China deletes Tibet flood videos 2026 Nepal Tibet border flash flood glacial breach
नेपाळ आणि तिबेटच्या सीमावर्ती भागात हिमनदी फुटल्यामुळे (Glacial Collapse) आलेल्या विनाशकारी महापुराने हाहाकार उडवून दिला आहे. या भीषण आपत्तीत नेपाळ आणि तिबेट मिळून ६७६ हून अधिक नागरिकांचा मृत्यू झाला असून, तब्बल ३,००० हून अधिक लोक अद्याप बेपत्ता आहेत. मात्र, या महाविनाशाच्या काळात चीन सरकारवर पुन्हा एकदा माहिती दडपल्याचा आणि कठोर सेन्सॉरशिप (China Censorship) लागू केल्याचा गंभीर आरोप होत आहे. तिबेटमधील ग्यिरोंग काउंटी आणि सीमावर्ती भागातील स्थानिक रहिवाशांनी सोशल मीडियावर पोस्ट केलेले भीषण पुराचे आणि भूस्खलनाचे व्हिडिओ चिनी प्रशासनाकडून तात्काळ डिलीट केले जात आहेत.
‘द न्यू यॉर्क टाईम्स’ आणि ‘द टेलिग्राफ’ या आंतरराष्ट्रीय वृत्तपत्रांनी प्रसिद्ध केलेल्या अहवालानुसार, तिबेटमधील ग्यिरोंग पोर्ट (Gyirong Port) या मुख्य व्यापारी सीमा चौकीवर पुराचे पाणी आणि ढिगारा शिरल्याचा अत्यंत भीषण व्हिडिओ स्थानिकांनी चिनी सोशल मीडिया प्लॅटफॉर्मवर शेअर केला होता. परंतु, काहीच वेळात हा व्हिडिओ चिनी इंटरनेटवरून पूर्णपणे गायब करण्यात आला. सरकारी माध्यमांनी या व्हिडिओऐवजी केवळ एका स्थिर छायाचित्राचा (Still Image) वापर केला. चिनी नागरिक आणि जगासमोर केवळ सरकारला हवे असलेले आणि मदत कार्याचे फुटेज दाखवले जात असून, विनाशाची खरी तीव्रता लपवण्याचा प्रयत्न सुरू असल्याचे स्पष्ट होत आहे.
जागतिक घडामोडी संबंधित बातम्या वाचण्यासाठी येथे क्लिक करा : India Bhutan Railway: भारत आणि भूतान दरम्यान धावणार पहिली आंतरराष्ट्रीय ट्रेन; भारताच्या ₹4,000 कोटींच्या प्रकल्पाने चीन अस्वस्थ
चिनी कम्युनिस्ट पक्षाचे अधिकृत वृत्तपत्र ‘पीपल्स डेली’ आणि ‘शिन्हुआ’ या सरकारी वृत्तसंस्थांनी दिलेल्या वृत्तानुसार, राष्ट्राध्यक्ष शी जिनपिंग यांच्या आदेशानंतर चिनी लष्कर (PLA), आपत्ती व्यवस्थापन पथके, ड्रोन आणि हेलिकॉप्टर पूरग्रस्त भागात तैनात करण्यात आले आहेत. परंतु, या अहवालांमध्ये केवळ सरकारच्या मदत कारभाराची प्रशंसा केली जात आहे. तिबेटच्या बाजूला किती गावे वाहून गेली, किती लोकांचे घरे उध्वस्त झाली, याबद्दल कोणतीही अधिकृत माहिती दिली जात नाही. चीनने अधिकृतपणे आपल्या भागात केवळ ७ जणांचा मृत्यू आणि ५५० हून अधिक लोक बेपत्ता असल्याचे सांगितले आहे. दुसरीकडे नेपाळमध्ये ६६९ हून अधिक मृतदेह बाहेर काढण्यात आले असून २४०० हून अधिक लोक बेपत्ता आहेत.
#World I China Censoring Tibet’s Flood Horror? Online Videos Vanish As Questions Grow Over Beijing’s Blackout#China #Tibet #Beijing #NaturalDisaster #InternationalNews https://t.co/Ip1UhBIuMb — News18 (@CNNnews18) August 29, 2026
credit – social media and Twitter
परदेशी पत्रकारांना तिबेटमध्ये प्रवेश करण्यास आणि तेथील नागरिकांशी दूरध्वनीवरून संवाद साधण्यास चिनी प्रशासनाने अत्यंत कडक प्रतिबंध घातले आहेत. १९५० च्या दशकात चीनने तिबेटवर ताबा मिळवल्यापासून हा भाग अत्यंत संवेदनशील मानला जातो. लंडनच्या ‘SOAS युनिव्हर्सिटी’च्या चायना इन्स्टिट्यूटचे संचालक स्टीव्ह त्सांग यांनी ‘द गार्डियन’शी बोलताना स्पष्ट केले की, “चीन तिबेटकडे केवळ राष्ट्रीय सुरक्षेच्या दृष्टिकोनातून पाहतो. त्यामुळे सरकारच्या सर्वोच्च पातळीवरील मंजुरीशिवाय तेथील कोणतीही खरी बातमी किंवा नकारात्मक चित्र बाहेर येऊ दिले जात नाही.”
जागतिक घडामोडी संबंधित बातम्या वाचण्यासाठी येथे क्लिक करा : North Korea च्या लष्करात किम जोंग उन यांचा मोठा सर्जिकल स्ट्राईक; संरक्षणमंत्र्यांची गच्छंती, नवीन शस्त्रास्त्रांची निर्मिती
चीनच्या या अपारदर्शक कारभारावर शेजारील नेपाळमधूनही तीव्र प्रतिक्रिया उमटत आहेत. नेपाळचे माजी खासदार राजेंद्र बजगाईं यांनी चिनी प्रशासनावर टीका करताना म्हटले आहे की, “विनाशाचे आणि पुराचे व्हिडिओ इंटरनेटवरून हटवून चीन नक्की काय लपवण्याचा प्रयत्न करत आहे? पुराचे पुरावे नष्ट केल्याने सत्य बदलणार नाही, उलट यामुळे चिनी प्रशासनाच्या हेतूवर गंभीर प्रश्न निर्माण होत आहेत.”
युएस जिओलॉजिकल सर्व्हे (USGS) च्या माहितीनुसार, हिमनदीचा मोठा भाग कोसळल्यामुळे पाण्याचा प्रचंड लोंढा नदीपात्रात आला आणि काही मिनिटांतच सीमेवरील वस्त्या पाण्याखाली गेल्या. बचाव पथकांनी आतापर्यंत नेपाळमधून ३,७०० हून अधिक लोकांना सुरक्षित बाहेर काढले आहे. मात्र, सीमेच्या दुसऱ्या बाजूला असलेल्या तिबेटमध्ये नेमकी किती जीवित आणि वित्तहानी झाली आहे, याचा अंदाज बांधणे चिनी सेन्सॉरशिपच्या कडक भिंतीमुळे अशक्य बनले आहे.
.png "Videos"){kind=small}
