आज भारत विरुद्ध पाकिस्तान सामना रंगणार

सध्या सुरु असलेल्या महिला आशिया कप (Women’s Asia Cup) क्रिकेट स्पर्धेत आज ७ ऑक्टोबर रोजी भारत विरुद्ध पाकिस्तान (India Vs Paksitan) या दोन संघांमध्ये सामना रंगणार आहे. सध्याच्या आशिया कप मध्ये सलग तीन सामने जिंकणारा भारतीय महिला संघ पाकिस्तानला नमवत विजयी घोडदौड सुरु ठेवण्यासाठी प्रयत्न करणार आहे. तर थायलंडकडून पराभवाचा धक्का बसलेला पाकिस्तानचा संघ या लढतीत भारताविरुद्ध चांगला खेळ करून सामना जिंकण्याचाप्रयत्न करणार आहे.

आशिया कपच्या गुणतालिकेत भारतीय संघ ६ गुणांसह पहिल्या; तर पाकिस्तानचा संघ ४ गुणांसह दुसऱ्या स्थानावर आहे. भारत-पाकिस्तान यांच्यामध्ये झालेल्या मागील पाच लढतींमध्ये भारतीय संघाने विजय संपादन केला आहे. मागील दोन लढतींमध्ये तर भारतीय संघाकडून पाकिस्तानला मोठ्या फरकाने पराभूत व्हावे लागले आहे. भारतीय संघाची फलंदाजीची कमान मुख्यत्वे स्मृती मंधना, शेफाली वर्मा, हरमनप्रीत कौर आणि जेमिमा रॉड्रिग्स या चार खेळाडूंवर आहे.

मागील दोन लढतींमध्ये भारतीय संघात मोठ्या प्रमाणात बदल करण्यात आले, पण पाकिस्तानविरुद्धच्या लढतीत संघात बदल करण्यात येतील असे वाटत नाही. यंदाची आशिया कप स्पर्धा बांग्लादेश मध्ये होतअसून यंदा आशिया कपचे यजमानपद बांग्लादेशकडे आहे. दुपारी एकच्या सुमारास सामना सुरु होणार असून याचे थेट प्रक्षेपण स्टार स्पोर्ट्सवर पहायला मिळणार आहे,