फोटो सौजन्य - बीसीसीआय
भारतीय महिला संघाची काही दिवसाआधी तीन सामन्यांची एक दिवसीय मालिका पार पडली यामध्ये भारतीय संघाला १–२ असा पराभवाचा सामना करावा लागला. आता त्यानंतर भारतीय महिला संघाला आणखी एक मोठा झटका बसला आहे. ऑस्ट्रेलियाविरुद्धच्या तिसऱ्या एकदिवसीय सामन्यात स्लो ओव्हर-रेट राखल्याबद्दल मंगळवारी भारतीय महिला क्रिकेट संघाला त्यांच्या मॅच फीच्या १० टक्के दंड ठोठावण्यात आला. याआधी, दुसऱ्या एकदिवसीय सामन्यात स्लो ओव्हर-रेट राखल्याबद्दल ऑस्ट्रेलियन संघालाही मॅच फीच्या १० टक्के दंड ठोठावण्यात आला होता.
तिसऱ्या एकदिवसीय सामन्यात, स्मृती मानधनाच्या १२५ धावांच्या खेळीनंतरही यजमान भारताचा ४३ धावांनी पराभव झाला. ऑस्ट्रेलियाने मालिका २-१ अशी जिंकली. निर्धारित वेळेत लक्ष्यापेक्षा दोन षटके मागे असलेल्या भारतीय संघावर आयसीसी आंतरराष्ट्रीय सामनाधिकारी पॅनेल जीएस लक्ष्मी यांनी दंड ठोठावला. “खेळाडू आणि खेळाडूंच्या सहाय्यक कर्मचाऱ्यांसाठी आयसीसीच्या आचारसंहितेच्या कलम २.२२ नुसार, खेळाडूंना त्यांच्या संघाने टाकलेल्या प्रत्येक षटकासाठी त्यांच्या सामन्याच्या शुल्काच्या पाच टक्के दंड आकारला जाईल,” असे आयसीसीने एका निवेदनात म्हटले आहे.
भारतीय कर्णधार हरमनप्रीत कौरने शिक्षा स्वीकारली, त्यामुळे औपचारिक सुनावणीची गरज उरली नाही. तिसऱ्या सामन्यात, भारताची सलामीवीर फलंदाज स्मृती मानधनाने इतिहास रचला. जर भारतीय संघाने सामना जिंकला असता तर तो केकवरील आयसिंग ठरला असता. मानधना ही एकदिवसीय क्रिकेटमध्ये सर्वात जलद शतक करणारी दुसरी महिला फलंदाज ठरली, तिने फक्त ५० चेंडूत शतक ठोकले.
मानधनाने २०००-०१ मध्ये दक्षिण आफ्रिकेविरुद्ध ऑस्ट्रेलियाची माजी फलंदाज करेन रोल्टनचा ५७ चेंडूंचा विक्रम मोडला. २०१२-१३ च्या हंगामात न्यूझीलंडविरुद्ध ४५ चेंडूत शतक ठोकून ऑस्ट्रेलियाची माजी कर्णधार मेग लॅनिंग सर्वात जलद शतके करणाऱ्यांच्या यादीत अव्वल स्थानावर आहे. मानधनाने ५० चेंडूत झळकावलेले शतक, ज्यामध्ये १४ चौकार आणि चार षटकारांचा समावेश होता, हे भारतीय फलंदाजाचे सर्वात जलद शतक आहे. २९ वर्षीय डावखुऱ्या फलंदाजाने ७० चेंडूत शतक करण्याचा स्वतःचाच विक्रम मोडला.
२०२४ मध्ये एकाच वर्षात चार एकदिवसीय शतके झळकावणारी मानधना ही पहिली महिला फलंदाज आहे. दक्षिण आफ्रिकेची ताजमिन ब्रिट्स ही ही कामगिरी करणारी दुसरी फलंदाज आहे. महिला एकदिवसीय सामन्यात सलग दोन शतके झळकावणारी ती ऑस्ट्रेलियाच्या टॅमी ब्यूमोंटनंतर दुसरी फलंदाज ठरली. महिला एकदिवसीय सामन्यांमध्ये सर्वाधिक सलग शतके करण्याचा विक्रम न्यूझीलंडच्या एमी सॅटर्थवेटच्या नावावर आहे, तिने २०१६-२०१७ मध्ये सलग चार शतके झळकावली.
.png "Videos"){kind=small}
