Pm Narendra on Cheteshwar Pujara: आंतरराष्ट्रीय क्रिकेटला नुकताच निरोप दिलेल्या चेतेश्वर पुजारासाठी (Cheteshwar Pujara) पंतप्रधान नरेंद्र मोदी (Narendra Modi) यांनी एक खास पत्र लिहिले आहे. या पत्रात पंतप्रधानांनी पुजाराच्या उत्कृष्ट कारकिर्दीचे कौतुक केले असून, त्याला भविष्यासाठी शुभेच्छाही दिल्या आहेत.
पंतप्रधान मोदींनी आपल्या पत्रात ऑस्ट्रेलियामध्ये मिळवलेल्या ऐतिहासिक विजयाचा आवर्जून उल्लेख केला. या विजयात पुजाराने फलंदाजीच्या माध्यमातून महत्त्वाची भूमिका बजावली होती. तसेच, देशांतर्गत क्रिकेटमध्ये पुजाराच्या योगदानाचीही त्यांनी स्तुती केली.
२४ ऑगस्ट रोजी क्रिकेटच्या सर्व फॉरमॅटमधून निवृत्ती जाहीर केलेल्या पुजारासाठी पंतप्रधान मोदींनी हे पत्र लिहिले. ते म्हणाले, “क्रिकेटच्या सर्व फॉरमॅटमधून तुमच्या निवृत्तीच्या निर्णयाबद्दल कळले. तुमच्या या शानदार कारकिर्दीबद्दल क्रिकेट जगतातून आणि चाहत्यांकडून तुम्हाला शुभेच्छा मिळत आहेत. तुमच्या उत्कृष्ट कारकिर्दीबद्दल मी तुम्हाला मनापासून अभिनंदन करू इच्छितो. ज्या काळात क्रिकेटच्या छोट्या फॉरमॅटचे वर्चस्व आहे, त्या काळात तुम्ही खेळाच्या सर्वात मोठ्या फॉरमॅटचे सौंदर्य जपले.” पंतप्रधान पुढे म्हणाले, “तुमच्या अद्भुत स्वभावामुळे आणि फलंदाजीच्या क्षमतेमुळे तुम्ही भारतीय फलंदाजीचा कणा राहिला आहात.”
चेतेश्वर पुजारा को रिटायरमेंट पर प्रधानमंत्री @narendramodi से प्रशंसा पत्र प्राप्त हुआ।@PMOIndia | @cheteshwar1 | @tapasjournalist | #CheteshwarPujara pic.twitter.com/i3KJFDxV96 — डीडी न्यूज़ (@DDNewsHindi) August 31, 2025
मोदींनी पत्रात पुढे लिहिले की, “तुमची अप्रतिम कारकीर्द अनेक मोठ्या यशांनी भरलेली आहे. विशेषतः परदेशी भूमीवरच्या आव्हानात्मक परिस्थितीत तुमचे योगदान खूप महत्त्वाचे होते. उदाहरणार्थ, ऑस्ट्रेलियामध्ये खेळल्या गेलेल्या कसोटी सामने चाहत्यांना नेहमीच लक्षात राहतील. तुम्ही ऑस्ट्रेलियन भूमीवर ऐतिहासिक विजयाचा पाया रचला होता. सर्वात मजबूत गोलंदाजीसमोर तुम्ही छाती काढून उभे राहिलात. तुम्ही दाखवून दिले की संघासाठी खांद्यावर जबाबदारी घेण्याचा खरा अर्थ काय असतो.”
“तुमच्या कारकिर्दीत अनेक मालिकांमध्ये अविस्मरणीय विजय मिळाले, अनेक शतके आणि द्विशतके झळकावली. तुमच्या मैदानावरच्या उपस्थितीमुळे चाहत्यांना आणि संघातील खेळाडूंना जो विश्वास मिळायचा, त्याची बरोबरी कोणतेही आकडे करू शकत नाहीत,” असेही मोदींनी म्हटले.
पंतप्रधानांनी पुजाराच्या फर्स्ट क्लास क्रिकेटमधील योगदानाचीही प्रशंसा केली. ते म्हणाले की, “आंतरराष्ट्रीय क्रिकेटपटू असूनही तुम्ही सौराष्ट्र किंवा परदेशी भूमीवर फर्स्ट क्लास क्रिकेट खेळण्यापासून कधीही मागे हटला नाही. सौराष्ट्र क्रिकेटसाठी तुम्ही दिलेल्या योगदानामुळे राजकोटला क्रिकेटच्या जगात अशी ओळख मिळाली, ज्याचा प्रत्येक तरुणाला अभिमान वाटेल.” पत्राच्या शेवटी मोदींनी म्हटले की, निवृत्तीनंतर पुजाराला आता पत्नी आणि मुलीसोबत अधिक वेळ घालवता येईल, ज्यांनी त्याच्या शानदार कारकिर्दीसाठी अनेक त्याग केले. मोदींनी पुजाराला भविष्यासाठी शुभेच्छाही दिल्या.
.png "Videos"){kind=small}
