शुक्रवार, 25 सप्टेंबर 2026
IND A beat Aus A
नाणेफेक जिंकून प्रथम फलंदाजी करण्याचा निर्णय घेतलेल्या भारताने पहिल्या डावात ३३४ धावांचा डोंगर उभा केला. कुमार कुशाग्रने ११३ धावांचे शानदार शतक झळकावले, तर साई सुदर्शनने ५७ धावा केल्या. तनुष कोटियनने ६९ धावा आणि अंशुल कंबोजने २३ धावांची भर घातली. प्रत्युत्तरात, ऑस्ट्रेलियाचा संघ पहिल्या डावात १७१ धावांवर सर्वबाद झाला, ज्यामुळे भारताला १६३ धावांची आघाडी मिळाली.
यानंतर, भारतीय संघाने दुसऱ्या डावात चांगली फलंदाजी करत १९९ धावा केल्या आणि आपली आघाडी ३६२ धावांपर्यंत वाढवली. कर्णधार देवदत्त पडिक्कलने दुसऱ्या डावात ५९ धावा केल्या, तर कुमार कुशाग्रने नाबाद ४६ धावा केल्या. ३६३ धावांचे लक्ष्य गाठताना ऑस्ट्रेलियाचा संघही दुसऱ्या डावात अपयशी ठरला आणि केवळ २०० धावांवर सर्वबाद झाला. ऑस्ट्रेलियाच्या एकाही फलंदाजाला अर्धशतक झळकावता आले नाही, दुसऱ्या डावात ५२ चेंडूंमध्ये ४७ धावा करणारा फर्गस ओ’नील हा संघासाठी सर्वाधिक धावा करणारा फलंदाज होता. या शानदार कामगिरीमुळे भारताने हा सामना तब्बल १६२ धावांनी जिंकला.
या सामन्यात ऑस्ट्रेलियाला विजयासाठी ३६३ धावांचे लक्ष्य देण्यात आले होते, परंतु भारताच्या उत्कृष्ट गोलंदाजीसमोर कांगारू संघ अवघ्या २०० धावांवर गारद झाला. दुसऱ्या डावात भारताकडून तुषार देशपांडे आणि शम्स मुलानी यांनी प्रत्येकी ३ विकेट्स घेत शानदार गोलंदाजी केली, तर अंशुल कंबोज आणि तनुष कोटियन यांनी प्रत्येकी २ विकेट्स घेतले. पहिल्या डावात शम्स मुलानीने भारतासाठी भेदक गोलंदाजी करत ४ विकेट्स घेतले होते. त्याने दोन्ही डावांत मिळून एकूण ७ विकेट्स घेतले. पहिल्या डावात तुषार आणि तनुष यांनी प्रत्येकी २ विकेट्स घेतले, तर अंशुल आणि प्रफुल्ल हिंगे यांनी प्रत्येकी १ विकेट घेतला. मालिकेतील दुसरा सामना २९ सप्टेंबर रोजी पुदुचेरी येथे खेळला जाईल. त्यानंतर ६ ऑक्टोबरपासून तीन एकदिवसीय सामन्यांची मालिका सुरू होईल.
