्लबवर खेळला जात आहे. दुसऱ्या कसोटी सामन्याचा पहिला दिवस भारताच्या बाजूने होता. भारताने आपल्या पहिल्या डावात ८५ षटकांत ५ विकेट्स गमावून ३०० धावा केल्या आहेत. भारताचा कर्णधार शुभमन गिलने नाणेफेक जिंकून प्रथम फलंदाजी करण्याचा निर्णय घेतला. हा निर्णय देवदत्त पडिक्कलने शतक झळकावून पूर्णपणे योग्य ठरवला. देवदत्त पडिक्कलने शानदार शतक झळकावत ११७ धावा केल्या. पहिला दिवसाचा खेळ संपला तेव्हा ध्रुव जुरेल ७ आणि सारांश जैन ४ धावांवर नाबाद आहेत.

IND vs Sl 2nd Test: शून्यावर कॅच सुटली अन् मिळालं जीवनदान! मग देवदत्त पडिक्कलने केली लंकेची धुलाई; सलग दुसऱ्या कसोटीत ठोकलं शतक

भारताला ‘देवा’ने वाचवले

भारताची सुरुवात चांगली नव्हती. राहुलच्या रूपाने ३७ धावांवर भारताची पहिली विकेट पडली. तो लहिरा कुमारच्या गोलंदाजीवर १८ धावांवर बाद झाला. भारताला दुसरा धक्का यशस्वी जैस्वालच्या रूपाने बसला, जो फर्नांडोच्या गोलंदाजीवर ४५ (५३) धावांवर बाद झाला. दोन्ही फलंदाज पहिल्या सत्रातच बाद झाले. लंच ब्रेकनंतर खेळ पुन्हा सुरू झाल्यावर देवदत्त पडिक्कलने अर्धशतक झळकावले. शुभमन गिलनेही अर्धशतक केले. मात्र, टी-ब्रेकच्या काही वेळ आधी, ५० धावांवर असताना गिलने असिथा फर्नांडोच्या वाईड स्विंग चेंडूवर चुकीचा फटका मारला आणि बाद झाला. टी- ब्रेकनंतर खेळ पुन्हा सुरू झाला. मनगटाच्या दुखापतीमुळे ऋषभ पंत तीन धावांवर खेळत असताना रिटायर्ड हर्ट झाला. त्याच्या जागी जडेजा फलंदाजीसाठी आला.

देवदत्त पडिक्कलने या मालिकेतील आणि आपल्या कारकिर्दीतील दुसरे शतक झळकावले. त्याने मागील सामन्यात पहिल्या डावात शतक केले होते आणि या सामन्यातही पहिल्या डावात शतक केले आहे. देवदत्तने तिसऱ्या क्रमांकावर फलंदाजी करताना शानदार खेळी केली. तो ११७ धावांवर बाद झाला. भारतीय संघातील निम्मे खेळाडू पॅव्हेलियनमध्ये परतले आहेत. जडेजा ४३ धावांवर बाद झाला. ध्रुव जुराईल ७ धावांवर, तर पदार्पण करणारा सारांश जैन ४ धावांवर खेळत आहे. श्रीलंकेकडून असिथा फर्नांडोने आतापर्यंत तीन विकेट्स घेतले आहेत, तर लाहिरू कुमारा आणि केसरा नुवान्थाने प्रत्येकी एक विकेट घेतला आहे.

मालिकेतील पहिल्या सामन्यात भारतीय संघाने श्रीलंकेला १६५ धावांनी पराभूत केले . तो सामना गॉल येथील गॉल आंतरराष्ट्रीय स्टेडियमवर खेळला गेला होता. आता, हा सामना जिंकून श्रीलंकेला क्लीन स्वीप देण्याचा भारतीय संघाचा प्रयत्न असेल

दोन्ही संघांचे प्लेइंग ११

भारत: यशस्वी जैस्वाल, केएल राहुल, देवदत्त पडिक्कल, शुभमन गिल (कर्णधार), ऋषभ पंत (यष्टीरक्षक), रवींद्र जडेजा, ध्रुव जुरेल, सरांश जैन, मानव सुथार, मोहम्मद सिराज, प्रसिद्ध कृष्णा.

श्रीलंका : लाहिरू उदारा, कामिल मिशारा, पसिंदू सूर्यबंदरा, कामिंदू मेंडिस, धनंजया डी सिल्वा (कर्णधार), सोनल दिनुषा, निरोशन डिकवेला (यष्टीरक्षक), केशरा नुवांथा, प्रभात जयसूर्या, लाहिरू कुमारा, असिथा फर्नांडो.

IND vs SL: कोण आहे सारांश जैन? वयाच्या ३३व्या वर्षी मिळाली टीम इंडियात पदार्पणाची संधी