गुरुवार, 8 ऑक्टोबर 2026
देशाच्या कानाकोपऱ्यात 5G कनेक्टिव्हिटीचा विस्तार; पंतप्रधान मोदींचे मोठे वक्तव्य!
India Mobile Congress 2026: सुरुवातीच्या काळात लोकांच्या हातात मोबाईल फार कमी पाहायला मिळत होते कारण तो काळ 2G चा होता. मोबाईलमध्ये इंटरनेट होतं, मात्र ते खूप धिम्या गतीने चालायचं. त्यानंतर बाजारात 3G , 4G आणि आता तर 5G चे तंत्रज्ञान आले आहे. 5 जी म्हणजे मोबाइल नेटवर्कची 5 वी पिढी (5th Generation). वेगवान नेटवर्क स्पीड, अखंडित एचडी सर्फिंग, उत्कृष्ट सेवा आणि बरेच काही…
याचपार्श्वभूमीवर पंतप्रधान नरेंद्र मोदी यांनी आज (8 ऑक्टोबर 2026) इंडिया मोबाईल काँग्रेस २०२६ चे उद्घाटन केले असून आयएमसी २०२६ हा देशातील सर्वात मोठा तंत्रज्ञान आणि दूरसंचार कार्यक्रम आहे. हा कार्यक्रम ७ ते १० ऑक्टोबर दरम्यान नवी दिल्लीतील यशोभूमी येथे आयोजित केला जात आहे. ही आयएमसीची १० वी आवृत्ती आहे.
आयएमसी २०२६ चे उद्घाटन करताना नरेंद्र मोदी यांनी सर्वप्रथम जनतेचे आभार मानले. आजचा दिवस भारतासाठी विशेष असल्याचे त्यांनी सांगितले. काल देशसेवेची २५ वर्षे पूर्ण झाल्याचा उल्लेखही त्यांनी केला. उद्घाटनासोबतच पंतप्रधान नरेंद्र मोदी यांनी अभिनेते नाना पाटेकर यांना आदरांजली वाहिली.
यावेळी नरेंद्र मोदी यांनी सांगितले की, गेल्या १०-१२ वर्षांत मोबाईल फोन प्रशासनाचे एक साधन म्हणून उदयास आला आहे. तो आपल्या डिजिटल इंडियाचा पाया राहिला आहे. आज मोबाईल फोनमुळे दुर्गम गावातील मुलांना आणि गरिबांनाही चांगले शिक्षण मिळत आहे. नवीन तंत्रज्ञानामुळे शक्य झाल्याने, कोविड-१९ महामारीच्या काळातही मोबाईल फोनद्वारे काम आणि शिक्षण सुरू राहिले. दुर्गम गावांमधील मुलांनाही डिजिटल शिक्षणाचा लाभ घेता येत आहे. त्यांनी ऑनलाइन शिक्षणासाठीच्या ‘दीक्षा’ प्लॅटफॉर्मवरही चर्चा केली.
इंडिया मोबाईल काँग्रेसची संकल्पना ‘स्केल विदाऊट बाउंडरीज’ (मर्यादांशिवाय विस्तार) ही आहे. येथे 5G, 6G, AI, IoT, सॅटेलाइट कम्युनिकेशन्स आणि इतर नवीन तंत्रज्ञान प्रदर्शित केले जाईल. जगभरातील प्रमुख टेक आणि टेलिकॉम कंपन्या, स्टार्टअप्स आणि उद्योगातील नामांकित कंपन्या सहभागी होत आहेत. चला पाहूया, येथे काय काय उपलब्ध आहे.
IMC 2026 हे आशियातील सर्वात मोठे तंत्रज्ञान प्रदर्शन आहे. भारत आणि जगभरातील प्रमुख तंत्रज्ञान कंपन्या, उदयोन्मुख स्टार्टअप्ससोबत, त्यांची उत्पादने आणि भविष्यातील तंत्रज्ञान प्रदर्शित करत आहेत. या कार्यक्रमात टेलिकॉमला 5G वरून 6G मध्ये कसे रूपांतरित करायचे यावरही चर्चा होईल.
स्वदेशी बनावटीची कृत्रिम बुद्धिमत्ता (AI) कशी विकसित करावी आणि तिचा उपयोग सार्वजनिक हितासाठी कसा करता येईल यावरही चर्चा होईल. स्टार्टअप्स त्यांची AI उत्पादने प्रदर्शित करू शकतात. याव्यतिरिक्त, स्मार्ट मोबिलिटी आणि औद्योगिक रोबोटिक्स यांसारख्या काही नवीन तंत्रज्ञानाचा यावर्षी समावेश करण्यात आला आहे. भविष्यात या तंत्रज्ञानाचा मोठ्या प्रमाणावर वापर होण्याची अपेक्षा आहे. प्रात्यक्षिके आणि प्रदर्शने देखील आयोजित करण्यात आली आहेत.
