Lhuan dre pretorius Break Chris Gayle Record
आता, दक्षिण आफ्रिकेचा २० वर्षीय युवा सलामीवीर फलंदाज लुआन ड्री प्रिटोरियसने पुरुष टी-२० क्रिकेटमध्ये नवा इतिहास रचला आहे. सीएसए टी-२० चॅलेंजमध्ये टायटन्स संघाकडून खेळताना, प्रिटोरियसने ब्लोमफॉन्टेन येथे नाइट्स संघाविरुद्ध अवघ्या ७९ चेंडूंमध्ये १८८ धावांची नाबाद स्फोटक खेळी केली. या धडाकेबाज खेळीने त्याने टी-२० क्रिकेटच्या इतिहासात फलंदाजाने केलेल्या सर्वोच्च वैयक्तिक धावसंख्येचा विश्वविक्रम रचला.
२ ऑक्टोबर रोजी, टायटन्स आणि नाइट्स यांच्यात सीएसए टी२० चॅलेंजमध्ये एक रोमांचक सामना खेळला गेला. या सामन्यात, प्रिटोरियसने ७९ चेंडूंमध्ये नाबाद १८८ धावा करून ख्रिस गेलचा विक्रम मोडला. तो आता टी२० क्रिकेटमधील सर्वाधिक धावा करणारा फलंदाज बनला आहे. त्याने या स्फोटक खेळीत १५ चौकार आणि १३ षटकार मारले. प्रिटोरियसने अवघ्या ४० चेंडूंमध्ये आपले शतक पूर्ण केले.
या ऐतिहासिक खेळीसह, प्रिटोरियसने वेस्ट इंडिजचा दिग्गज ख्रिस गेलचा विक्रम मोडला, जो अनेक वर्षांपासून जवळपास अशक्य मानला जात होता. गेलने २०१३ च्या आयपीएलमध्ये रॉयल चॅलेंजर्स बंगळूरकडून खेळताना पुणे वॉरियर्सविरुद्ध एक संस्मरणीय नाबाद १७५ धावा केल्या होत्या. हे प्रिटोरियसच्या टी२० कारकिर्दीतील तिसरे शतक होते आणि यासोबतच, ‘युनिव्हर्स बॉस’चा १३ वर्षे जुना विक्रम इतिहासात जमा झाला.
या युवा सलामीवीराने सामन्याच्या सुरुवातीपासूनच विरोधी गोलंदाजांवर जोरदार हल्ला चढवला. त्याने अवघ्या २४ चेंडूंमध्ये आपले अर्धशतक पूर्ण केले, त्यानंतर पुढच्याच १६ चेंडूंमध्ये शतक झळकावले. अवघ्या ४० चेंडूंमध्ये शतक पूर्ण करणाऱ्या प्रिटोरियसला १५० धावांपर्यंत पोहोचायला फार वेळ लागला नाही. आपल्या १८८ धावांच्या नाबाद खेळीदरम्यान, त्याने १३ शानदार षटकार आणि १५ धमाकेदार चौकार ठोकले, ज्यामुळे नाइट्सच्या प्रत्येक गोलंदाजाचा इकॉनॉमी रेट ११ च्या वर गेला.
संपूर्ण सामन्यावर प्रिटोरियसचे वर्चस्व होते. त्याच्या टायटन्स संघाने २० षटकांत ३ विकेट्स गमावून २६७ धावांचा डोंगर उभा केला. प्रत्युत्तरात, नाइट्सचा डाव धावांचा पाठलाग करताना सुरुवातीलाच अडखळला आणि ते १७.२ षटकांत केवळ १४३ धावाच करू शकले.
.png "Videos"){kind=small}
