रविंद्र जडेजाचा अनोखा विक्रम (फोटो सौजन्य - इन्स्टाग्राम)
IPL 2026 च्या १६ व्या सामन्यात, बरसापारा क्रिकेट स्टेडियमवर राजस्थान रॉयल्सकडून (RR) रॉयल चॅलेंजर्स बंगळूरचा ६ गडी राखून पराभव झाला. या सामन्यात स्टार अष्टपैलू रवींद्र जडेजाने एक विशेष टप्पा गाठला. नक्की काय आहे हा रेकॉर्ड जाणून घ्या
T20 क्रिकेटमधील जडेजाचा मोठा विक्रम
View this post on Instagram
या सामन्यात रवींद्र जडेजाने टी२० क्रिकेटमध्ये ४,००० धावा पूर्ण केल्या. यासह, जडेजा टी२० क्रिकेटमध्ये ४,००० धावा आणि २०० बळी घेणारा दुसरा भारतीय खेळाडू ठरला. जडेजाच्या आधी केवळ हार्दिक पांड्याने हा पराक्रम केला आहे. हा पराक्रम करणारा जडेजा एकूण २५ वा खेळाडू आहे. जडेजाने आपल्या २ षटकांच्या स्पेलमध्ये केवळ १४ धावा देत उत्कृष्ट गोलंदाजी केली आणि रोमारियो शेफर्डची महत्त्वपूर्ण विकेट घेतली.
वैभव सूर्यवंशी आणि ध्रुव जुरेल यांची शानदार कामगिरी
आरसीबीने दिलेल्या २०२ धावांच्या लक्ष्याचा पाठलाग करताना राजस्थान रॉयल्सची सुरुवात खराब झाली. यशस्वी जैस्वाल अवघ्या १३ धावांवर बाद झाला. मात्र, त्यानंतर वैभव सूर्यवंशी आणि ध्रुव जुरेल यांनी आपल्या स्फोटक फलंदाजीने चाहत्यांची मने जिंकली. १५ वर्षीय फलंदाज वैभवने ३०० च्या स्ट्राईक रेटने अवघ्या २६ चेंडूंमध्ये ७८ धावांची स्फोटक खेळी केली. या खेळीत वैभवने ८ चौकार आणि ७ उत्तुंग षटकार ठोकले. वैभवसमोर आरसीबीचे गोलंदाज पूर्णपणे हतबल झाले. जुरेलनेही अर्धशतक झळकावले. मात्र, शिमरॉन हेटमायर शून्यावर बाद झाला आणि कर्णधार रियान पराग केवळ ३ धावाच करू शकला.
RCB च्या २०१ धावा
यापूर्वी, आरसीबीने २० षटकांत ८ गडी गमावून २०१ धावा केल्या. आघाडीचे फलंदाज अपयशी ठरल्यानंतर, कर्णधार रजत पाटीदारने एका टोकाकडून शानदार फलंदाजी करत ४० चेंडूंमध्ये ६३ धावा केल्या. त्याने आपल्या खेळीत ४ चौकार आणि ४ षटकार मारले. विराट कोहलीला चांगल्या सुरुवातीचा फायदा उठवता आला नाही आणि तो १६ चेंडूंमध्ये ३२ धावा करून बाद झाला. व्यंकटेश अय्यरने १५ चेंडूंमध्ये नाबाद २९ धावा केल्या, तर रोमारियो शेफर्डने २२ धावांचे योगदान दिले.
RCB Vs RR Live: आधी पावसाने झोडपलं, मग Vaibhav Suryvanshi ने धोपटलं! राजस्थानकडून आरसीबी ‘चितपट’
