Australia च्या विमानात ढेकणांचा सुळसुळाट! क्वांटसची रोम-पर्थ फ्लाइट रद्द, प्रवाशांची गैरसोय
स्थानिक माध्यमांच्या वृत्तानुसार, 9 ऑक्टोबर रोजी पर्थहून रोमला जाणाऱ्या क्वांटसच्या QF5 या विमानातील इकॉनॉमी क्लासच्या पुढील भागातील काही सीटमध्ये ढेकूण आढळले. या कीटकांमुळे प्रवाशांना त्रास सहन करावा लागला. विमान रोम येथे पोहोचल्यानंतर स्वच्छतेसाठी ते सेवेतून तात्पुरते हटवण्यात आले. त्यामुळे 10 ऑक्टोबर रोजी रोम ते पर्थ हे परतीचे उड्डाण रद्द करण्यात आले.
क्वांटसने या घटनेबाबत निवेदन जारी केले आहे. इकॉनॉमी क्लासमधील काही सीटमध्ये ढेकूण आढळल्यानंतर अभियंते आणि देखरेख पथकाने विमानाची संपूर्ण स्वच्छता केल्याचे कंपनीने सांगितले. उड्डाण रद्द झाल्यामुळे प्रवाशांना झालेल्या गैरसोयीबद्दल कंपनीने दिलगिरी व्यक्त केली.
प्रभावित प्रवाशांच्या निवासाची व्यवस्था करण्यात आली. तसेच, त्यांच्या नियोजित उड्डाणाच्या वेळेपासून 48 तासांच्या आत पर्यायी विमानांमध्ये त्यांना जागा उपलब्ध करून देण्यात आल्याचे कंपनीने स्पष्ट केले.
क्वांटसच्या म्हणण्यानुसार, विमानांच्या आतील भागाची नियमित स्वच्छता केली जाते. स्वच्छतेचे उच्च निकष राखण्यासाठी विशेष काळजी घेतली जाते. खबरदारीचा उपाय म्हणून दर ५० दिवसांनी विमानांमध्ये कीटकनाशकाचाही वापर केला जातो.
हे ढेकूण एखाद्या प्रवाशाच्या कपड्यांमधून किंवा सामानातून विमानात पोहोचले असावेत, असा अंदाज व्यक्त केला जात आहे. हे कीटक अंधाऱ्या जागांमध्ये लपून राहतात. कपडे, बॅगा, फर्निचर आणि सीटच्या फटींमध्ये ते सहज लपून राहू शकतात. हॉटेल किंवा अन्य प्रवासाच्या ठिकाणांहूनही त्यांचा प्रसार होऊ शकतो.
ढेकूण हे लहान आकाराचे, पंख नसलेले परजीवी कीटक आहेत. ते माणसांसह काही सस्तन प्राण्यांचे रक्त शोषतात. त्यांच्या चाव्यामुळे त्वचेवर खाज आणि जळजळ होऊ शकते. मात्र, सामान्यतः त्यांच्या चाव्यामुळे गंभीर आरोग्यसमस्या निर्माण होत नाहीत.
हे कीटक सीटच्या फटी, गाद्या, कपडे आणि बिछान्यांमध्ये लपून राहू शकतात. अन्नाशिवायही ते दीर्घकाळ जिवंत राहू शकतात. त्यामुळे त्यांचा पूर्णपणे नायनाट करणे कठीण ठरते.
ढेकणांची समस्या कोणत्याही एका आर्थिक वर्गापुरती मर्यादित नाही. वारंवार प्रवास करणाऱ्या व्यक्तींच्या सामानातून ते नकळत एका ठिकाणाहून दुसऱ्या ठिकाणी पोहोचू शकतात. त्यांचा प्रादुर्भाव रोखण्यासाठी योग्य स्वच्छता आणि प्रभावी कीटकनियंत्रण आवश्यक असते.
.png "Videos"){kind=small}
