भारतासोबत बिघडलेले संबंध आणि ट्रम्प यांची भेट..; कॅनडाचे पंतप्रधान जस्टिन ट्रुडो लवकरच देणार राजीनामा

Justin Trudeau News: कॅनडाचे पंतप्रधान जस्टिन ट्रुडो सध्या चर्चेचा विषय बनत आहेत. सध्या त्यांच्या राजीनाम्याची जागतिक स्तरावर चर्चा सुरु असून ते लवकरच पदाभार सोडू शकतात असे म्हटले जात आहे.

ओटावा: कॅनडाचे पंतप्रधान जस्टिन ट्रुडो सध्या चर्चेचा विषय बनत आहेत. सध्या त्यांच्या राजीनाम्याची जागतिक स्तरावर चर्चा सुरु आहे. जस्टिन ट्रुडो आपल्या पदाचा राजीनामा देण्याच्या तयारीत असून लवकरच पदाभार सोडू शकतात असे म्हटले जात आहे. इंग्रजी वृत्तपत्राने दिलेल्या माहितीनुसार, ट्रुडो सोमवारी( 6 जानेवारी) राजीनाम्याची घोषणा करु शकतात. लिबरल पार्टीतील अंतर्गत गोंधळ आणि पक्षातील सदस्यांच्या दबावामुळे ट्रुडो यांनी हा निर्णय घेतल्याचे सांगितले जात आहे.

कॅनडाटे पंतप्रधान जस्टिन ट्रुडो यांनी 2015 मध्ये पहिल्यांदा निवडणूक जिंकून कॅनडाचे पंतप्रधानपद भूषवले. त्यानंतर 2019 आणि 2021 च्या निवडणुकांमध्येही त्यांनी लिबरल पार्टीला विजय मिळवून दिला. मात्र, सध्या परिस्थिती पूर्णपणे बदललेली दिसत आहे. मिळालेल्या माहितीनुसार, ट्रुडो सध्या मुख्य विरोधी पक्ष कंझर्व्हेटिव्ह पार्टीचे नेते पियरे पॉइलीवर यांच्या तुलनेत 20 टक्क्यांनी पिछाडीवर आहेत. या घसरणीमुळे त्यांच्या नेतृत्वावर मोठे प्रश्नचिन्ह उभे राहिले आहे.

जागतिक घडामोडी संबंधित बातम्या- बांगलादेशच्या ‘या’ निर्णयामुळे दहशतवादविरोधी लढाईवर प्रश्नचिन्ह; जागतिक स्तरावर खळबळ

राजीनाम्याचे कारण 

लिबरल पार्टीच्या अनेक सदस्यांनी म्हटले आहे की, जस्टिन ट्रुडो यांच्या नेतृत्वाखाली पक्षाला आगामी निवडणुकांमध्ये विजय मिळवणे कठीण आहे. यामुळे पक्षातील नाराजी वाढत असून काही सदस्यांनी खुलेपणाने त्यांच्याविरोधात भूमिका घेतली आहे. काही काळापूर्वी ट्रुडो यांना पदावरून हटवण्यासाठी सिग्नेचर कॅम्पेनही राबवण्यात आले होते. या प्रक्रियेदरम्यान ट्रुडो यांना अनेक कठोर प्रश्नांचा सामना करावा लागला. त्यामुळे राजीनाम्याचा दबाव वाढत गेला आहे. यामुळे जस्टिन ट्रुडो लवकरच राजीनामा देतील अशी शक्यता वर्तवली जात आहे.

लिबरल पार्टीपुढील आव्हाने

जस्टिन ट्रुडो राजीनामा दिल्यास, लिबरल पार्टीला नव्या नेत्याची निवड करावी लागेल. सध्या पक्षाची स्थिती कमकुवत झाली असून नव्या नेतृत्वाशिवाय पक्षाला आगामी निवडणुकांमध्ये यश मिळवणे कठीण होईल. जर ट्रुडोंनी राजीनामा दिला नाही, तर पक्षाला पराभवाचा सामना करावा लागू शकतो, असा अनेकांचा विश्वास आहे.

भविष्यातील राजकीय परिणाम
जर ट्रुडो राजीनामा देतात, तर कंझर्व्हेटिव्ह पार्टीचे नेते पियरे पॉइलीवर यांना कॅनडाच्या आगामी निवडणुकांमध्ये मोठा फायदा होऊ शकतो. लिबरल पार्टीसाठी हा मोठा टप्पा ठरू शकतो, ज्यामध्ये पक्षाला आपले संघटन मजबूत करावे लागेल आणि जनतेचा विश्वास पुन्हा मिळवावा लागेल. कॅनडाच्या राजकीय परिस्थितीत हा एक मोठा बदल ठरू शकतो. जस्टिन ट्रुडो यांच्या राजीनाम्यामुळे देशाच्या राजकारणात नवीन वळण येण्याची शक्यता आहे. लिबरल पार्टीला नव्या नेतृत्वाखाली आपले अस्तित्व टिकवण्यासाठी आणि कंझर्व्हेटिव्ह पक्षाला टक्कर देण्यासाठी प्रभावी रणनीती आखावी लागेल.

जागतिक घडामोडी संबंधित बातम्या- कोण होता एली कोहेन? ज्याचा इस्त्रायलने सीरियाकडून 60 वर्षांनंतर परत मागितला मृतदेह