नेपाळ क्रिकेट संघाचा कर्णधार आणि युवा फिरकी गोलंदाज संदीप लामिछाने (Sandeep Lamichhane) याच्यावर १७ वर्षीय मुलीवर लैंगिक अत्याचार केल्याचा आरोप आहे. या प्रकरणी संदीप लामिछाने विरोधात पोलिस स्थानकात तक्रार दाखल करण्यात आली असून त्याच्या विरोधात अटक वॉरंट जारी करण्यात आले आहे. यावर प्रथमच संदीप लामिछाने मौन तोडत एका फेसबुक पोस्टच्या माध्यमातून आपली प्रतिक्रिया दिली आहे.
संदीप लामिछाने (Sandeep Lamichhane) याने त्याच्या फेसबुक पोस्टमध्ये लिहिलं की, “मी मोठ्या आशेने आणि विश्वासाने सांगत आहे की मी ६ ऑक्टोबर, २०२२ रोजी नेपाळमध्ये परतत आहे. खोट्या आरोपांविरुद्ध लढण्यासाठी मी स्वत:ला नेपाळ सरकारकडे स्वाधीन करत आहे. मी पुन्हा एकदा सांगतो की मी निर्दोष आहे आणि माझा न्यायव्यवस्थेवर संपूर्ण विश्वास आहे. मला विश्वास आहे की नेपाळची न्यायव्यवस्था मला योग्य न्याय देईल. माझ्या सर्व चाहत्यांना मी सांगू इच्छितो की मी निर्दोष आहे.

कोण आहे संदीप लामिछाने?
संदीप लामिछानं नेपाळचा स्टार क्रिकेटपटू आहे. तो जगभरातील अनेक क्रिकेट लीगमध्ये खेळलेला नेपाळचा एकमेव खेळाडू आहे. आयपीएलमध्ये खेळणारा संदीप लामिछानं नेपाळचा पहिला क्रिकेटपटू आहे. याशिवाय तो ऑस्ट्रेलियाच्या बिग बॅश लीग, कॅरेबियन प्रीमिअर लीग आणि लंका प्रीमिअर लीगसह अनेक लीगमध्ये खेळत आहे.
विशेष म्हणजे संदीप लामिछानेनं १७ व्या वर्षीच आयपीएलचा पहिला सामना खेळला होता. दिल्लीच्या संघानं २०१८ मध्ये संदीप लामिछानला २० लाखात खरेदी केलं होतं. संदीपनं आयपीएलमध्ये आतापर्यंत ९ सामने खेळले आहेत. ज्यात १३ विकेट्स घेतल्या आहेत. आंतरराष्ट्रीय क्रिकेटमध्ये संदीपनं नेपाळसाठी ४४ टी-२०सामन्यात ८५ विकेट्स घेतल्या आहेत.






