(फोटो सौजन्य-सोशल मीडिया)
केकेआरसाठी सर्वात मोठी डोकेदुखी ठरत आहे ती म्हणजे त्यांच्या प्रमुख वेगवान गोलंदाजांची अनुपस्थिती. युवा वेगवान गोलंदाज हर्षित राणा दुखापतीमुळे आधीच या हंगामातून बाहेर पडला असताना आता, आणखी एक वेगवान गोलंदाज IPL 2026 मधून बाहेर पडला आहे. लिलावादरम्यान, KKR ने बंगालच्या या वेगवान गोलंदाजाला १ कोटी रुपयांना आपल्या संघात सामील करून घेतले होते. पण फिटनेसबाबत तक्रार असल्याने आता संघासमोर मोठं प्रश्नचिन्ह उपस्थित होत आहे.
कोलकाता नाईट रायडर्सने लिलावादरम्यान आकाश दीपच्या अनुभवावर विश्वास दाखवत त्याला १ कोटी रुपयांच्या बोलीवर आपल्या ताफ्यात सामील करून घेतले होते. मात्र, प्रत्यक्ष मैदानात उतरण्यापूर्वीच त्याच्या फिटनेसबाबतच्या तक्रारींमुळे संघासमोर मोठे प्रश्नचिन्ह निर्माण झाले आहे. एका वृत्तसंस्थेच्या अहवालानुसार, कोलकाता नाईट रायडर्स संघाचा आकाश दीप IPL 2026 मधून बाहेर झाला असल्याचं म्हटले आहे. कोलकाता नाईट रायडर्सचे सराव शिबीर (कॅम्प) १८ मार्चपासून सुरू आहे; मात्र, २९ वर्षीय आकाश दीप यात सहभागी झालेला नसल्याचं समोर येत आहे. त्याच्या दुखापतीचे नेमके स्वरूप अद्याप अधिकृतपणे स्पष्ट करण्यात आलेले नाही, परंतु तो या संपूर्ण हंगामात खेळू शकणार नाही हे आता जवळपास निश्चित मानले जात आहे.
या दुखापतींमुळे केकेआरच्या वेगवान गोलंदाजीच्या आक्रमणावर मोठा परिणाम होण्याची शक्यता आहे. विशेषतः भारतीय वेगवान गोलंदाजांची फळी आता कमकुवत वाटू लागली आहे. तीन वेळा IPL विजेत्या ठरलेल्या KKR संघाचा, २०२६ हंगामातील पहिला सामना मुंबई इंडियन्सविरुद्ध होणार आहे. हे दोन्ही संघ २९ मार्च रोजी वानखेडे स्टेडियमवर आमनेसामने येणार आहे. त्यानंतर, २ एप्रिल रोजी कोलकाता येथील ईडन गार्डन्सवर त्यांचा सामना सनरायझर्स हैदराबादशी होणार आहे. ६ एप्रिल रोजी KKR पंजाब किंग्जचा सामना करेल हा सामना देखील कोलकाता येथेच खेळला जाणार आहे. घरच्या मैदानावर सामने खेळण्यापूर्वीच प्रमुख गोलंदाज बाहेर पडल्याने प्लेइंग इलेव्हन निवडण्याचे मोठे आव्हान उभे राहिले आहे. अशा प्रतिकूल परिस्थितीत कोलकाता नाईट रायडर्सचा संघ या संकटांवर मात करून कशी कामगिरी करतो, हे पाहणं महत्त्वाचं ठरणार आहे.
